TALA I VAIFANUA

Pago Pago - AMERIKA SAMOA

MAUA SE TINO MALIU I LE MAKETI I FAGATOGO

O le taeao o le Aso Toonai na se’i mavae atu nei, na maua ai se tino maliu o se tama matua pe a ma le 20 iata le mamao mai i le maketi i Fagatogo.

Sa faamatala e se tamaitai na usu atu i le maketi e faatulaga a latou  masini aua le polokalama faaEvagelia a le latou Ekalesia lea e masani ona faia i taeao o Aso Toonai i le maketi, ia lona vaaia o leoleo ma se taavale a le falemai i le mea o iai le auala laupapa lea e i tafatafa o le maketi.

Sa ta’ua e faapea, i se faamatalaga a se tasi na iai i le maketi, na agai atu ai loa leoleo i le nofoaga o taula ai va’a, ma aveina ai se tagata o lo o masalomia i le maliu o lenei tama matua.  Sa faamatala foi e se tasi o faifaatoaga na iai i le maketi, o le alii lea ua ave e leoleo, o le toalua o le fafine lea e tausia le tama matua lea ua maliu. Ma sa nonofo faatasi le toeaina ua maliu ma le ulugalii lea ma e masani ona alu le alii lea ua iai nei i aao o leoleo, e fagota.

O lo o iai se talitonuga, ua mafua ona maliu lenei tama matua, ona o sauaga i totonu o aiga.

Sa faamatalaina foi e se tasi o molimau o le taeao o le Aso Toonai, sa iai sona manatu o le a taofia e leoleo ia le polokalama faaEvagelia a le ekalesia lea na sauni i lena taeao, ae peitai, sa na o le nofoaga lava na maua ai le tino maliu sa puipuia e leoleo.

TAPUNIA LESITALA MO LE PALOTA FAAPITOA

O le Aso Gafua na sei mavae atu nei, na tapunia ai lesitala mo i latou o lo o fia palota i le Palota Faapitoa mo le itumalo palota #1 i Manu’a, lea ua fuafua mo le aso 12 o Setema.

Ma e tusa ai ma tulaga o tulafono palota, ua tatau nei ona iai se lisi fou o tagata palota ua maea ona lesitala ma e ao ona faaooina atu lenei lisi i sui tauva.

O le aso ananafi na amataina ai palotaga ‘absentee’ mo tagata palota e le atoatoa le malosi o le tino ma le mafaufau, ma i latou uma o le a mafai ona o’o atu i nofoaga palota.

MAE’A VASEGA GAGANA SAMOA MO FAIAOGA

O le aso Gafua o le vaiaso ua tuanai na faamaeaina ai se vasega tusitala i le gagana Samoa (Sam 291) i le Kolisi Tuufaatasi a Amerika Samoa (ASCC) mo faiaoga uma o le teritori.

O lenei polokalama o lo o mataituina e le Ofisa o Aoaoga Samoa (SSI) i totonu o le ASCC aua tusi pasi mo faiaoga a le teritori.  Ma o lenei polokalama sa faatulagaina e le Ofisa o le Kovana, le ASCC, le Ofisa o Aoga a le teritori faapea ma le SSI.

Ae e le i ausia e faiaoga le avanoa e auai ai i lenei polokalama mo a latou tusi pasi, sa muamua ona o latou sueina i se suega e auiliili ai le loloto o la latou gagana Samoa.  O le faamoemoega o lenei polokalama, ina ia mafai ona faatulai mai ni faiaoga agavaa i le gagana Samoa ina ia mafai ona o latou aoaoina le gagana ma le aganuu Samoa i totonu o aoga a le teritori.

O le SSI o lo o i lalo o le vaavaaiga a lona Faaatonusili, le tamaitai o Aiono Okenaisa Fauolo-Manila ma lana au ofisa.

Na fa’asoa mai e se tasi o faiaoga sa auai i lenei polokalama, o Sia’a Alama, o lenei polokalama po o nei vasega, e aofia ai ma le asia o tusitala a le teritori, ma faasoa e tusa ai ma a latou tiute ma galuega i totonu o le teritori.  Sa mafai foi ona o latou maua le avanoa, e asiasi atu ai i le malo tuaoi o Samoa e fa’aauau ai a latou suesuega.