Tala I VAifanua

Pago Pago - AMERIKA SAMOA

FAUTUAGA MAI I LE OFISA O TAU A AMERIKA SAMOA

E lua i le fa ni afa ua masalomia o le a agai mai i Amerika Samoa, ae peitai, e pei ona faalauiloa mai e le Ofisa o le Tau a Amerika Samoa, atonu e le o ni afa, ae ua na o ni tulaga le mautonu o le siosiomaga.

I le motu tuaoi o Samoa, o lo o ua masalomia le a’afia i ni afa se lua i le tolu, ae o le fesili, e ono a’afia ai ma Amerika Samoa?

Na saunoa mai se tasi o le aufaigaluega a le Ofisa Vaai Fetu ia Jane Allen, o lo o u’unaia lava e lo latou ofisa ia tagata o le teritori, ina ia faalogologo mai i lapataiga mai i le Ofisa o Tau lotoifale.  Ae o Samoa, e mulimuli pea latou i lapataiga mai i lo latou ofisa vaai fetu.

Ae na saunoa Allen, i se vaai atu i tala o le tau talu mai le vaiaso ua tuanai, ua tau si’isi’i le malosi o matagi.  Ae ia ki pea lau la’au ma faafofoga i fa’asalalauga i luga o le televise po o luga o upega tafailagi mo lapataiga lata mai.

O loo taumateina pea le fa’aauau o le tulaga o le tau e pei ona iai nei, seia o’o atu i le faaiuga o le vaiaso.  O lo o vaaia foi le iai o ni lologa i lenei vaiaso.  Ua iai foi ni lapataiga i galu malolosi.

FA’AFEILOAI E LE ATU KUKI IA LE KOVANA O AMERIKA SAMOA

O le aso Faraile o le vaiaso ua tuanai, Novema 3, 2023, na taunuu ai le afioga i le kovana sili, ia Lemanu P. S. Mauga ma nisi o taitai o le Pasefika, i le motu o Rarotonga mo le Fonotele lona 52 a le Pasefika, ma le fono lona 12 a Taitai o le Pasefika, lea sa amataina i le aso Gafua na sei mavae atu nei.

O le Minisita o Mataupu tau i Fafo, taitai o le Ofisa o Femalagaiga ma nisi o taitai o le malo o le Atu Kuki, na faafeiloaia le toai taunuu atu a le aumalaga.  O le saunoaga faafeiloai sa fofogaina e le sui Palemia a le Atu Kuki, ia Robert Tapaitau faapea ai ma le komesina o Niu Sila ia Kairangi Samuela.

I se fa’aaliga mai i le ofisa o le kovana, faatasi ai ma taitai o le atu Kuki, o nisi o i latou na auai i le faafeiloaiga o le afioga i le kovana sili, na aofia ai le alo o Phil Mao ma se ulugalii na gagalulue i le LBJ.

O nisi o taitai sa faimalaga faatasi ma le kovana, o lo o aofia ai le Palemia o Tonga ia Siaosi ‘Ofakivahafolau Sovaleni, o le Minisita o Fefaatauga mai Tonga, o Dr. Viliamu Uasike Latu faapea le Palemia a Tuvalu ia Kausea Natano ma le Komesina a le malo o Fiti i totonu o le atu Kuki, ia Ratu Inoke Kubuabola. 

MALAGA ATU  TALAVALU MA LE SEGAULA E MALAGA ATU MO LE SAILIGA O SO LATOU AVANOA MO LE OLIMIPEKA

O le aso Sa na sei mavae atu nei,  na faimalaga ese atu ai uluai ‘au e lua mai Amerika Samoa mo Taaloga o le Pasefika lona 17 i le atu Solomona, ona e amataina i le aso Faraile o le vaiaso nei ia ta’aloga lakapi a alii ma tamaitai, lea o le a tausinio ai le ‘au a le Talavalu ma le Segaula mai Amerika Samoa, mo le sailiga o so la avanoa i totonu o le Olimipeka.

O ta’aloga mo le Olimipeka e faia i Ausetalia, ae o ta’aloga o le Pasefika, o le a faataunuuina i le atu Solomona.

O le aso Toonai o le vaiaso ua mavae, sa faia ai se aiga faamavae a le Asosi Lakapi a Amerika Samoa, e faamanuia ai le faimalaga atu a ‘au lakapi a alii ma tamaitai a Amerika Samoa.

I lea faatasiga na faamanatu atu ai e le Peresetene o le Iuni Lakapi a Amerika Samoa, le susuga Falefata Moli Lemana, ia alii ma tamaitai ta’a’alo ua malaga atu, ina ia o latou manatua i taimi uma, o lo o avea i latou ma sui o le malo ma tagata o Amerika Samoa i na atunu’u.

Na fa’aalia e Falefata lona agaga faafetai i kamupani ma i latou uma sa mafai ona fesoasoani e ala i le faatupeina o faigamalaga faapea ma toniga a ‘au lakapi, e aofia ai ma se foai e $20,000 mai i le malo o Amerika Samoa.

TALAVALU

O le ‘au lakapi a alii, o lo o i lalo o le vaavaaiga a le alii faiaoga ia Fata Jioko Asotau ma sa ia fa’aalia lona fiafia i le tulaga o iai le ‘au, aemaise ai le faaopoopo mai o nisi o alii ta’a’alo se to’afa mai i fafo.  O lenei ‘au a le Talavalu o lo o aofia ai ni alii Fiti se toalua, o Joe ma Riko Koroiadi.  O lo la tina o se Samoa.  O Joe sa fanau i Fiti ae o lona uso laititi o Riko sa fanau i le teritori ma o le a faimalaga faatasi o ia ma le ‘au mo Ausetalia, ae fa’ato’a o faatasi Joe ma isi tama ta’a’alo mo taaloga o le Pasefika i vaiaso fou.

O isi alii ta’a’alo mai fafo, e aofia ai le au uso o Niles ma Noah Tuamoheloa, faatasi ai ma Michael Pa’aga lea e faamautu ma ta’alo i Amerika i San Francisco, faapea ma Ryan Anderson lea e malaga mai foi i Kalefonia.  O leisi alii ta’alo mai fafo, o le kapeteni o le ‘au, o Case Te Beest, lea o lo o faamautu nei i Amerika Samoa ma o lo o faigaluega i le ASPA.

Na saunoa mai le alii faiaoga ia Fata, o le a faatasitasi le ‘au lea ua faimalaga atu i Ausetalia ma seisi alo o Amerika Samoa lea o lo o faamautu nei i Niu Sila, ia Lolesio Lolesio.  

O le susuga ia Belasio Koroiadi, le tua’a o alii ta’a’alo o Riko ma Joe, lea o lo o avea ma faiaoga fesoasoani, faatasi ai ma le alii fomai o le ‘au, ia Afa Tuiletufuga.

SEGAULA

O nisi o le ‘au ta’alo a tamaitai mai Amerika Samoa, o lo o aofia ai ni tamaitai mai Tonga o lo o faamautu i Kalefonia.  O i latou ia, e aofia ai Punipuao Lealofi Skipps, Marlee Ana Garrison, Manaia Maleka  Moala, Jessie Jeanette James, Cynthia Senetenari Fonoimoana ma Bianca Claire Curtis.

E to’a 18 ‘au (alii ma tamaitai) o le a tausinio mo so latou avanoa i le Olimipeka lea o le a faataunuuina i Paris i le tausaga fou.

O ‘au o le a tauivi ma le Segaula, e aofia ai ‘au mai Fiti, le atu Kuki, Papua Niu Kini, Samoa, atu Solomona, Tonga ma Vanuatu.

O le faiaoga a le Segaula, o le susuga ia Tommy Elisara faapea ma le taitai o le ‘au ia Annie Coffin, ae o le fomai o Fiona Traill.

O le aso Sa na sei mavae atu nei, na faimalaga ese atu ai le Segaula i le 11 i le taeao, ae mulimuli atu ai le Talavalu i le 3 i le aoauli.