TALA I VAIFANUA

Pago Pago - AMERIKA SAMOA

MAUA LE TUSI FA’AILO AMELIE CHEN - TAUVAGA JSHS

Ua mae’a ona fa’auia e le Hawaii & Pacific Junior Science & Humanities Symposium i le tamaitai o Amelie Chen o le Pacific Horizons lona manumalo i se tasi o avanoa e malaga ai e fa’aauau ona fa’atauva lana galuega fa’atino o le Junior Science & Humanities Symposium, pe na te mauaina le avanoa o le to’a 6 maualuga togi, e ulufale ai i le tauvaga mulimuli i Virginia i le amataga o le tausaga fou.

O lenei tusi fa’ailo sa fa’aoo e le tamaitai fa’atonu o le Hawaii JSHS lea sa mua’i fa’atauva ai galuega fa’atino a le HS ma le JSHS a le Hawaii Pacific ma sailia ai nisi e toe fa’aulu atu i Virginia.

O le galuega fa’aitno lea a le tamaitai Amelie sa ia fa’aulutalaina “Antipodal Algae: Energy Solutions for a tropical Island”.

O le avea ai o le galuega fa’atino a Amelie ma se tasi o galuega fa’atino to’a valu maualuga, e toe fa’aauau ona filfili ai nisi o faamasino ina ia toe fa’afofoga toto’a i folasaga ua tapena e i latou uma nei, ma toe filifili ai le isi to’a ono e fa’auau atu ona malaga e toe tauva i Virginia pe manuia mai ai i le manumalo i le Iunaite Setete atoa i le vaega a le JSHS.

“Ona o lau galuega ua mataituina le maualuga fo’i o le suesuega fa’asaeanisi o lo’o ua fa’amatala auiliilia mai ai, aoga fo’i i le malo fa’aatumotu ina i ala e sailia ai mai ai le malosi’aga fa’aeletise, o se poloketi ua iloga le lava o lau sailiga ma le suesuega i ai, ua e malamalama lelei fo’i i ai, ma e tumati’e lau galuega fa’atino lea nai lo le tele o isi galuega sa fa’aalia.”

I le tulaga filifilia ua i ai nei le galeuga a Chen, e toe fa’aalia i le fiafia fa’apitoa e aofia ane i ai le to’atele o fa’amasinoga sa nafa ma le fa’amasinoina o le ulua’i  tauvaga, pe a ma’ea le faaaliga o le a toe fono le vasega o fa’amasino ma latou filifilia ai le ta’i ono o galuega fa’atino lea e malaga i Virginia.

Ua le mautinoa pe ua na’o Chen ua fa’amanuiaina i le filifiliga muamua o sui e toe tauva mo le fa’aauau atu i Virginia pe ua i ai ma nisi o tatou fanau na tauva muamua i Hawaii ua fa’amanuaina fo’i mo lea avanoa lelei.

Fa’aalia e si ona tina, “Faafetai o le meaalofa sili lea ua ma’ua mauaina i lenei Kerisimasi ma le Tausaga fou! Talosia le alofa o le Atua se’i toe fa’auaau atu lana taumafaiga i Virginia!”

ULUA’I TOLAUAPI TIMA’I TALAVOU I LE SOIFUA MALOLOINA - KOLISI TUUFA’ATASI

O le aso Toona’i talu ai sa fa’atautaia ai se Tolauapi mo Tupulaga e Tima’ia Tau le Sofua Maloloina  ma sa fa’atautaia lea e le American Samoa Area Health Education Center [AHEC] mo le Kolisi Tuufa’atasi. O le ‘auga o lea tolauapi tau le Soifua Maloloina o Tupulaga talavou, ina ia fa’aleleia atili le Soifua Maloloina o Tupulaga Talavou o le atunuu e ala i aoaoga fa’apitoa ua sailia ai galuega i totonu o le matagaluega o le Soifua Maloloina i ona vaega eseese.

O se ulua’i tolauapi lea fa’apea ua fa’atautaia e le AHEC mo le Kolisi, ma ua aoga fo’i i le fanau o lo’o a’oa’oina i le tatou Kolisi, ina ia sailia ai galuega pe afai o le a mae’a umia fa’ailoga maualuluga, e le gata i lea ae o le sailia o kosi tau le soifua maloloina e mafai ona tauavea e i latou i aoaoga ina ia mae’a ane latou a’oga, ae maua loa ma le avanoa ua agava’a e faigaluega ai.

E silia ma le 40 le aotelega o le fanau sa mafai ona aga’i atu ma fa’afofogaina fo’i folasaga ma a’oa’oga sa mafai ona fa’asoai mai ia i latou, ua agavaa e faigaluega ai pe a mae’a latou kosi o tau’avea i le Kolisi.

Ua mafai fo’i ona fa’ata’itaia nisi o tiute e fa’atino i galuega eseese ua mafai ona galulue ai i le matagaluega o le Sofua Maloloina, ma o ituaiga tiute nei e mafai ona maua ai lava galuega pe afai ua mae’a taoso ai i latou i taimi e fia sailia ai ni latou galuega.

O le fa’aaogaina fo’i o nisi o masini eseese fa’atekonolosi eseese e faitauina mai ai fa’amaumauga moomia mo sui o lo’o siakia o latou soifua maloloina, ma isi lava mea e pei ona mana’omia ona latou fa’amaumau mai faitauga a masini nei e fa’aaogaina i taimi uma mo siakiga o gasegase a foma’i mo le mamalu lautele.

O le silafia ona fa’aaoga o masini eseese e fa’aaoga i nei siakiga, ma le faitauina o latou fa’amaumauga, fa’apea ma le aoina fo’i o faila ma fa’ao’o atu i nofoaga o moomia mai ai, ae maise o le tapenaga o le fa’amama o nofoaga uma e gasolo mai i ai le mamalu lautele, fa’amama nofoaga e fa’aaogaina e foma’i ma tapena ia mautu nofoaga e siakia ai le mamalu lautele, o isi ia mea ua maua ai galuega a le to’atele o tupulaga talavou i le taimi nei talu mai lava le a’afia o le atunuu ma le lalolagi atoa i le Covid-19.

Ua fa’alauiloa le tele o nei avanoa ma ituaiga tomai e moomia ona agava’a ai le tupulaga ina ia tapena ai latou e fa’atino tiute nei pe afai e fia faigaluega ma amata ai latou soifua galulue i le tatou malo.

Na auai sui mai Fagaitua High, Tafuna High, Samoana High ma Nuuuli Voc Tech High i lenei tolauapi e saili tomai fa’apitoa mo galuega eseese e maua mai le Soifua Maloloina. O nisi o a’oga tumaoti sa auai mai ai le Manumalo Baptist Academy.

I le fa’asologa o lea tolauapi sa muamua lava tula’i ai le sui mai le Matagaluega o Tagata Faigaluega a le Malo ma fa’alauiloa atili le fa’atumuga o le Pepa talosaga mo se galuega ina ia fa’amasani ai le fanau talavou. Sa ia faamatalatala fo’i le amataga e oo i le fa’aiuga o lea lava talosaga.

Sa vae fa le aofia na auai ina ia mafai ona fa’asolo ai le polokalama fa’aleaoaoga fa’apitoa o le tupulaga e afua mai le fa’atautaiga o le CPR poo le toe fa’aolaina mai o se tasi ua matapogia. Sa fautuaina le fanau i mea uma e tatau ona mua’i tapena a’o le’i fa’agasolo le taumafaiga e toe fa’amanava mai le sui o matapogia.

Ua fa’ailoa mai o le avea ai o oe ma se tasi e tauavea kosi o tomai fa’apitoa a le AHEC i le Kolisi mo le lua tausaga, e ao ina e naunau e te fia iloa lelei lava vaega o le kosi ua tolaulauina e sui na auai e faia lea fa’aa’oa’oga i le fanau talavou.

O le kosi nei a le AHEC ua suia i ai le tele o isi polokalama faale-aoaoga faapitoa mo tusi pasi i Amerika Samoa.

 I le taimi nei e tusa lava sui nei e pasia le AHEC e gatusa lelei ma le Nurse Aide ua umia lona tusi pasi.