TALA I VAIFANUA

Pago Pago - AMERIKA SAMOA

SIOTI VAI PENISINI “AMOXICILIN” FANAU LAITI 

Ua fa’ailoa e le vasega o Foma’i Tiute i talavai a le fanauiti o lo’o ua sioti nei le sapalai o vaila’au penisini “amoxicilin” a le fanau iti lea e matele ina fa’aaogaina pe a i ai ni o latou gasegase e inifeti ai o latou tino, gutu ma taliga. 

Ua matauina e matua o le ituaivga vaila’au lea e ao lava ina atoa lelei le 10 aso o inumia pea e le fanau ina ia matua mama le fa’aletonu sa taumafai ona togafitia ai le fanau.

Ina ua toatele lava ua latou fesiligia lea tulaga, ua faia fo’i le faasalalauga fa’alaua’itele a le Falema’i ina ia mafai ona tima’ia matua ma tagata lautele uma i le atunuu ona o lea fa’aletonu o alia’i mai, ae leai se mea e fa’apopoleina ai le atunuu, o lo’o i ai lava isi vai ua mafai ona togafitia ai gasegase o le fanau.

“O le taimi nei e le na’o le teritori o lo ua sioti ai le sapalai o le Amoxicilin ua fa’apea lava lea sapalai i le vaitau lenei ua fa’ato’a mae’a le tau togafitiga o le Covid-19 RSV ma le Influenza. E ui la ina e le o fa’aaogaina le Amoxicillin i le togafitiga sa’o o nei gasegase ae o lo’o fa’aaogaina pe a i ai nisi auga fou e alia’i mai i e na a’afia.”

Ua fa’aloa e le fa’asalalauga a le falema’i, “O lo’o ua i ai isi vaila’au penisini e mafai ona fa’aaogaina ona o lea ua sioti mai le Amoxicillin i le taimi nei, ina ia taofia ai le inifeti o manu’a ma mea e tutupu mai i totonu o gutu o le fanauiti.”

Na mua’i lipotia fo’i e le tatou nusipepa nei le tulaga fa’aititia o vai uma e togafitia ai gasegase o fanauiti i le faletalavai o le LBJ ma ua gasolo matua e saili i isi faletalavai ituaiga o vaila’au nei e moomia mo le togafitiga o fanauiti.

Ua fa’ailoa e nisi foma’i, “O lo ua i ai isi vaila’au e mafai ona fa’aaogaina, peita’i e eseese ma le ituaiga o vaila’au lea ua masani ai tino o tagata lautele, e ono i ai nisi a’afiaga e alia’i mai ma mafua mai fo’i i le suiga o vala’au e togafitia ai le fanauiti. O se mea faigata la lena ona toe tineia.” Ua le manatu foma’i ina ia fa’ailoa mai o i latou, ae o se mea moni ua fa’aalia.

Ona e le o fa’aititia lava le sapalai o fuala’ai Amoxicillin mo tagata matutua, ua tau le afaina tele lava la i le mamalu lautele le sioti lea e i ai nei.

Fa’ailoa e le falema’i, “O vaega nei e lua o lo’o taumafai lava ona galulue fa’atasi. O le vaega o le iloa lelei ma le suesueina o gasegase o lo’o pagatia ai le atunuu, ae o le isi ona itu taua, poo le a le togafitiga tonu e tatau lava ona fa’aaoga e tineia ai le gasegase mai ua maua ai so’o se tasi, fanauiti poo tagata matutua ma talavou. Afai fo’i ae umi tele ona fa’aaogaina le vaila’au e tasi i le tagata gasegase tumau, ua fa’apena fo’i ona tau le toe aoga ai lenei fuala’au i lona togafitiga.”

Ua talosaga le falema’i i le mamalu o le atunu’u ia lava mai pea le onosa’i, o lo’o galulue pea i latou i lenei mataupu.

SAOFA’I - ALO O AMERIKA SAMOA I AIGA I SAMOA

Mai le aiga sa Tuioti i Falelima i Savaii ua latou filifili le alo e fa’asino ia Sina ma King Talamoni mai Aua, o le susuga fo’i le Faife’au Fesoasoani EFKAS i Aua, le Toa Samoa o lo’o galue mo le USAir Force, Tech. Sgt Risenn Taulfoga Liufau Talamoni.

Ua fa’asuafaina nei ina ua mae’a lana saofai sa fa’atino lea ia Tesema 18, i le maota o Tautaisau, i le malae o Siusava i Falelima lava i Savaii. “O le taumafaiga a aiga ina ia mataituina ni ta’ita’i lelei ae a le savaliga a Aiga i le lumana’i aua ua tatou silafia lelei lava, e le o toe faigofie e pei ona masani ai i tatou, ae ua moomia lava ona silasila toto’a i tatou uma i agava’a e tatau ona faafoea ai le malaga a aiga i le lumana’i. O i latou nei ua tua i ai aiga i lo latou tomai faaonaponei, ae maise e ao lava ina mau le toovae, i le tuana’i,” o se tala mai lea a si ona tua’a mai Aua, le susuga le Faife’au Fesoasoani King Talamoni e tusa o le fa’amoemoe o i ai aiga e malu paolo i ai, Falelima i Salafai.

Maua le avanoa mo se manatu o le susuga Tuioti Taulafoga Risenn, i le fa’aea ua toina mo ia, “O le mea lava lenei sa fa’anaunau i ai matua, afai fo’i ua pale i latou i suafa o Aiga, ae ua mafai e i matou o latou fanau ona fa’aau se auaunaga e aia i suafa o Aiga, e pele ma auau i ai latou mea e fai mo le pa’ia o aiga. Ina ua vala’auina, ua fai lava le mea e tatau ma le tofi o i ai fo’i i tautua fa’alemalo, Tu i luga ma amo le fana!”

“Pe ua agava’a pe leai, e fa’amoemoe i le Agaga o le Atua e foa’i upu i le gutu o le atalii vaivai, ia fa’agaganaina e le Atua fetalai ina ia mafai ona fa’ataunuu mana’oga tupito o aiga. O le tauavea fo’i o se tofiga fa’apea e le faigofie. Ua vave lava ona tapui e matua le olaga i le iloa ona tausi aiga, tausi matua, ia fai fa’alavelave ma saoga o mea fa’aleaiga, lea la ua tali mai le isi itu o lena auaunaga tele. E ui ina nonofo ma fa’amautu i le aiga o le Tama o le aiga, ae o le aiga o le tina e fai lava fo’i si faigata. E fasilua lava la i mea uma, ae a oo fo’i ina tali mai e fa’aluaina fo’i ona manuia.”

O lo ua atoa nei le 15 tausaga o le tautua a Tech. Sgt. Talamoni, Risenn i le USAir Force. Sa fa’ai’u mai ana a’oa’oga i le Laumoa o le Toa mai Tafuna ma sa malaga sa’o atu ai lava i le USAir Force ina ua mae’a lana a’oga maualuga.