TALA I VAIFANUA

Pago Pago - AMERIKA SAMOA

FEILOAI FA’ATONUSILI A LE MEDICAID MA LE KOMITI O TUPE A LE SENATE A LE IUNAITE SETETE

O le aso Tofi o le vaiaso ua mavae, Tesema 14, 2023, na feiloai ai le Faatonusili o le ofisa a le Medicaid ma le aufaigaluega o le Komiti o Tupe a le Senate a le Malo Tele, mo le soalaupuleina o ni mataupu autu se lua, e aoga mo le polokalama a le Medicaid i Amerka Samoa.  

E pei ona ta’ua e le Faatonusili ia Sandra King, o nei mataupu e se’i vagana o se pili taufa’aofi e faaulu e le komiti o Tupe a le Senate a le Malo Tele, ma pasia mai e le Konekeresi, e fa’ato’a mafai ai ona maua ai se tali lelei.

Sa fa’amalamalamaina e Young i totino o le komiti a le Senate mai i Amerika, le manaomia ona agava’a o tagata nofo mau i totonu o Amerika Samoa i le polokalama a le Medicaid.  Ae le gata i lea, o le aofia o moega a le maota gasegase autu a le malo (LBJ) i lalo o le faamalumaluga a le vaega o le polokalama, ua ta’ua o le “Disproportionate Share Hospital Coverage”.

Sa faamanino e Young, o se tasi o sini autu a le afioga i le Kovana, Lemanu P. S Mauga, o le sailia o se auala e mafai ai ona agava’a tagata mai fafo ua atoa le 20 tausaga o faamautu i totonu o Amerika Samoa, i le polokalama a le Medicaid.

Sa ta’ua e le tamaitai Faatonusili, o lo o mafai ona agava’a tagata nofomau i Amerika, mo le Medicaid, pe a atoa le 5 tausaga o nofomau i totonu o Amerika.

Sa fa’aalia foi e Young, o lenei galuega faigata mo le faalauteleina o le Fuafuaga Fa’alesetete o le Medicaid, mo nisi tautua fou i tua atu o le LBJ, e le gata ina manaomia ai le toe suia o le fuafuaga fa’alesetete, ae faapea foi nisi o tulafono feterale, lea o lo o avea ma puniala i le agava’a o tagata o le atunu’u.

Sa ia fa’aalia foi lona agaga fa’afetai i totino o le Komiti o Tupe a le Senate a le Malo Tele, o lo o fa’aalia lo latou loto malamalama i lenei mataupu faapea le taua o le sini fa’ata’atia a le Kovana.

Ua fa’alauiloa mai foi e le ofisa a le Medicaid a Amerika Samoa, le iai o nisi fonotaga ua mae’a ona fa’atulagaina mo le lumanai, e fa’aauau ai ona soalaupuleina lenei mataupu. 

TOE TATALA TAUTUA ATOATOA A LE LBJ

I se fa’aaliga fa’alauaitele mai i le LBJ i le aso Gafua, Tesema 18, 2023, sa fa’alauiloa mai ai le fa’aauau pea ona iai fa’afitauli i le suavai i totonu o le falemai.

Ae peitai, sa le’i avea lea ma tulaga na taofia ai le toe tatalaina o tautua uma a le LBJ i le aso Lua, Tesema 19, 2023, ma fa’atonuina ai fomai ma tausima’i, ina ia toe fo’i i a latou tiute masani i lea lava aso.

E le gata i lea, sa fautuaina foi aufaigaluega uma o vaega eseese o le LBJ, ina ia fa’afeso’ota’i a latou Supavaisa e faamautu ai aso e tatau ona o latou toe fo’i atu ai i a latou galuega.

Na fa’aalia e le sui Pule Sili o le LBJ, le susuga ia Aitofele James Sunia, le agaga fa’afetai o le pulega ma le komiti fa’afoe a le LBJ, i le aufaigaluega uma a le falemai mo lo latou onosai ma le nofo malamalama.