TALA I VAIFANUA

Pago Pago - AMERIKA SAMOA

FAATAUTOINA LE AFIOGA POUMELE PETE POUMELE GALEAI E AVEA MA SENATOA MO LE ITUMALO MANU’A #1

O le aso Faraile o le vaiaso ua tuanai, Setema 8, 2023, sa faatautoina ai le afioga Poumele Pete Poumele Galeai e avea ma Senatoa mo le itumalo palota a Manu’a #1, ina ua tu’umalo le afioga Senatoa Tauiliili Paopao Lauifi ia Iulai.

Sa faamaonia e le afioga Senatoa Togiola T.A. Tulafono, le taitaifono o le komiti o Tulafono a le Maota Maualuga ia le taunuu mai o le tusi mai i le Ofisa o Mataupu tau Samoa, e faamaonia ai le filifilia o le afioga Poumele e Tamalii ma Failauga o Faleasao, Ta’u ma Fitiuta, e avea ma o latou sui i totonu o le Maota o le Senate. 

I le avea ai nei o ia ma Senatoa, ua tu’ua ai e le afioga Poumele lana tautua i totonu o le Matagaluega e mataituina manaoga ma auaunaga mo i latou e afaina le malosi faaletino (VocRehab).

O le afioga Poumele, e faamautu o ia i Tafuna ma le faletua ia Dr. Claire Poumele ma nai o la alo e to’afa ma fanau a fanau e 16.  O le faletua ia Dr. Claire Poumele, o se tagata ua loa lana tautua i totonu o le Ofisa o Aoga.

FAAMANATU 9/11 E ALA I SISI FAAVAELOTO O TAGAVAI O LE MALO

O le aso ananafi na faamanatuina ai le 22 tausaga talu ona osofaia e tagata faatupu faalavelave ia le laumua o Fefaatauaiga a le Malo, i le setete o Niu Ioka i Amerika, faapea le ofisa autu o vaega’au a Amerika atoa ai ma le vaalele a Amerika #93 lea na pa’u i Pennsylvania,  ma sa faapea ona auai faatasi le malo o Amerika Samoa i le faamanatuina o lea aso pagatia, e ala i le sisi ina faavaeloto o tagavai a le malo, i lalo o se faatonuga mai i le afioga i le Kovana Sili ia Lemanu P. S. Mauga.

Na aofia i le saunoaga fa’aaloalo a le afioga i le kovana sili, le manatuaina o i latou uma sa maliliu ia Setema 11, 2001 ma ia fa’aalia lona agaga faafetai i le Atua ona o Ana faamanuiaga ma Lana puipuiga i luga o Amerika Samoa.

TALITONU KRUSE E LE O FAATAUAINA E LE FAIGAMALO OFISA LOIA MO LE MAMALU LAUTELE

 I sana tusi na tusia i le aso 15 o Iuni, sa faailoa atu ai e le susuga i le Faamasino Sili ia Michael Kruse, i le Kovana, se faafitauli tele e ono tulai mai i totonu o le Faigamalo ona o le tulaga o lo o tupu nei i totonu o le Ofisa Loia mo tagata lautele (OPD).  Ma i le masina o Aukuso sa faapea ona toe faaooina atu ai se tusi lona lua a le Faamasino Sili i le Kovana, e uiga i le tulaga pagatia ua o’o iai le ofisa a le OPD.  (Tagai i le lomiga a le Samoa News ia Setema 7 e tusa ai ma le tusi lona lua faapea le tali mai a le Faigamalo.)

E ui ina o lenei ofisa sa faavaeina faaletulafono o se ofisa tutoatasi a le Faigamalo, ae peitai, o le taimi nei, e leai ni loia o galulue ai seia vagana ai le Loia mot agata lautele, e pei ona ta’ua e Kruse i lana tusi ia Iuni lea na fa’aooina atu i le afioga Lemanu P.S. Mauga.

Na toe faamanatu atu e Kruse i le kovana, o le tiute autu o lenei ofisa, e fesoasoani ai i tagata lima vaivai i tulaga o le tulafono, ina ia mafai ona puipuia ai o latou aia tatau ma avea ma faufautua mo i latou i taimi o faamasinoga. 

Na ta’ua e Kruse le le mafai ona faataunuuina o le tele o faamasinoga ona o le leai o ni loia a le OPD, aemaise ai le gasegase o le Loia mot agata lautele.  Ma o le toatele o i latou ua faakalenaina a latou faamasinoga, ua o’o atu i le tausaga e 2033.

Na ta’ua e Kruse, talu lava ona tatalaina lenei ofisa loia i le 1977, sa leai se faaletonu o ana tagata faigaluega faapea ma masini e faatino ai le galuega.  Ae peitai, i le aluma’i o tausaga, ua va’aia lava le tulaga faaletonu o lenei ofisa.

Ma na ta’ua e Kruse, i sona talitonuga ua mafua lea tulaga ona o le faatulagaga o tulafono a faigamalo ua mavae atu, e foliga mai sa le i ave le faamuamua i lea ofisa.  Lea ua mafua ai ona i’u lava ina leai ni loia, tagata faigaluega faapea masini e faatino ai le galuega.

Na ta’ua foi e Kruse lona molimauina o le tele o loia sa ia faatautoina mo lenei ofisa, ae le umi ae toe o ese, ae le gata i lea o le tele o nofoa, laulau, kesi, masini, taavale ma isi mea e manaomia e lenei ofisa, o lo o la’u atu mai i le fale faamasino.

Na fa’aalia e Kruse, e o’o mai lava i le aso, o lo o fa’aauau pea ona la’u atu i le Faamasinoga Maualuga ia sapalai a le OPD, e pei o pepa e fai ai kopi ma toners mo masini kopi.  Ma I sona silafia, o le mafuaaga lea ua tele ina toe fo’i ai loia lea e aumai mai atunu’u i fafo e galulue i lea ofisa, ona o le leai o ni sapalai po o se paketi mo lea ofisa.