TALA I VAIFANUA

Pago Pago - AMERIKA SAMOA

AMATA AOGA FA’APITOA MO LEOLEO O LE TOESE MA FALE PUIPUI

O le Aso Gafua, o le vaiaso lenei na fa'atautaia ai e le Matagaluega o Toese & Falepuipui lana ulua'i aoaoga - Corrections Academy - fa’apitoa mo leoleo o le toese. Sa amata lea aoga i se sauniga lotu na faia o le Aso Sa, Oketopa 22 i le Ekalesia EFKAS Pago Pago.

I se pepa o fa’amatalaga mai le Ofisa o le Kovana, o lo’o fa’ailoa ai e fa’apea, i le taimi o le sauniga a le Ekalesia, na saunoa ai le afioga i le Lutena Kovana ia Talauega E. V. Ale, ma ia fa’ailoa lana tofa mamao mo le A’oga e fa’apea, o le ulua’i a’oga lenei talu ona fa’avaeina lenei Matagaluega i lalo o le fa’atonuga ia Iuni o le tausaga na te’a nei.

Talu mai le fa'avaeina o lenei matagaluega fou a le malo, ua ave le fa'amuamua i le fa'amautinoaina o le lelei o auaunaga e tu'uina atu i le faitau aofa'i o pagota ma nu'u. O auaunaga fa'aleleia e aofia ai le fa'amaoniaina o tagata ofisa ma a'oa'oga fa'apolofesa e mana'omia mo le fa'ataunu'uina o latou tiute tau auaunaga.

O le polokalame a le Corrections Academy e fa vaiaso o le a a'oa'oina ai se vaega o le tolu-sefulu-tolu o i latou fa'ato'a fa'afaigaluegaina, fa'aauupegaina i latou i le poto, tomai, ma tulaga fa'atauaina e mana'omia e avea ai ma fa'aa'oa'oga fa'aa'oa'o i le galuega i toese ma falepuipui.

O le a ta’ita’ia lea a’oga e i latou e i ai toma’i fa’apitoa, e aofia ai le o lo’o vaaia le toese i Tafuna, Papali’i Marion Fitisemanu ma le Administrator o Punefuolemotu Aiumu, i le galulue fa’atasi ai o ni sui iloga e to’atolu a le Matagaluega o le Saogalemu Lautele: Major Pulefano Tuufuli, Major Maturo Taafua, ma Lutena Time Loia.

O le Malo o Amerika Samoa o lo'o naunau e fa'atino polokalame fa'aa'oa'oga mae'ae'a ma le fa'amoemoe o le fa'atupuina o se atunuu saogalemu ma tutusa lelei mo tagata o lo'o nonofo i Amerika Samoa, ma fa'atumauina tulaga maualuluga o tomai fa'apolofesa, amio fa'apolofesa, ma le tausiga alofa i totonu o le toese.

FAAFIAFIAGA MOSOOI, PO FA’ALE-AGANUU & TAUVAGA A’OGA MAUALULUGA

Na ausia e le Mosooi Fa’afiafiaga ia Oketopa se tumutumuga fou i le afiafi o Oketopa 21, 2023, i le ulua’i Po Fa’aleaganu’u, o se tauvaga e fa’aalia ai tu ma aga a Samoa fa’afiafia, pese, ma ta’aloga fa’aleaganu’u. 

I se pepa o fa’amatalaga mai le Ofisa o le Kovana sa fa’ailoa ai, e fitu aoga maualuluga mai le teritori na auai, ma avea ai o se afiafi e le mafaagaloina o taleni ma measina. E fitu vaega sa tausinio ai a’oga: Siva Mauluulu, Siva Sāsā, Siva Fa’ataupati, Siva Fa’aonaponei, Taupou Taualuga, Laei o le Taupou Attire, ma le Toniga

Saunoa le afioga i le Lutene Kovana ia Talauega E. V. Ale e fa’apea, o le va’aiga a le ali’i Kovana ia maua avanoa e pei o le Fa’amanatuga a le Mosooi, ina ia fa’amanatu, a’oa’o, toe fa’aola, ma fa’asaoina e tupulaga o tatou tagata le aganuu a Samoa. 

“O mea uma tatou te molimauina i nei mea tutupu o se talatuu mo le isi augatupulaga,” o se vaega lea o le saunoaga a Talauega ma ia faamalo atu i aoga ma sui auai mo a latou faafiafiaga mataina, ma momoli atu lona agaga faafetai mo lo latou tuuto. 

O se fa’alauiloa fa’apitoa sa tuuina atu i le fa’alapotopotoga a le Agency for Better Living Endeavors (ABLE) mo a latou taumafaiga uma. Saunoa ia Talauega e fa’amalosia ai fo’i le aufaipisinisi ma fa’alapotopotoga, ina ia auai i le talimalo ma le lagolagoina o fa’afiafiaga a le Mosooi i le tausaga fou.

O fa'ai'uga o le tauvaga e fa'apea: Tulaga 1: Leone High School, manumalo fo'i i vaega uma e fitu o le tauvaga; Tulaga 2: Nuuuli Vocational Tech; A’oga Maualuga Tulaga tolu: Samoan High School

O lenei fa’afiafiaga fa’ale-aganu’u na mafai ona fa’ataunu’uina e ala i taumafaiga fa’atasi a le ABLE, i le galulue fa’atasi ai o le Ofisa o le Kovana o Amerika Samoa ma le vaega o le Humanities Council a Amerika

Samoa.  O Fa'afiafiaga a Mosooi mo Oketopa o le a fa'ai'u i le Tausala Sikolasipi a Miss Mosooi i le Aso To'ona'i, Oketopa 28, 2023.