TALA I VAIFANUA

Honolulu - HAWAII / Pago Pago - AMERIKA SAMOA

SISI FAAVAELOTO TAGAVAI E MANATUA AI PEARL HARBOR

I le aso Lulu na se’i mavae atu nei, na fa’asalalauina ai se malelega tusia a le afioga i le Kovana, Lemanu P. S. Mauga, mo le sisiina faavaeloto o le tagavai a le Malo Tele faapea le tagavai a Amerika Samoa, i le aso ananafi, Tesema 7, 2023, e fa’aaloalogia ai fitafita e to’a 2,403 faapea tagata nu’u o Hawaii, sa maliliu i le taeao o le aso 7 o Tesema, 1941.

O le aso ananafi, ua fa’alauiloaina o le aso e manatua ai soifua o i latou na maliliu i lea aso pagatia ma tomanatunatu ai i le malolosi o vaega’au a le Malo Tele, lea na mafai ona tali atu i lea osofaiga ma faamautuina se puipuiga pito sili ona maoa’e i le lalolagi atoa.

I le malelega a le afioga i le Kovana sa ia talosagaina ai tagatanu’u o Amerika Samoa ina ia tomanatu i soifua na to’esea, aemaise o latou aiga ma i latou na faasaoina mai i lea osofaiga.  Ae le gata i lea, o le tomanatunatu ma le agaga faafetai i faamanuiaga ma le puipuiga a le Atua i totonu o le teritori.

TATALA ALOAIA LIKI KIRIKITI O LE SISIGAFUA 2024 IA IANUARI

I se fa’aaliga aloaia mai i le Ofisa o Mataupu tau Samoa ma le Komiti a le Liki Kirikiti mo le Sisiga Fu’a a Tutuila ma Manu’a 2024, ua faamautuina ai le tatalaina aloaia o lenei liki kirikiti I le taeao o  Ianuari 13, 2024, i le malae ta’alo i le afioaga o Faga’alu.

Ma ua faapea ona taloina uma afioaga ma ‘au kirikiti ua faamoemoe e tausinio i lenei fa’agatama, le faagataina ona resitala ‘au kirikiti i le aso 29 o lenei masina, mo ‘au a alii ma tamaitai.

Ae o le aso 5 o le masina fou, ua fuafua le faataunuuina ai o se fono a Kapeteni mo ‘au kirikiti uma mai afio’aga taitasi, i le Ofisa o mataupu tau Samoa.  O lea feiloaiga ua faaomemoe e faamautu ai aso ma taimi o ta’aloga taitasi.

AOFIA AMERIKA SAMOA I LE KOMISI O AOAOGA MAUALULUGA A LE PASEFIKA I SISIFO 

I le pasiaina ai o iugafono tatau, ua avea nei Amerika Samoa ma se tasi o totino o le polokalama a le WICHE, po o le Komisi mo Aoaoga Maualuga i Sisifo.  Ma ua mafai ai nei e tagatanu’u o Amerika Samoa ona agava’a mo nisi o polokalama e fesoasoani i pili i totonu o kolisi ma iunivesite e silia ma le 160.  Faatasi ai ma le tele o alagamanuia e mafai ona fesoasoani tau a’oa’oga.

Na fa’aalia e le peresetene o le WICHE, ia Demaree Michelau lona agaga fiafia ona o lenei faaopoopoga fou, e le gata i le polokalama a le WICHE ma le Komisi, ae faasilisili ai mo fanau aoga, o aiga ma tagata nu’u o Amerika Samoa lea o le a penefiti mai i lenei sootaga ma le WICHE.

Sa saunoa le afioga i le Kovana, Lemanu P. S. Mauga, e tatau ona maua uma e alo ma fanau o Amerika Samoa nei avanoa aua lo latou manuia.  Ma i le galulue faatasi ai ma le fono faitulafono, ua mafai ai nei ona pasiaina lenei iugafono.  Ma o se fiafiaga le mafai ona galulue faatasi ma le WICHE mo le auina mai o nei penefiti ma avanoa i aiga o Amerika Samoa.  

E 15 setete i Sisifo faapea ma teritori o le Pasefika o lo o aofia i totonu o le WICHE.  Ma e le gata ia Amerika Samoa, ae o lo o aofia ai foi ma Guam, le atu Malesala, Micronesia ma Palau.