TALA I VAIFANUA

Pago Pago - AMERIKA SAMOA

FA’AGAOIOIA KAMUPANI SOLAR FOU - MALOSI LIMITED LIABILITY LLC [MLL]

O le Kamipani Fou e latou te gaosia maia le eletise mai ave malolosi o le La, le Malosi Limited Liability Company (LLC), ua amatalia nei ona tapena a latou nofoaga o Panele ina ia mafai ona latou fa’auia mai le 20Mekauati o le malosi’aga fa’aeletise ina ia fa’aaogaina e Amerika Samoa.

O le ali’i faipisinisi o Daniel Myung, o se faipisinisi Korea ae ua mae’a aoaoina ma avea ma Sitiseni o Amerika, ma ua fa’afaigofie ai a’ia’iga e tatau ona agava’a ai so’o se fa’apisinisi e ao ina laisene e tautuaina le mamalu lautele o le teritori. 

O le folasaga a Myung sa mua’i fa’atautaia lea i le ulua’i fonotaga a le Kovana ma lana Kapeneta i le ulua’i aso Lua o le tausaga 2023.

Sa auai le Pule Sili o le ASPA, Wallon Young, i lea foi fonotaga e fa’ailoa ai le auai fo’i o lona finagalo i le tautua o le a fesoasoani malosi i le ASPA mai e le Malosi Limited Liability mo le sapalai o le eletise i le atunuu.

Na mua’i oo mai Daniel Myung i le atunuu, o se aumalaga a le aufaipisinisi Korea e asia le atunuu, e fia va’ai ma mata’i ni ala o tautua fa’apisinisi e mafai ona fa’atautaia e i latou i le teritori. Na oo mai lea aumalaga i Amerika Samoa ia Novema 2022.

Ua fa’ailoa e Young o le ASPA, “Ua i ai nei nisi o le aufaigaluega a le Malosi Limited Liability i le teritory e taenaina galuega amata o le fa’ato’aga o Panele mo le mitia o ave malolosi o le La, lea ua fa’ailoa mai e fa’atula’ia lea i Vaiala Pavaiai, o se eleele tau le Aiga Sa Tuna’itau”.

Ua fa’ailoa mai fo’i e Myung, e fa isi nofoaga ia o lo’o ua taga’i toto’a i ai le Malosi LLC, ina ne’i te’i ua moomia atili se isi fa’aopoopoga o Panele, e muamua fo’i ona sailiilia toto’a eleele e lava ma umi se taimi o laina i le aso atoa, ina ia lava le vevela o le la e miti’ia mo le gaosiga o le eletise. Afai e i ai taimi o le ova ai le vevela o le la e miti’ia, e mafai ona fa’amautu i ma’a tetele e ono sapalaia ai nofoaga uma i taimi e timuga ai ma le susulu lelei le la.

Ua fa’ailoa mai i latou e ona le Malosi LLC e to’atolu ali’i sitiseni Amerika, ua latou fa’atautaia tutusa: Daniel Myung, Michael Stoddard ma Walter Cuculic. Ona o nei sui o tagatanuu o Amerika ua le moomia ai se pa’aga fa’apisinisi na soifua a’e i le Teritori mo le Malosi LLC. O se tasi fo’i lea o itua’iga o pisinisi e le moomia ai se pa’aga Amerika Samoa ona o se pisinisi LLC.

Ua i ai foi isi pisinisi o fa’atautaia e le to’alua o nei ali’i faipisinisi ua fa’apa’aga mo le fa’atautaiga o le Malosi LLC i le teritori: Daniel Myung – Norwegian Energy Solutions & Services, Inc. (NESS); • Michael Stoddard – TSI Group LLC ma Walter Cuculic – VP of 34th Bank. 

ULUA’I TAIMI SOLA FA’ANANA TAGATA VA’ALELE MAI SAMOA I FITI:

I le fa’aiuga o le tausaga 2022 ua tupu ai se mea fou i faigamalaga a le Fiji Airways mai Samoa i Fiti, ina ua maua ane, e i ai se tamaitai ua sola fa’anana atu i Fiti mai Samoa. O se mea e maofa ai, ona o le fa’alilolilo ona lafi o lea tamaitai e 24 tausaga le matua, ua le maua ai fo’i i le taimi na tapena ai le va’alele e saunia mo lana malaga atu i Fiti.

O le tala mai o lenei tamaitai o se tasi mai Nofoali’i ma sa maua atu o lo’o lafi lava i le faleuia e le to’atele i totonu o le malaeva’alele i Nadi International Airport. 

O le isi mea e le atoatoa fo’i ona pepa malaga.Ua mae’a toe fa’afo’ia mai lenei tamaitai i Samoa i le fa’aiuga lava o le tausaga ua te’a.

Ua fa’ailoa mai e le ali’i Pule o le Fiji Airways Edwin Nand, “O lo’o fa’atautaia pea lava suesuega a le Malo o Fiti pe na fa’apefea ona sao le malaga atu o lenei tamaitai talavou i Fiti e ala i le latou va’alele, ae sa matua suesueina lelei uma lava totonu o le va’alele inaua tulaueleele, ae ua faia fo’i ma le suesuega a Samoa latou i le matou aufaigaluega e tautuaina matou va’alele pe aisea ua le maua ai lenei tamaitai a’o le’i tu’uva’a ese atu le va’alele mai Faleolo Airport?”

Na fa’ato’a maua lava lenei tamaitai ina ua maua e tagata faigaluega a le malaeva’alele o Nadi ua atoa le tolu aso o lafilafi i le faleta’ele o le Malaeva’alele.

Ua fa’afesiligia ma toe suesueina toto’a tagata uma o le aufaigaluega a le Fiji Air i Samoa, fa’apea ma tagata faigaluega a le Samoa Airways i Faleolo, pe na fa’apefea lava ona misia ona maua o lenei tamaitai i le taimi e gasolo atu ai le pasese e malaga atu i le va’alele, ae leai se lisiti o le nofoa o ia umia.

O lo ua fa’ailoa mai e na’o le telefoni lava ma le tusi folau sa umia e lenei tamaitai ae leai se ato lavalava ma nisi mea o ia te ia.