TALA I VAIFANUA

Pago Pago - AMERIKA SAMOA

FA’AU’U ULUA’I VASEGA FAIFEAU A LE A’OGA TUSI PAIA A RHEMA

O le aso Tofi, Tesema 23, 2023, na fa’ataunuu ai le ulua’i fa’au’uga a le Vasega o Faifeau, a le aoga Tusi Pa’ia, a RHEMA, i lo latou laumua i Pago Pago, talu ona tatalaina i le masina o Aukuso o le tauaga nei.

E to’a 11 i latou sa fa’amanuiaina i Tusi Pasi fa’a Faifeau, e aofia ai nisi mai i nisi o motu o le Pasefika.

Sa fa’ailoa mai e Pauline Sariman, mai i le motu o Papua Niu Kini, na ona malamalama e uiga i lenei a’oga fa’ale Tusi Paia, i ni nai tausaga ua mavae, a’o iai i Apia, Samoa ma sa tatalo ina ia tatalaina se lala i Amerika Samoa.

O Sariman, ua atoa le 9 tausaga o fa’amautu i Amerika Samoa ona o lo o galue nei lona to’alua i le maota gasegase a le LBJ.

I le fa’amae’aina ai o la latou 2 tausaga ma ua o latou taulimaina nei a latou tusi pasi, ua o latou sauni atu nei mo leisi lua tausaga, lea e amataina ia Ianuari 30, 2024.

Sa ta’ua e le Faifeau sinia a le A’oga Fa’aleTusi Paia, o James Ah Kui, ua maua nei e i latou ua fa’au’uina, ia le avanoa e auauna ai i le Atua i a latou ekalesia.  Ae mo i latou o lo o fia fa’aauau pea a latou a’oa’oga, e mafai ona toe fa’aauauina a latou aoaoga mo leisi 2 tausaga i le latou Kolisi i Apia.

FAIA SU’ESU’EGA I TONGA I LE TINO MALU NA MAUA I LE TAEAO O LE ASO KERISIMASI

Ua ripotia mai i Tonga, le maua ina o se tino maliu, e ni alii faifaiva se to’alua, i le taeao o le aso Kerisimas, Tesema 25, 2023.  Ma ua fa’agasolo nei ni suesuega a le ofisa a leoleo i Tonga i lenei mataupu.

E tusa ai ma se ripoti mai i le ofisa a leoleo i Tonga, ua auina atu nei lenei tino maliu i le fale maliu i le maota gasegase a Vaiola, e fa’ataunu’uina ai ni suesuega a foma’i, ma se faamoemoega o le a mafai ona iloa ai le suafa o le ua maliu.

O lo o ua u’unaia nei e le ofisa a leoleo i Tonga ia le mamalu o le atunu’u i Tonga, mo sa latou fesoasoani e tusa ai ma lenei mataupu.

FA’ATAUNUUINA SE SAUNIGA FA’AMANATU MO NGAIRE A’ASA TUSI

O le afiafi o le aso Sa, Tesema 24, 2023, na faapotopoto ai nisi o uo ma aiga o le tina ia Ngaire A’asa Tusi, e manatuaina lona olaga ae o se avanoa e faamafanafana ai le tasi i le tasi, i le to’esea fa’afuase’i o lenei tina Samoa.

Sa mauaina le tino maliu o Ngaire e 31 tausaga i se paka i Tacoma, i Uasigitone, i le taeao o le aso Gafua, Tesema 18, 2023.

Sa ta’ua e le uso a Ngaire, o Natasha Aasa, i lea fa’atasiga, e le o se fuafuaga lea a le Atua mo lona uso.  E to’afitu se fanau a Ngaire, e i lalo uma o le ta’i 10 tausaga.  Na ta’ua e Natasha le alofagia o si ona uso ma o le a misia o ia.

E tusa ai ma se ripoti a leoleo mai i Tacoma, o lo o fa’aauau pea a latou su’esu’ega, ae e o’o mai lava i le taimi nei, e le o toe maua se tala po o ua molia seisi i lenei fa’alavelave, e pei ona sa fa’amaonia i le saunoaga a Natasha i lea afiafi.

I le saunoaga a le to’alua a Ngaire, le susuga ia Faatasiga Jr. Tusi, sa ia u’unaia ai aiga ma uo ina ia fa’atasi ma aiga, alofa ia i latou ma puipui ia i latou, ona e leiloa lava fuafuaga a le Atua.  Sa ia fa’aleoina lona alofa i matua ma aiga o Ngaire.  Ma sa ta’ua foi lona fa’alagolago malosi i le Atua.  Sa ia fa’aleoina foi lona alofa tele i le tina o si ana fanau, lea ua maliu fa’afuase’i.

TOE ILOILO LE FA’ATE’AINA O SE ALII LEOLEO I SAMOA

I se ripoti mai i le Samoa Observer, o lo o ta’ua ai le iloiloina e le Komesina a Leoleo pe ono fa’aleaogaina se tusi fa’ate’a, ua tu’uina atu i se tasi o alii leoleo sinia, lea na fa’ate’a ona o lona faia o se suesuega e aunoa ma se fa’atagana mai i taitai o le ofisa a leoleo, i se fa’alavelave tau ta’avale ua fai sina umi o ta’atia i le ofisa a leoleo.

O le masina ua mavae na fa’ate’a ai ia le alii leoleo su’esu’e o Lio Fa’ataumalama Auava, ina ua ia ioe i moliaga e fa, i lona faia o se su’esu’ega i le maliu o Tuuau Fa’asavalu, e aunoa ma se fa’atagana.  E 10 aso na tu’uina atu ia Lio, e tali mai ai i le fa’ate’aina o ia.

Ae ua fa’aalia mai e le Komesina a Leoleo, le susuga ia Auapaau Logoitino Filipo, o lo o toe Iloilo nei e lo latou ofisa lenei mataupu, i le fa’ate’aina o Lio.