TALA I VAIFANUA

Pago Pago - AMERIKA SAMOA

AVEINA ATU I ATUNUU I FAFO SE GASEGASE NA MALAGA MAI I LE MELI

O le aso Faraile na sei mavae atu nei, na aveina atu ai i atunu’u i fafo le alii turisi o Dave Crocos, mo nisi suesuega faafomai, ina ua taunuu mai le meli sa malaga mai ai ma lona faletua o Jo, mai Hawaii, ae ua tulaga faaletonu sona soifua maloloina.

Ina ua taula le va’a i le vaiaso ua mavae, na faapea loa ona aveina atu Crocos i le maota gasegase i Faga’alu.  E tusa ai ma ripoti a vaega fa’asalalau, ina tu’ua e le meli ia Kalefonia i Amerika, o lo o malosi lava Crocos, ae peitai, e le i umi ae amata ona faataotolia o ia i le fiva ma tino gagase.  O lea na tonu ai i le kapeteni o le va’a, o le a afe mai i Amerika Samoa e saili ai se fesoasoani mo Crocos.

E silia ma le 2,000 turisi faapea ma le auva’a na malaga faatasi mai i lenei meli.  E pei ona sa ta’ua mai e le faatonusili o le LBJ, le susuga i le alii fomai ia Dr. Akapusi Ledua, sa taunuu mai i le aso Tofi le va’alele e aveina atu ai Crocos i Ausetalia.

SAUNI ATU LE AU SOKA A AMERIKA SAMOA MO TAALOGA O LE PASEFIKA

E ui i le tele o faigata na feagai ma le Asosi Soka a Amerika Samoa (FFAS) ae ua saunia nei ni alii ma tamaitai ta’a’alo se to’a 20, e faimalaga atu e tausinio i liki soka i Taaloga lona 17 o le Pasefika lea e faia i le atu Solomona.

I se saunoaga mai i le Faiaoga sinia a le ‘au soka a tamaitai, ia Fogalevai Tunoa Lui, o le toatele o a latou tamaitai ta’a’alo, na filifili mai lava i totonu o Amerika Samoa ma o le taimi muamua lenei o le a ‘auai atu ai i latou i ni ta’aloga fa’avaomalo.

O le taimi mulimuli na aveina atu ai se au soka a Amerika Samoa i ni ta’aloga fa’avaomalo, o le tausaga e 2019 lea na auai atu ai i Taaloga o le Pasefika, ma o le to’avalu o latou sa aofia i le ‘au i lea tausaga, ua toe filifilia i le ‘au o le a auai atu i Ta’aloga o le Pasefika o lenei tausaga.  Ona o le toatele o alo ma fanau, ua malaga atu i fafo mo galuega po o aoaoga.

Mai i le to’a 20 ua foufou atu nei mo le atu Solomona, e to’atolu i latou e 17 tausaga le matutua.  Na saunoa Lui, o le faafaigata o le mataupu, ona e le toatele nisi o alo ma fanau talavou e fiafia tele i le fa’agatama lenei o le soka.  O le toatele lava e fiafia I isi ta’aloga, e pei o le softball ma le pasiketipolo.

Faatasi ai ma le susuga ia Lui, o lo o lagolagosua iai ia Si’ulepa Grey ma le susuga Tavita Taumua.

O le ‘au soka a alii, o lo o fa’atautaia e le alii faiaoga ia Reuben Luvu, ma o le toatele o tama ta’aalo o lenei tausaga, sa auai i le ‘au ‘Under 19’ lea sa tausinio i le taamilosaga lea na faia i Tahiti ia Ianuari, faapea ta’aloga ia na faia I Fiti ia Mati.

E to’a 21 alii o le ‘au, ma o alo ma fanau uma a Amerika Samoa, seia vagana ai se alii Kolea e toatasi, o Daniel Lee, e 17 tausaga le matua.  E pei foi ona iai i le ‘au a tamaitai, na fa’aalia foi e Luvu le faanoanoaga lava e tasi i le ‘au a alii, ona e tau saili lava ni a latou tagata ta’a’alo ona o tausaga uma, e tu’ua ai e alo ma fanau o le atunu’u ia le teritori mo atunu’u i fafo.