TALA I VAIFANUA

Pago Pago - AMERIKA SAMOA

TATALAINA TAUAOFIAGA LONA 3 O LE NOFOAIGA LONA 38 A LE FONO FAITULAFONO

O le taeao nei o le a toe tatalaina ai le tauaofiaga lona 3 o le Nofoaiga lona 38 a le Fono Faitulafono, i le Fale Laumei i Utulei, e pei ona sa fa’alauiloa mai e le susuga ia Loa Tuimavave Laupola, i le aso Faraile o le vaiaso ua tuanai.

O le afioga i le Kovana, ia Lemanu P. S. Mauga, o le a fofogaina le Saunoaga Faapitoa o le taeao, i le tatalaina aloaia o le Fono.

O lenei faamoemoe ua fuafua, e amataina i le 10:00 i le taeao nei ma o le a faapea ona auai atu ai ma sui o le Kapeneta faapea le aufaigaluega a le Maota Fono, aemaise sui faitulafono uma.

FAUTUAINA E LEMANU IA LE SISIINA O TAGAVAI MA LAUINA O TAUTOGA I TOTONU O AOGA

I se fa’aaliga fa’alauaitele mai i le afioga i le Kovana, Lemanu P. S. Mauga, i le aso 4 o Ianuari, 2024, ua ia fautuaina ai le Ofisa o Aoga ina ia amataina ona toe faapotopoto fanau aoga i aso uma e toe amata ona sisi tagavai o malo ma taulotoina tautoga o le malo tele ma Amerika Samoa.

Sa ta’ua e le afioga i le kovana i lana fa’aaliga, le o gatasi o le lotonuu ma le mitamita fa’aletagata, ma o lesona ia e ao ona aoaoina i totonu o aiga ma a’oga mai lava i le laititi.  Na saunoa foi Lemanu, e mafai ona fausia le agaga alofa o le tasi i le tasi, e ala i le mitamita fa’aletagata, ma mafai ona fausia ai ni tagatanu’u e pele ia i latou le sa’olotoga.

Na fa’alauiloa atu foi e le afioga i le kovana i le Ofisa o Aoga, afai ae tulaga fa’aletonu tala o le tau i lea aso ma lea aso, ona mafai lea ona lauina tautoga o le malo tele ma Amerika Samoa, i totonu o potu aoga.

I totonu o Amerika, i nei ona po, ua le toe fa’amalosia le taulotoina o le tautoga i totonu o potu aoga.

Sa ta’ua e se tasi o le aufaigaluega a le Samoa News, lona manatuaina o le taulotoina o le tautoga i totonu o potu aoga i taeao uma, i le amataga o le faaiuga o le 1960 ma le amataga o le 1970, ae peitai, e le o iloa tonu po o anafea na le toe faia ai lea tulaga i totonu o potu aoga.

TOE MAUA LE PAGOTA NA SOLA

Ua fa’amaonia mai e le Ofisa a Leoleo, le toe mauaina o le alii pagota o Tauaiga Taele, lea na sola mai i le uafu i Fagatogo i le lua vaiaso ua tuanai.

O le po o le aso Sa, Tesema 31, 2023 na toe pu’eina ai e leoleo ia Taele i Malaeloa.

O Taele, e lua iai pagota na fuafua e toe tipoti atu i Samoa i le faigamalaga a le Lady Samoa i le aso Tofi, Tesema 28, 2023, ae peitai, na sola le alii pagota mai a’ao o leoleo.  Ae e le o se taimi muamua foi lea na sola ese ai Taele mai i le va’ava’aiga a leoleo.

E tusa ai ma fa’amaumauga a le Samoa News, o le 11:20 i le taeao o le aso 27 o Setema, 2023, sa fono ai le Taitai o Leoleo ia Pouu’amea Tuaolo Supapo ma le Fa’atonusili o Falepuipui, e soalaupuleina le sola ese a Tauagiga Taele a’o iai ma leoleo i le Faamasinoga Maualalo.

Sa ta’ua e le Masela o le fa’amasinoga, na sola ese Taele mai i le fale fa’amasino, i le faitoto’a lea e pito i tua, agai atu i le maketi.  Sa fa’amatala e le Masela, ona sa fa’anoi le alii pagota e fia fa’aaoga le fale le ta’ua (se’i tulou), o lea na tatalaina ai ona lima.  Ae o lona ulufafo mai i le fale ta’ele, na sola atu ai i le faitoto’a i tua o le fale faamasino.

Sa mafai ona toe pu’eina ia Ta’ele i se taimi latalata ane.

MAE’A ONA TOTOGI LE SALA A LE OFISA VAALELE A LE SAMOA AIRWAYS I LE MALO O AMERIKA SAMOA

Ua lipotia mai e le nusipepa i Samoa, le Samoa Observer, le mae’a ona totogia e le ofisa vaalele a le Samoa Airways ia sa latou sala e $1,500, i le malo o Amerika Samoa, ona o ni a latou pasese e to’alua lea na faaulufale mai i totonu o Amerika Samoa, e aunoa ma ni pemita.

O lenei lipoti sa faamaonia e le sui Faatonusili o le ofisa vaalele, le susuga ia Fauo’o Fatu Tielu.

Na ta’ua foi e Fauo’o i le Samoa Observer, ua mae’a foi ona faia faaiuga i le aufaigaluega sa mafua ai lenei fa’afitauli, e ala i le fa’amalolo mai i galuega mo sina taimi puupuu, e aunoa ma se totogi.  Ma ua mae’a foi ona lapata’iina i latou, afai ae toe tupu mai lenei tulaga, o le a fa’ate’aina loa i latou mai i a latou galuega.

O lenei fa’afitauli na tulai mai i le masina ua mavae.

O le fa’afitauli muamua lea na malaga mai ai le na avea ma sui Minisita o Leoleo, le susuga ia Fepuleai Fa’asavalu Su’a, i Amerika Samoa, e aunoa ma se pemita, ae sa ia fa’aaogaina lona tusi folau faigaluega e ulufale mai ai i totonu o le teritori.  Ona o lenei fa’afitauli, na mafua ai ona fa’ate’aina o ia mai i lona tofiga fa’aletaitai, i totonu o le malo o Samoa.

E $500 le sala o lenei fa’afitauli.

Ae o le sala lona lua, e $1,000, na mafua ina ua fa’atagaina e le Samoa Airways ia se pasese sa na umia se tusi folau Niu Sila, e ulufale mai i totonu o Amerika Samoa, e aunoa ma se pemita.

O Novema 2022 na amata fa’amalosia ai tulafono a le malo o Amerika Samoa, lea ua fa’amalosia ai nisi o atunu’u e tatau ona umia e a latou tagata faimalaga mai i totonu o le teritori, ia se pemita, ae e le i ulufale mai.