TALA I VAIFANUA

Pago Pago - AMERIKA SAMOA

TOE FAAOPOOPO E LE HAWAIIAN EA IA SE MALAGA FAAOPOOPO MO ASO FIAFIA

I se fa’aaliga mai i le ofisa vaalele a le Hawaiian Ea, ua fa’amaonia mai ai le faaopoopoina o ni faigamalaga lona tolu i faigamalaga e lua o lo o iai nei, ma o lea faamoemoe o le a amataina i le aso Lulu, Tesema 13, 2023 ma le aso Lulu, Ianuari 3, 2024.

E le i ma’oti mai i le ofisa vaalele se faamatalaga i le mafuaaga o lenei faaiuga, e ui ina sa fa’ailoa mai muamua, le leai o se fuafuaga e toe faaopoopo nisi faigamalaga i le va o le teritori ma Hawaii.

Ae e pei ona aofia i ripoti a le Samoa News i vaitaimi ua tuanai, o nei faigamalaga i vaitaimi o aso fiafia, o nisi o faigamalaga tutumu ia i le tautua a lenei ofisa vaalele.

O nisi o mamalu o le atunu’u, ua faapea ona faimalaga atu i Samoa ina ia mafai ona aga’i atu i Honolulu, e ala i le vaalele a Fiji Airways.

TASI LE PINE SILIVA – TASI LE PINE APAMEMEA

I se va’aiga i tulaga o aofaiga o pine ua iai nei Amerika Samoa i ta’aloga o le Pasefika lea o lo o fa’agasolo nei i totonu o le atu Solomona, o lo o fa’aalia mai ai le umia e Amerika Samoa o se Pine Siliva e tasi ma se Pine Apamemea e tasi.

O le uluai pine siliva na maua e le alii o Micah Masei mai i tauvaga a’au a alii.  E toavalu i latou na tausinio i lenei fa’agatama, e toalua mai i Niu Kaletonia.

E tusa ai ma se ripoti mai i le tusitala a le Samoa News, le susuga Asi Andrew Fa’asau, na ia fa’atumulia o le nofoaga sa faia ai le tu’uga a’au, i nisi o ‘au ta’a’alo a Amerika Samoa sa mafai ona auai atu e tapuai le taumafaiga a Masei.

Na faamanuiaina foi Masei i lona umiaina o le tulaga muamua, i uluai tu’uga,  i le na o le 29.26 sekone o lana a’ua,a e tulaga lua ai le alii o Tsi Limtiaco mai i Micronesia.

Ae peitai, i le sailiga siamupini sa faapea ona tulaga muamua ai le alii mai Micronesia ma ona mauaina ai le pine auro, e tulaga lua ai Masei ma ona mauaina le pine siliva.

Sa saunoa Masei, na ona lagona lona sela ina ua lata le tu’uga i le pa sima.  Ae peitai, na ia fa’aalia lona agaga fiafia ina ua mafai ona ia ausia le ulua’i pine mo Amerika Samoa.  Sa ia fa’aalia foi lona agaga fa’afetai ia i latou sa mafai ona auai atu i lea aso e tapuai lana taumafaiga.

AGA’I I LUMA IA LE OFISA O FAIAOGA A LE ASCC I LA LATOU POLOKALAMA O LE ‘STEAM’

I lenei vaitau o le alualu i luma ma le atinaega o tomai faapitoa tau i tekonolosi, ua fa’atulagaina ai e le Vaega mo le aoaoina o Faiaoga (TED) a le Kolisi Tu’ufaatasi a Amerika Samoa (ASCC) ia se sini autu mo le u’unaiga o le latou polokalame o le ‘Steam’ i totonu o a latou vasega.

I le aso Lulu, Novema 15, 2023, sa faatinoina ai e le TED a le ASCC ia le latou uluai polokalama o le STEAM.  O le STEAM o le faapuupuu ii le gagana Peretania o mataupu autu i totonu o aoaoga, e pei o le Saienisi (Science), Tekonolosi (technology), Inisinia (Engineering), Arts ma le Matematika (Mathematics) – e aofia ai ma le Gagana, Siva, Ata faatino, Musika ma Visual Arts.

Sa molimauina le fa’afiafiaina o i latou uma na mafai ona auai atu i lea polokalama, e aofia ai fanau iti ma o latou matua.

Sa le gata i ta’aloga ae na mafai foi ona aofia ai ma galuega taulima, e pei o le fausiaina o pepe meata’alo ma masini, o le kukaina o taumafa Samoa.  Na iai foi nisi o gaioiga faamalosi tino aua le soifua maloloina.

O lenei po fiafia sa mafai ona tu’ufa’atasia i lalo o le vaavaaiga a le tamaitai faiaoga o Brandy Shimasaki-Barber.