TALA I VAIFANUA

Pago Pago - AMERIKA SAMOA

TO’A 136 FA’AU’UINA MAI I LE FA’AU’UGA LONA 79 A LE ASCC

 O le aso Faraile o le vaiaso ua mavae, Tesema 15, 2023, na fa’ataunuuina ai le fa’au’uga a le vasega fa’au’u lona 79 a le Kolisi Tu’ufa’atasi a Amerika Samoa (ASCC), ma e to’a 136 ua faamanuiaina mai i lea fa’au’uga.  Sa fa’atumulia le laumua a le Ekalesia Faapotopotoga Kerisiano a Amerika Samoa (EFKAS) i Kanana Fou, i aiga ma uo, sa mafai ona auai atu, e molimauina lea aso faapitoa.

O le susuga i le Peresetene Eneliko Kelemete, le Peresetene o le Siteki a Pago Tutotonu, o le Ekalesia a Iesu Keriso o le Au Paia o Aso e Gata Ai, sa fofogaina le talosaga fa’afetai ma le fa’amanu i le Atua, i le amataga ma le faaiuga o le fa’au’uga.  Ma sa ia toe fa’amanatu atu i le vasega fa’au’u, “O le mata’u i le Atua, o le amataga lea o le Poto”.

I lana saunoaga fa’afeiloai, sa saunoa ai le Peresetene o le ASCC, le faletua ia Dr. Rosevonne Makaiwi-Pato, o se aso maualuga lea i totonu o le ASCC, ona e le gata i le toatele o le vasega fa’au’u, ae faapea foi le maualuga o tulaga ua mafai ona o latou ausia, e aofia ai le fa’au’uina o ni Tausimai Pasi se to’asefulu (10) – LPN, ma Tausima’i Lesitala – RN, e to’alima (5). 

O nei tausimai sa mafai ona pasi a latou su’ega i le ulua’i taimi na su’e ai, i maka e 100 pasene.

E le gata i lea, o le ulua’i fa’au’uga lenei ua mafai ona fa’au’uina ai nisi se to’afa ma Tusi Pasi i le Aoaoina o le Gagana Samoa.

Sa maua foi e le vasega fa’au’u le avanoa e fa’afofoga ai i se tuleiga mai i le afioga i le Kovana, ia Lemanu P. S. Mauga, ma sa ia momoli le agaga fa’afetai i matua, aiga, fanau, o matua fa’aleagaga, ma i latou uma sa fesoasoani malosi i le faigamalaga faigata a le vasega fa’au’u.

Sa ia toe faamanatu atu i le au fa’au’u, ina ia aua ne’i fa’agaloina la latou amataga, aua e mafai ona avea ma o latou taiala i taimi o faigata.

Ae o le fofoga autu o le aso, o le afioga i le Faipule ia Malaeoletalu Melesio Gurr, lea sa ia lu’itauina le vasega fa’au’u e ala i ni fesili mo so latou va’ai taula’i ia Amerika Samoa, i leisi 20 tausaga o i luma.

O nisi o fesili na aofia ai le tulaga i fuala’au fa’asaina, po o se tulaga o finagalo iai le vasega fa’au’u, ina ia tineia mai i totonu o le teritori i le lumana’i.  Faapea ai ma sauaga i totonu o aiga, nu’u ma le teritori atoa.  Sa o’o lava i fa’ato’aga, o pisinisi, na fesiligia e le afioga i le Faipule, po o se tulaga lea o finagalo le vasega fa’au’u, ia tele ina pulea e tagata Samoa, i le lumanai.

Sa faapea foi ona saunoa Malaeoletalu, i lona lagolagoina o le lu’itau ua folasia e le peresetene o le Senate, i le afioga ia Tuaolo Manaia Fruean, mo le u’unaia o tamaitai ma tina, e avea ma taitai i totonu o le malo ma le taitaiga o le teritori.  Sa saunoa Malaeoletalu i le au fa’au’u, ‘O outou o a tatou ta’ita’i o le lumana’i, ma o outou, e mafai ona faia ni suiga lelei i totonu o lo tatou motu.”

I le faaiuga o le tufatufaina o fa’ailoga, sa faapea loa ona peseina e le vasega fa’au’u le vi’iga “Lo Ta Nu’u Moni”.

TAPUNIA OFISA KONESULA AOAO SAMOA I AMERIKA SAMOA

I se fa’aaliga fa’alauaitele mai i le Ofisa Konesula Aoao o Samoa, le tapunia o la latou lala i Amerika Samoa mo auaunaga, i le aso Kerisimasi, Tesema 25, 2023 se’ia pa’ia le aso 8 o Ianuari, 2024.

Ua fautuaina le mamalu o le atunu’u o lo o fuafua e malaga i Samoa (e aofia ai ma i latou e malaga mai i Hawaii) i le va o le Kerisimasi ma le aso 8 o Ianuari, 2024, ina ia fa’ao’oina atu loa talosaga mo pemita, ae e le i tapunia la latou ofisa, i le aso Faraile, Tesema 22, 2023.