TALA I VAIFANUA

Pago Pago - AMERIKA SAMOA

TOE FAAULU E LE KOVANA LE SUAFA O AOELUA O SE FAATONUSILI I LE OFISA O FESOOTAIGA LAUTELE

Na faamaonia i se tusi a le afioga i le Kovana, Lemanu P. S. Mauga, na tusia i le aso 8 o Tesema, 2023, se iloiloga na toe tolopoina, lea na u’unaia ai e Lemanu ia le Peresetene o le Senate, le afioga Tuaolo Manaia Fruean ma afioga i Senatoa, ina ia iloiloina ma pasia le susuga ia Solomona Vaioletama Aoelua e avea ma Faatonusili o le Ofisa o Fesootaiga Lautele (OPI).

Na ta’ua e le afioga i le Kovana i lana tusi, le agava’a o le susuga ia Aoelua, e lenei galuega.  Ma sa galue muamua foi o ia i totonu o le Ofisa a le KVZK, e le gata i le pu’eina o ata, ae faapea foi le avea ma Faatonu.

Sa fa’ailoa mai e se tasi o le ofisa a le Peresetene o le Senate, i le Samoa News e faapea, e taunu’u atu le tusi a le Kovana, ae o lo o i atunu’u i fafo ia le afioga Tuaolo.

O Ianuari 3, 2023 na tofia ai e le Faigamalo ia Aoelua e avea ma sui Faatonusili a le OPI, ina ua faamavae ia Aaron Hall lea na avea ma Faatonusili.

I le amataga o le Faigamalo a Lemanu-Talauega, sa filifilia ai e le kovana ia Aoelua e avea ma Faatonusili a le OPI, ae peitai, e le i pasiaina o ia e le Maota o le Senate, e ui ina sa pasia o ia e le Maota o Sui.  Mulimuli ane, na pasia e le Senate ma le Maota o Sui ia Hall e avea ma Faatonusili a le OPI.

Sa aofia ai i le tusi a le Kovana ia se lisi o agava’a a le susuga ia Aoelua, lea na aofia ai le avea o ia ma Sui Lagolago ia Lemanu a’o avea ma Lutena Kovana faatasi ai ma lona avea ma Faauluuluga o le Aufaigaluega a le Ofisa o le sui Faipule i Uasigitone, mo le tofa Eni F.H. Faleomavaega.  E le gata i lea, o lo o ta’ua ai foi le atoa o le 10 tausaga o ia galue mo le ofisa a le US Census Bureau.

TOE TAPUNIA LE AOGA MAUALUGA A TAFUNA ONA UA PE LE VAI

O le aso ananafi na toe tapunia ai le aoga maualuga a Tafuna, ona o tulaga faaletonu o le suavai.

E tusa ai ma se fa’aaliga mai i le ofisa a le aoga maualuga, sa faatonuina matua ina ia piki a latou fanau mai i le aoga, ma fa’aauauina a latou vasega i luga o le initeneti ona o le tulaga faaletonu i le suavai.

I se fa’aaliga mai i le ofisa a le ASPA ananafi, lea sa fa’asalalauina foi i luga o upega tafa’igalagi, sa faatoese mai ai le pulega o le Suavai ma le Eletise ona o le tulaga faaletonu o le suavai, na amata mai i Fagatogo seia pa’ia Fagatogo.

Sa talosagaina le onosa’i o le mamalu a le atunu’u, a’o galulue le aufaigaluega ina ia mafai ona faaleleia lenei tautua.

Sa faapea foi ona tu’uina mai ai se faatonuga a le ASPA mo le faapuna o le suavai mai paipa, aua le fofoga taumafa a le atunu’u.

E pei ona ta’ua i le fa’aaliga a le ASPA i le aso ananafi, ona o le tetele o timuga ua tulaga faaletonu ai fa’atanoa vai, lea ua mafua ai ona tape nisi o faatanoa vai i le va o Tafuna ma Fagatogo, lea na mafua ai ona tau leai se suavai.

Mo nisi faamatalaga e tusa ai ma lenei mataupu, e mafai ona valaau atu i le 699-1234.