TALA I VAIFANUA

Pago Pago - AMERIKA SAMOA

ASO MALOLO A LE MALO MO LE KERISIMASI MA LE TAUSAGA FOU

O le aso Tofi o le vaiaso ua mavae, na fa’alauiloa mai ai e le afioga i le Kovana, Lemanu P. S. Mauga, e ala i se fa’aaliga fa’alauaitele, ia aso malolo a le malo mo le Kerisimasi ma le Tausaga Fou.

I lea fa’aaliga, sa fa’alauiloa mai ai e le afioga Lemanu e faapea, i le maua ai o se avanoa e fa’amanuia ai le fanau mai o Iesu ma le amataga o le tausaga fou, o se taimi lelei lea mo mafutaga fa’aleaiga ma maua ai se malologa mai i galuega.

O aso malolo mo le Kerisimasi, sa fa’amamaluina lea i le aso Gafua, Tesema 25, 2023 ma le aso Lua, Tesema 26, 2023.

Ae o le a fa’amamaluina le Tausaga Fou, i le aso Gafua, Ianuari 1, 2024.

O nei aso e tolu, o le a faapea ona tapunia ai ofisa a le malo seia vagana ai tautua masani aua le puipuiga o le saogalemu ma le soifua maloloina o le atunu’u.

TU’UMALO LE AFIOGA PAPALI’I GRANT PERCIVAL

O le aso 19 o Tesema, 2023 na tu’umalo ai le afioga Papali’i Grant Percival i Niu Sila.

Ae le i o’o mai le vala’au pa’ia a le Atua i le afioga Papali’i, na mafai ona o la maua ma si ona faletua ia Vaina, ia le avanoa e asiasi atu ai i le paka o Kualoa i Oahu, Hawaii, e maimoa i se tasi o mata’aga ua fa’aigoaina o le ‘Chinaman’s Hat’, i le 2016.

O le afioga Papali’i o se suli o le aiga sa Malietoa ma sa avea o ia ma Faatonusili i le ofisa vaalele a le Polenisia, a’o soifua o ia.  E le gata i lea, o ia o se tasi na filifilia tama ta’a’alo mo le ‘au a le Manu Samoa. 

FILIFILIA SE ALII AOGA MAI SAMOANA E AVEA MA SUI O AMERIKA SAMOA I SE FONOTELE MO FA’ATOAGA

O le alii aoga mai i le aoga maualuga Samoana, o Mataio Suluai, na avea ma sui o Amerika Samoa i se fonotele sa fa’ataunuuina i Las Vegas, Nevada, i le vaiaso ua mavae, Tesema 12-14, 2023.  O lenei fonotaga sa patino mo le Faalapotopotoga o Fa’ato’aga.  Ma na filifilia ai Mataio e se Komiti Faafoe ma faamanuiaina o ia e mauaina se sikolasipi na mafai ona ia auai atu i lenei fonotele, e ala i se tauvaga tusiga tala.

O le tala tusia a Mataioi, lea na manumalo ai ma ia maua ai lenei faamanuiaga, sa fa’atatau i auala e mafai ai ona fa’aaogaina se Pili mo Fa’atoaga e u’unaia ai le aveina atu o fua o fa’ato’aga a Amerika Samoa, e fa’atauina i atunu’u i fafo.

E to’a 40 nisi o fanau aoga mai isi aoga i atunu’u i fafo, sa filifilia mo lenei fonotele i Las Vegas.  Ae na o Mataio na filifilia mai i le Pasefika.  O le lona tolu ai lea o fanau aoga mai i le fa’alapotopotoga a le Finafinau, ua faapea ona ausia lenei tulaga, i le avea ma sui o Amerika Samoa i lenei fonotaga.

Na fa’aalia le agaga fa’afetai o Mataio, i le avea o ia ma se totino o le Finafinau, ma mauaina lenei faamanuiaga ua mafai ai ona faimalaga atu ma auai i lenei fonotele taua.  Sa ia fa’aalia lona mitamita tele e fa’asoa atu ona manatu ma talitonuga, e fa’atatau i lona atunu’u o Amerika Samoa, o se tasi o atunu’u ua fa’amanuiaina i tulaga tau fa’ato’aga.