TALA I VAIFANUA

Pago Pago - AMERIKA SAMOA

SUESUE A LE TAO TOTOGI FAAOPOOPO MO AUFAIGALUEGA  A LE DOH I VAITAIMI O LE KOVITI

E lua ni mataupu sa faatula’i e le Ofisa Suetusi a le Teritori (TAO) i la latou ripoti, e faasaga i le aufaigaluega a le Ofisa o le Soifua Maloloina (DOH), e aofia ai totogi faaopoopo po o ponesi, faapea ma le taua o le aoaoina lelei o tagata faigaluega.  O lo o feagai nei le TAO ma suesuega i le faaaogaina e le DOH o le silia ma le $14 miliona tupe feterale (CARES Act) lea sa mauaina mai i le vaitaimi o le Koviti 19.

O nei mataupu o lo o faamaumauina i lalo o se vaega o le ripoti a le TAO, ua fa’aautuina “ISI FAAMATALAGA” ma ua aofia i le ripoti a le Samoa News, ona o nisi o atugaluga na faasoa mai e nisi o sui faitulafono sa o latou faitauina le ripoti a le TAO, e uiga i ponesi ma totogi faaopoopo na maua e le aufaigaluega a le DOH – ona e foliga mai e pei ona ta’ua i totonu o le ripoti a le TAO – sa faatupeina i vaegatupe lotoifale.

Na ta’ua e le TAO, i le latou suesuega sa o latou maua ai nisi o totogi faaopoopo po o ponesi i le ‘payroll’ ma o nisi o nei ponesi sa aumai mai vaega tupe lotoifale a le Malo o Amerika Samoa.

Na ta’ua e le TAO i le latou ripoti, e moni o se galuega fita na feagai ma tagata faigaluega a le DOH i le vaitaimi o le koviti ma ua alagatatau ona maua so latou taui ona o la latou tautua.  Ae peitai, ua mae’a ona totogi le aufaigaluega e pei ona faatulagaina, ma o lea, ua le alagatatau ona fa’aaogaina tupe a le malo e toe totogi faalua ai le aufaigaluega.

O lo o taofi le TAO, o totogi faaopoopo po o ponesi, e maua pe a faatulagaina se sini autu, po o se faatinoga sili atu, e tatau ona ausia ma ua mafai ona ausia e le aufaigaluega.

I le tulaga i aoaoga a tagata faigaluega, ua talitonu le TAO, e taua tele nei aoaoga, ona o se avanoa lelei e faatuputupu ai le atamai ma le faaleleia atili o le faatinoga o tiute ma galuega.  Ma o le tele o vaega ua o latou tau ai i a latou suesuega, ua faailoa ai le manaomia tele o aoaoga mo le aufaigaluega.

Ua fa’aalia le talia ma le ioeina e le pulega a le DOH o faaiuga o suesuega a le TAO.

AOFIA LAFOGA MALAE VAALELE I PASESE SAMOA AIRWAYS

Ua aofia nei i totonu o le pasese totogi mo faigmalaga a le ofisa vaalele a le malo o Samoa, le Samoa Airways, ia le lafoga lea e masani ona totogi i le malae vaalele mo faigamalaga i le va o Apia ma Tutuila, e $65WST.

Ae o lo o galue nei le ofisa vaalele tutoatasi a le Talofa Airways ina ia mafai ona faia foi lea tulaga, o le aofia i totonu o pasese totogi a le mamalu femalagai, ia lea lava lafoga.

I se faamatalaga tusia mai le susuga Fainu’ulelei Falefatu Ala’ilima-Utu, le Loia Sili a Amerika Samoa, na ia faalauiloa e faapea, o se vaega lenei o mataupu na soalaupuleina i le fonotaga faavaomalo a Amerika Samoa ma Samoa Tuto’atasi, ina ia le toe totogia lea lafoga i le malae vaalele, ae o le a aofia i totonu o pasese totogi a ofisa vaalele. 

FILIFILIA SE FAIAOGA SAIENISI A AMERIKA SAMOA MO MAULUGA I LE MOANA SAUSAU

Ua filifilia le tamaitai faiaoga faa Saienisi, o Anneliese Haleck, e auai i ni suesuega faa Saienisi a se faalapotopotoga o le ‘2023 Science Communication Fellow’ ma o le a maua ai sona avanoa e folau faatasi i luga o le va’a o le E/V Nautilus, ma o le a mafai ona matamata le mamalu lautele i a latou gaioiga o le faataunuuina.

E fa vaiaso o le a auai atu ai Haleck i suesuega faasaienisi i luga o le E/V Nautilus, i le va o le masina o Me ma Iuni.  Ma o le o’o atu a latou suesuega i le ogatotonu o ogasami o le Pasefika.  Ma o lenei polokalama, o se vaega o mataupu aoaoina a fanau aoga, e aofia ai mataupu faaSaienisi, Tekonolosi, Inisinia, Atisi ma le Matematika (STEAM).

E to’a 16 i latou o le a auai i lenei polokalama mai i aoga eseese, o ofisa faasaienisi ma nisi o faalapotopotoga mai i Setete e 11 o Amerika faapea ma Teritori.  

Na fa’aalia e Haleck lona agaga fiafia ma le naunauta’i e avea ma se vaega o i latou o le a folau atu mo suesuega faasaineisi, i mea o le a mafai ona ia aoaoina mai ai, ina ia mafai ona toe fo’i mai ma aoaoina atu i fanau aoga a le teritori.

O Anneliese Haleck o lo o avea nei ma faiaoga i le aoga maualuga a Samoana.  Sa faauuina mai o ia i le aoga maualuga a Tafuna ma le Kolisi Tuufaatasi a Amerika Samoa (ASCC), faapea ma le Iunivesite a Hawaii i Hilo.

MOLIA SE TAMALOA SAMOA I NEVADA I LE GAOIA O MASINI A LE MILITERI

Ua molia nei e le malo feterala ia le alii o Tamilo Pale Fe’a, po o “T”, e 60 tausaga le matua, i lona gaoia o ni masini a le militeri e silia ma le $800,000 lona tau ma o lo o te’ena e Fe’a nei moliaga.

O Fe’a o se alii Samoa e faamautu i le setete o Nevada, i le aai o Sparks ma o le aso 23 o Mati na faamae’aina ai suesuega ma molia ai o ia e le malo feterale.

O lo o ta’ua i moliaga a Fe’a lona faia o lenei solitulafono, o le gaoia o masini ma loli tetele a le militeri, ia Novema 1, 2021 seia o’o mai ia Tesema 31, 2021.  O lo o ta’ua i ona moliaga e faapea, i le va o Setema 2020 ma Aukuso 2021, na fa’aaoga ai e Fe’a se ‘credit card’ a le malo, mo ana faatauga, ma o nei faatauga, e pe a ma le $2,730.02 lona faitau aofa’i.

O le aso 8 o le masina lenei o Me, na tulai ai Fe’a i luma o le faamasinoga feterale ma ia tete’eina nei moliaga faasaga ia te ia.  O le aso 6 o Iuni na fuafua e amata ai le faamasinoga o le ua molia, ae peitai, i le amataga o le vaiaso nei, na talosagaina ai e Fe’a le toe tolopoina o lona faamasinoga ia Fepuari o le tausaga fou.

Afai ae faamaonia ona moliaga, e mafai ona faasalaina le ua molia i le 10 tausaga i le falepuipui mo le gaoia o mea totino a le malo, ma le 15 tausaga i le falepuipui mo le fa’aaogaina o masini taufa’asese.