TALA I VAIFANUA

Pago Pago - AMERIKA SAMOA

FAUTUAINA AMERIKA SAMOA E NOFO UTA MO VA’A ESE I GATAIFALE O AMERIKA SAMOA

Ae e le i alo atu Amerika Samoa i le faamanatuga o le Aso Sa o Tama, na tu’uina mai e le Ofisa o lo o mataituina le saogalemu o Gataifale ma le Lotoifale o Amerika Samoa (DHS), se fa’aaliga taua, i le Aso Faraile, Iuni 16, 2023, ina ia nofo uta le mamalu o le atunuu ma ia faafesootai atu lo latou ofisa, pe a vaaia ni va’a ese, po o ni va’a e le masani ai tagata o le atunu’u, i gataifale o Amerika Samoa atoa, e aofia ai Tutuila, Aunuu ma Manu’a.

Ua ta’ua i lea fa’aaliga taua, o lenei taumafaiga ina ia faamautuina le saogalemu, e le gata o le gataifale, ae faapea le atunuu ma ona tagatanuu.

E le gata i lea, o lo o ta’ua foi i totonu o lea fa’aaliga le iai o se tiutetauave i tagata o le atunuu ina ia tausia ma puipuia ona lotoifale.  O lo o faapea ona uunaia tagata uma o Amerika Samoa, e aofia ma au faifaiva, o pule o vaa fagota ma so’o lava se tasi e na te vaaia ni vaa ese po o va’a e masalomia ni gaioiga, i o latou gataifale.

Ua tu’una mai le numera telefoni o le 699-3800 ina ia faafesootai vave atu ai ia tulaga uma.

FOAI ALOFA A ALII LAKAPI MO LE ‘HOPE HOUSE’

O le aso Lua o le vaiaso ua mavae sa faapea ona asiasi atu ai le susuga Etuale Manusamoa Tuilagi, o se tasi o alo o Samoa ua tautaua i le fa’agatama o le Lakapi, e tauaaoina atu se meaalofa mai lona aiga, e aofia ai nisi o ona uso matutua lea foi e lauiloa i le lakapi, mo tama ma tina matutua o lo o tausi i le Fatu-O-Aiga, e ala i se meaalofa tupe e $10,000.

O le susuga Frances J. Saelua-Togia, le Tausimai Pasi o lo o galue i le Hope House ma le susuga Epikopo Kolio Tumanuvao Etuale, le Fa’aao o le Ekalesia Samoa i Pago, sa talia ma le agaga faafetai ona o lenei foai alofa mai ia Manu ma Antere’a Tuilagi, faatasi ma lo latou ‘uncle’, le susuga Ilalio Mulipola, ona o lo o i atunuu i fafo le Pulesili o le ofisa a le Fatu-O-Aiga, ia Toleafoa Kathryn McCutchan ma le Taitaifono a le Komiti Faafoe, le susuga i le Faipule ia Larry Sanitoa.  Ae na faalauiloa mai lo la agaga faafetai i le aiga Sa Tuilagi.