TALA I VAIFANUA

Pago Pago - AMERIKA SAMOA

MAUTU PEA FAIGAMALO LEMANU-TALAUEGA E GALULUE SO’OTAU’AU MA LE FONO

I le te’ena ai e le Senate o le pili mo tupe faaopoopo e $36 miliona, ua fa’alauiloa mai e le afioga i le kovana, Lemanu P. S. Mauga ma le afioga i le lutena kovana, Talauega E. V. Ale, le fa’aauau pea ona maua’a o la la’ua naunautaiga e galulue faatasi ma taitai o le Fono, aua manaoga taua mo le teritori.

E ui ina tulaga faanoanoa le faaiuga a le Senate e tusa ai ma le pili mo tupe fa’aopoopo, ae peitai, ua talitonu le Faigamalo, o nei faaiuga ua fa’aalia mai ai nisi o popolega i nisi o Senatoa.  Ua talitonu Lemanu, o nisi nei o vaega taua i totonu o gaioiga faatemokalasi, ma o nisi nei o auala e mafai ai ona fa’aleleia atili pili taufa’aofi.

Na fa’aalia e le afioga i le kovana, o le faavae o le malo o le galulue faatasi ma fesootaiga, ma le aumaia o tagata uma i le laulau e galulue faatasi mo le lelei sili mo tagata o le atunu’u.  Sa ia ta’ua le fa’aaloalogia o manatu ma atugaluga a afioga i Senatoa, aua e taua le eseesega o manatu fa’aalia i le fa’agaioiga o le faigamalo.

E ui ina maua’a le faigamalo I le galulue faatasi ma taitai o le Fono, ae ua mausali lo latou agaga o le a sailia nisi ala e mafai ai ona pasia nei pili taufa’aofi ina ia mafai ona o gatasi ma manaoga o tagata o Amerika Samoa.

ULUAI FAAUUGA A LEOLEO O LE FALEPUIPUI

O le aso Lulu o le vaiaso ua tuanai, Novema 22, 2023, na fa’ataunuuina ai le uluai faauuga a le malo o Amerika Samoa mo leoleo o le falepuipui.  O lenei faauuga sa faataunuuina i le Fale Laumei i Utulei.

E to’a 32 i latou sa ulufale i nei aoaoga, ae i le aso Lulu o le vaiaso ua mavae, sa faamanuiaina ma aloaia ai i latou e to’a 27, ina ua o latou ausia tulaga uma e fa’au’u ai.

E fa vaiaso sa faataunuuina ai aoaoga o lenei polokalama, na aofia ai ma aoaoga faamalosi tino, lea sa faatautaia e sui mai i le Ofisa a Leoleo. 

O le afioga i le Faipule mai i le Tualauta, le susuga ia Samuel Ioka Ale Meleisea, sa ia taua’aoina tusi pasi a le au fa’au’u.  O se tusi pasi fa’apitoa sa tauaaoina mo Cadet Saupo, Maureen ona o le tulaga ese o lana gaioiga i le masina atoa o aoaoga.

O le afioga i le kovana, ia Lemanu P. S. Mauga sa avea ma fofoga o le aso, aua se feau taua tainane se faafetai ma se faamalo mo le vasega faau’u.  Sa ia faamamafaina ai le taua o le faatinoina o tiute a i latou nei, ma le tinou aemaise o le manatu toto’a i le puipuiga o le saogalemu, o tagata o le atunu’u.

Sa amataina le sauniga fa’au’u i le savali fa’aaloalo mo le taula’i o tagavai, lea sa faatinoina e le JROTC a le aoga maualuga a Tafuna.  O le saunoaga fa’afeiloai na fofogaina e le Faatonusili o le Ofisa o Falepuipui ia Tauanu’u Semu F. Tauanu’u.  O le susuga i le Faafeagaiga ia Kautoa Moloti’i mai i le EFKAS Nua & Seetaga sa fofogaina se feau fa’aleagaga mo le aso taua.