TALA I VAIFANUA

Pago Pago - AMERIKA SAMOA

E LE I SAUNIA MALAEVAALELE I FAGALII MO FEMALAGAIGA A VAALELE

E ui ua toe tatala aloaia le malae vaalele i Fagalii mo femalagaiga a vaalele i le va o Samoa e lua, ua ripotia mai le le’i saunia lelei o le malae vaalele mo faigamalaga a vaalele ona o tulaga faaletonu i le malae e tu laueleele ai vaalele.

E pei ona sa fa’ailoa mai e le pulega a le Talofa Airways, o le a tele se tupe o le a fa’aaluina e faaleleia ai a latou vaalele, ona o le tulaga faaletonu o le malae e tu laueleele ai vaalele.  Na saunoa le susuga Toleafoa Jeffrey Hunt, sa iai sona manatu o le a toe faalelei atoa le malae e tu laueleele ai vaalele.  Na ia ta’ua e faapea, e mafai ona fa’aaoga i le taimi nei, ae peitai, o le a tele se tupe o le a fa’aaluina e le latou ofisa vaalele, e lipea ai vaalele ona o le tulaga faaletonu o le malae vaalele i le taimi nei.

Na faaluaina e le susuga Maiava Peni, le pailate sinia a le Samoa Airways ia le manatu a Toleafoa ma ia ta’ua le tele o nisi tulaga e ao ona faaleleia ina ia mafai ona saogalemu ai femalagaiga i le va o Fagalii ma le malae vaalele i Tafuna.

Na ta’ua e Maiava e faapea, e faamuamua lava e lo latou ofisa vaalele ia le saogalemu o le mamalu o le atunu’u ma o nisi o tulaga e ao ona faaleleia, o fa’i ia e tu lata i tafatafa o le malae vaalele faapea le pou moli lea o lo o faalavelave i taimi e aga’i mai ai vaalele e tu laueleele.

Na ta’ua i totonu o se pepa o faamatalaga mai i le malo o Samooa, e faapea, e $2.6 miliona tupe Samoa sa fa’aaluina e toe tatalaina ai le malae vaalele i Fagalii.

E tolu vaalele a le Samoa Airways o lo o tautuaina le mamalu o le atunuu i faigamalaga i le va o Samoa ma Amerika Samoa, ma e ta’i 19 +1 e feaveai ai, ae o le Talofa Airways e ta’i 9+1, faapea ma uta a pasese femalagai.

I le sauniga sa toe tatalaina ai le malae vaalele i Fagalii, i le amataga o le vaiaso, na saunoa ai le susuga Olo Afoa Fiti Vaai, le Minisita o Galuega ma Auala lotoifale, ua mae’a ona faaleleia atili le malae vaalele ma ua ausia le leleia faatulagaina mo malae vaalele.

MOLIA ALOFA HOSEA I LE FAAOOLIMA I LE PULE O SE FALETALIMALO

O le Aso Lulu, Me 31, 2023, na tula’i ai le alii o Alofa Hosea i luma o le faamasinoga e tali i ona moliaga, o lona faaoolima lea i le pule o se faletalimalo.

E tusa ai ma faamaumauga a le faamasinoga, o lenei faalavelave na tula’i mai i le vaveao o le aso 16 o Iulai, 2022.  Na ta’ua e faapea, na faafeso’ota’i e le pule o le faletalimalo ia le Ofisa a Leoleo i Tafuna ma fa’ailoa atu le faaoolima atu o se tasi o alii o lo o nofo i lona faletalimalo.

Ina ua taunu’u atu leoleo, sa feiloai ai ma le tama e 59 tausaga, lea e ana le faletalimalo, ma sa faamatalaina e lenei tama le faia o se pati i totonu o nisi o potu o lona faletalimalo ma ina ua amata ona faateteleina le pisapisao o le pati, sa ia aga’i atu loa iai, e talosagaina le toe tuutuu i lalo o le leo o le pati.

Ae peitai, sa faaumu le alii o Hosea ma o lo o masalomia le taina e Hosea o le ulu o le pule o le faletalimalo i le tapuni o le ‘cooler’.  Ma o lo o ta’ua foi i ripoti a le faamasinoga, le vaaia e le pule o le faletalimalo, le u’uina e Hosea o se fagu pia, ma ia tata’eina i tafatafa o lona vae tauagavale ma na vaaia ai e le pule o le faletalimalo le manu’a o lona vae taumatau.

Ina fai atu le pule o le faletalimalo o le a ia valaauina leoleo, sa faapea loa ona sola ese Hosea mai i le faletalimalo.  O se taimi mulimuli ane, na ia toe fo’i atu ai ma na toe valaau ai le pule o le faletalimalo i leoleo ma faailoa iai o lea ua toe fo’i atu Hosea, na toe aga’i atu ai loa leoleo ma taumafai e ave o ia e faatalanoa, ae peitai, sa tete’e le alii o Hosea i le taumafaiga a leoleo.

O lo o ua molia Hosea i tuuaiga o le faaoolima ma e $800 le tupe faatulagaina e mafai ona tatalaina ai o ia i tua.

MOLIA SE ALII I LE AVETA’AVALE ONA MA LE FAAFEFEINA O LONA TOALUA MA LANA FANAU

O le Aso Lulu, Me 31, 2023, na tulai ai Pepa Kakau Latu, i luma o le faamasinoga e tali i ona moliaga o le faatupu vevesi, faia o uiga tau faamata’u faapea le aveta’avale ae o lo o fa’asuaava.

Ua ta’ua i se ripoti a le faamasinoga e faapea, o le vaveao o le aso 10 o Iulai, 2022, na valaau atu ai se tina i le ofisa leoleo i Tafuna e molia sona toalua ua mae’a ona o la tete’a, na alu atu i lona aiga i Aoloau ma faia ni uiga tau faamata’u ona o lona mana’o e vaai i lana fanau.

Ina ua taunuu atu leoleo i luma o le falesa Katoliko i Aoloau, na o latou fetaui ai ma se taavale na toeititi so’aina le taavale a leoleo.  O lea na toe lilium ai ai leoleo ma tuliloaina lea taavale.  Ina ua faatu e leoleo le taavale, na vaaia le oso i fafo o le avetaavale ma taumafai e su’e se mea i lalo o le pa’u pito i luma o le taavale.

Ina ua tapa e leoleo se pepa faamaonia (ID) a le avetaavale, na ia tali mai, o lona igoa o Pepa Latu ae e leai sana ID.  Na lagonaina e leoleo le manogi faasuaava o le alii ma sa vaaia foi se apa pia e le i tatalaina i luga o nofoa pito i luma o le taavale.

Na faafesootai e leoleo le tina na valaauina le ofisa o leoleo ma fesiligia po o fea lona to’alua tete’a, ae na tali le tina, ua aluese atu i se taavale, ma ia tuuina mai i leoleo le numera o le laisene o le taavale.

Sa faataunuuina se suega a le avetaavale, ma sa fa’amautu ai lona fa’asuaava.  Ma na iloa ai foi e leoleo, i a latou suesuega, le solia e Latu o sona faasalaga, ina ia aua ne’i taumafai e faafeso’ota’i le tina o le aiga ma lana fanau.

Ua mae’a ona totogi e Latu le $500 e tatalaina ai o ia i tua.