TALA I VAIFANUA

Pago Pago - AMERIKA SAMOA

FILIFILIA TUIASINA DR. SALAMO LAUMOLI - SENATOA MAI TUALATAI:

Ua fa’ailoa mai o le aso Tofi na te’a nei sa mae’a ai ona tapena pepa fa’amaumau uma mo le tofiga fou o le afioga le Senatoa e se’ei mo le Itumalo o Taualatai i le Maota Maualuga o le tatou Fono Faitulafono.

Ua fa’amauina sa mae’a soalaupule le itumalo Tualatai ma fa’aulu ai le suafa o Tuiasina Dr Salamo Laumoli mo lea tofiga mamalu ma ua fa’aulu atu i le Ofisa o Mataupu Tau Samoa e fa’amaonia ai.

Ua fa’ailoa mai sa mua’i soalaupule le itumalo Tualatai i le aso To’ona’i mulimuli o Novema 2022 ma latou filifilia toto’a ai lana afioga Tuiasina Laumoli mo le latou nofoa i le Maota Maualuga. O lo ua fa’aauau nei e ia le tofiga o le afioga le Alo o Salamasina Satele Galu Satele ua ia tu’ua.

O nisi o suafa sa fa’aleo mo le filifiliga a le Itumalo sa aofia ai Ma’aelopa Bob Tuiasosospo, peita’i ua fulisia le aofia o le itumalo e se’ei ai lana afioga le Foma’i malolo o Tuiasina Salamo Laumoli o Vailoatai.

O Tuiasina Salamo o le foma’i Nifo mai le amataga o lana tautua i le Malo ina ua mae’a mai ana aoa’oga i lea matata mai Fiji School of Medicine i Suva, Fiti. Ona soso’o lea ma le faigaluega ai i le Matagaluega o le Soifua Maloloina mo ni tausaga ina ia mae’a litaea mai lana matata lea i le LBJ Medical Center e fa’a-konekadarete ma sa ia va’aia ai le Falema’i Fa’aitumalo i Leone. E i ai foi taimi sa malaga atu ai o ia i Honolulu ona sa galue ai lona faletua Seionara Laumoli, lea o lo’o avea ma fofoga taumolimoli fa’asalalau a le KVZK-TV a le tatou Malo. Ao i ai i Honolulu sa galue mai ai fo’i i le vaitau o tau soloia le a’afia o le atunuu i le Covid-19.

MAUA LE TUSI TAMAITAI FITAFITA SAMOA - FALETUSI FELETI BARSTOW UTULEI:

O le tusi na tusia a le tamaitai Fitafita Samoa o Faapepele “Pele” Hunkin, lea e alaala i South Carolina ma ua fa’aeaina o ia i lea avanoa e mafai ai ona tusia lana tala e fa’aautu i lana tautua o se Fitafita i tafa o taua, ma le tele o lu’iga na feagai ma ia a’o fa’atino lana tautua.

O lea tusi ua mafai ona faitauina e so’o se tasi i totonu o le Faletusi tele i le tatou Teritory i Utulei, le Feleti Barstow Library. 

I lana tusi, ua ofoina mai mo i latou e o le a faitau ai, ua i ai fo’i sana fe’au taua ua ia tusia ai, “O outou o le fatu o le Fitafita Samoa, ia outou soifua i se olaga ua mae’a fa’amanuina atoatoa i le fiafia ma le agaga fa’afetai mo mea uma ua tatou maua. Ia fa’amuamua ona e alofa ia te oe, ona fa’amanuia lea o le Atua ia te oe!”

Na maua le tusi lenei e le faletusi i le masina o Oketopa 2022, peita’i sa le mafai ona tatala le tusi e faitauina ai nisi o le to’atele ona e tatau ona lisia muamua ma fa’amautu le itu tonu e tu’u sa’o i ai lea tusi i le faletusi. 

Ua mautu mai o le tusi lea o lo’o i le itu o tusi o tala moni o lo’o faamatala mai ai, i olaga o nisi sa latou fa’amautuina fa’amaumauga o latou tala’aga.

Ua avea nei lea tamaitai Fitafita Tuai Fa’apepele “Pele” Hunkin ma se tasi o tusitala Samoa mai Nuuuli Amerika Samoa.