TALA I VAIFANUA

Pago Pago - AMERIKA SAMOA

FOA’I PACIFIC INDEPENDENT DISTRIBUTORS - PEPE FOU 2023; FOMA’I & TAUSIMA’I POTU PEPE

O le foa’i fa’aletausaga a le kamupani a le Pacific Independent Distributors (PID) i ana Oloa mo Pepe mai le  Kimberly-Clark, ua taua’aoina faapitoa lea mo le ulua’i pepe e soifua a’e i le Falema’i LBJ Medical Center i le tausaga fou 2023. 

O le Kimberly-Clark o se kamupani e latou te gaosia mai oloa tau napekini  Huggies ma pepa solo mo pepe.

Talu mai le tausaga e 2016 ua fa’atautaia pea lava lea foa’i fa’aletausaga mo pepe uma lava e soifua i le ulua’i aso o tausaga fou ta’itasi ma o lea fo’i la ua fa’atautaia mo le 2023, o le fitu ai lenei o tausaga o fa’atuanuu pea lava lea foa’i taua.

I lenei tausaga ua taua’aoina mo pepe le fa’alue e fa’amoe ai pepe poo le Hamper, Diaper poo napekini ma pepa solo fa’apitoa ituaiga oloa uma lava o le  Kimberly-Clark.

Ua le gata ia pepe le meaalofa ae ua fa’asalafa atu nei i matua o pepe lea foa’i. O le tina ua fa’atumu fo’i lana ato ta’ita’i o lo’o ua i ai oloa faapitoa mo ia  - oloa fa’amanogi mai le Pacific Elegance ae o Tama fo’i latou, ua fa’atumu lana ato i oloa tai Nivea o mea fa’amanogi ma oloa tau tama. 

Ua agaga lenei kamupani ina ia fesoasoani uma i le aiga i lenei fa’amanuiaga o le tausaga fou ua la’ua maua, o se pepe fou tamaitai lalelei.

Ua le gata ai fo’i le foa’i ua faliu i ai le PID i le aiga ua fa’amanuiaina i le pepe fou, ae ua a’apa i latou ma fai meaalofa fo’i i le vasega o Foma’i, Tausima’i ma i latou uma e tiute i le potu pepe ma le Potu o Failele a le tatou Falema’i tele i Faga’alu.

O oloa ua taua’aoina ua tuufa’atasia mai lea e le PID ma lana Kamupani fa’apa’aga o le Pacific Elegance i le Samoa Sports i Fagatogo. 

“Ona o lo outua fa’aalia o le agaga alofa ma le tausiga lelei o pepe faapea ma nai o latou tina i le taimi ua fa’ato’a maua ai latou fa’amanuiaga o se ola fou e tausia lelei, ua matou fiafia ai e faia lenei foa’i, ua na’o se fa’amalo ma le fa’afetai i la outou tautua ma le agalelei i fanau, o pepe fou lava i le atunuu.”

O le aotelega o nei meaalofa na tapena ua taua’aina lea o le to’a 38 o le aufaigaluega a le itu o le falema’i, e aofia ai le OBGyn Unit, Nursery Unit, Labor Room ma le Special Delivery Unit. 

Ua tofusia i latou uma ma ato fa’ameaalofa o oloa eseeese o i ai, ae o Foma’i tiute uma ua aofia ai ma le Pepa e $100 lona aiga e matua nofonofo ai ae fa’amama ona atigivae, atigilima ma fofo latou foliga i le Heavens Touch. Mai le tele o itula e faigaluega ai, ua avatu ia i latou lea avanoa lelei e fa’amaepaepa ai ae tautuaina i latou e le Heaven’s Touch.

Ua matua fa’afetaia lava lenei foa’i e le vasega o Foma’i ma Tausima’i tiute ona o le agalelei mo i latou.

TAUMAFAIGA MATAGALUEGA O AOGA - SOFA’I A’AFIAGA TAU LE MAFAUFAU

O se uulua’i taumafaiga a le Matagaluega o A’oga ina ia sofa’i le fa’afitauli ua fa’atupula’ia i tupulaga talavou i le atunuu, ua fesasia’i fa’ai’uga ma filifiliga a le fanau talavou, ua aafia ai i latou i gasegase tau le mafaufau, omiga tuga o le soifuaga, ma ua a’afia ai latou mafutaga mamae ma matua.

Ua a’apa mai le taumafai mai le malo, ina ia toe so’o le fau ma le fau, i mafutaga i totonu o aiga, ekalesia ma afio’aga a matua ma fanau, e ala i le polokalama ua amatalia nei e le Matagaluega o A’oga, “E tatau lava ona faia pea lo tatou tiute, aua ne’i mate lo tatou fa’amoemoe mo fanau ia i’u lelei latou tauamfaiga i a’oga ae maise o tomai eseese e tautua ai i le lumana’i.”

O le polokalama sa fa’atautaia e Autalavou eseese mai Ekalesia eseese i le atunuu ma sa fai sone fo’i lea fa’amoemoe. O le Gov. Rex Lee Auditorium le nofoaga sa fa’atasia i ai Autalavou tofia uma i le masina ua te’a e fa’atautaia latou tapenaga mo le fa’amoemoe o pesepesega ma pese faitaga e fa’ailoa atili ai a’afiaga o le mafaufau, omiga o a’afia ai le tupulaga talavou ona ua tagofia e i latou fuala’au fa’asaina ma vaila’au oona, ua avea fo’i lea ma ala malosi ua fulitua ai le tupulaga i amioga lelei, ae sili ona  sasi ai latou fa’ai’uga tatau i mea e ao ina faia e aoga i lona soifuaga mautu ma le saogalemu.

I le fa’atasiga ua avea ai le afioga le Kovana Sili Lemanu PS Mauga ma sui e tula’i e tima’i i le pa’ia na poto mo lenei fa’amoemoe aoga mo aiga, nuu ma ekalesia.

“Ina ia fesoasoani i a tatou fanau, ua gatusa i tatou uma mo lea faiva, e afua mai tatou fanau se’ia oo ia i tatou matua, ma fa’asolo mai ai i ta’ita’i o afio’aga, ta’ita’i o Ekalesia ae maise o ta’ita’i o tatou Malo! O le tatou galuega fai fa’atasi lenei fa’atofala’iga,” o upu ia a le kovana sili.

Sa ia toe fa’atepa ma fa’amanatu tasi lava i le atunuu atoa, “Ia fa’amuamua lava i totonu o le Aiga le taimi o sauniga siitia i le Atua, e pei ona amatalia mai e o tatou tua’a, ua le toe fa’atautaia e aiga uma lea tu ma aga a Aiga Samoa i afiafi fa’aleafiafi i aso uma. Ua fa’apea fo’i ona sapaia mai lea fa’amoemoe e le Sa poo Vavao a afio’aga ta’itasi, mai pulega o Ali’i ma Faipule o afio’aga, ia unaia atili le fa’amoemoe, o le mafuta fa’atsi o aiga ma faia faigalotu fa’aleaiga i afiafi ta’itasi. O le fesili ia te oe le matua, o faia pea lea tulaga pe leai? E le o amataga ea lea o le le toe soofa’atasi o agaga o fanau ma matua i le li’o fa’aleaiga? Toe fa’amalosi atu lea pitola’au a i tatou matua uma ina ia faia pea.”

I lana tautalaga fa’apitoa mo matua, sa ia fa’aioa ai lava nei mea e lua e tatau ona toe fo’i i ai matua, ina ia tapena le nofo lelei ma aiga o fanau, ia tuu atu fo’i i le Atua o tatou faiva fa’amatua ina ia fesoasoani atili mai i ai.

“Muamua i pipi’i mau i le mafutaga fa’atasi ma lo tatou Atua. Afai e naunau i tatou ia manuia taumafaiga a le fanau mo le lumana’i, e ao lava ina matua mausali lena fa’amoemoe taua tele lava. Ia tau solomua fo’i ia i tatou o matua, ia faia fa’ata’ita’iga lelei i le fanau aua ua vaaia e i latou o tatou tausolomua ona mafuta ma le Atua i aso uma lava o le soifuaga.”

“A tatou toe va’ai i tua i le mafutaga a tatou tua’a ma lo tatou Atua, o se fa’avae lea sa latou fafau mai mo i tatou, “Ia Fa’amuamua le Atua.”