TALA I VAIFANUA

Pago Pago - AMERIKA SAMOA

NOVEMA 14 - ASO FA’APITOA TOGAFITIGA MA’I SUKA I LE LALOLAGI

O le aso 14 Novema 2022 e taualoa ai togafitiga ma taumafaiga eseese ina ia manumalo le to’atele mai le a’afia i le ma’i tumau o le Ma’i Suka i le Lalolagi. Peita’i i le toe fonotaga a le Komiti Fa’afoe ma ana Pa’aga, o vaega eseese o le Malo sa latou fa’ai’ugafonoina ai le toe soloia o le Komiti Fa’afoe tuai sa galulue mai i le DOH Tobacco Diabetes Board of Directors.

O le mafuaga na faaiugafonoina ai lea tulaga e le fonotaga taua lea, ona ua iloga mai, e leai ma se tasi o sui totino o le Komiti Fa’afoe Tuai na tofia na auai i lea fonotaga taua, e aiaia ma fa’atulaga a’ia’i ai le Fa’agasologa o mea e fa’atautaia mo lenei aso fa’apitoa ma galuega uma e fa’atautaia a le Komiti Fa’afoe a le DOH Tobacco Diabetes mo le tausaga atoa.

O le ‘auga atoa o nei taumafaiga uma, ina ia mafai ona galulue fa’atasi i le taua lenei, “Fa’afeta’ia’i le Ma’i Suka ma Tineia!”

Ona o lea ua pasia e le fonotaga taualoa lea a le Komiti Fa’afoe a le DOH Tobacco Diabetes le Komiti Fa’afoe Tuai, ua toe fa’afo’i nei i le mau i le Matagaluega o le Soifua Maloloina e toe tofia mai e i latou se latou Komiti Fa’afoe fou ma ia fa’auia i le afioga le Kovana Sili e toe pasia mai ai e le fa’auluuluga o le Faigamalo e pasia mai ai.

I le taimi nei ua fa’ailoa mai, “Ona o le to’atele o tagatanuu ma e nonofo mau i Amerika Samoa o lo’o maua i lenei ma’i tumau fita, ua matua mafuli ai fo’i le Matagaluega o le Soifua Maloloina fa’atasi ma le Falema’i o le LBJ Medical Center e galulue fa’atasi ma isi malo uma o le Lalolagi, ina ia fa’amalosia togafitiga uma, ae masie o le to’aga o e uma o lo’o ua tulata ina maua a’ia’i i le Ma’i Suka, e usita’ia fautuaga e tete’e ai i lea ma’i, ina ia le sopoia le laina mumu, ma fa’amauina ai lou igoa, o se tasi ua maua i le Ma’i Suka,” o se fautuaga lea ua fa’ao’o mai i le mamalu lautele.

Ua faailoa mai fo’i se lagona o le Faipule i le Konekeresi a le tatou Malo, Uifa’atali Amata e tusa o lenei taumafaiga, “O le aso lenei e mafai ai ona fa’amauina so tatou sao aoga tele i le taumafaiga e tete’e ma togafitia le Ma’i Suka mai le maua tumau ai o tatou tagata. Ua mautinoa e i ai la’asaga ta’itasi e mafai ona faia e le sui e le’i tumau lona a’afia i le Ma’i Suka, ina ia toe fa’afo’i ai i le tulaga mama mai lea gasegase uiga. A usita’ia na mea uma, ua aoga tele ia i tatou le tele o tima’iga ua tapena ma fa’ailoa mai e vasega o foma’i ma sui o galulue punoua’i mo nei tima’iga aoga uma.”

“Ona o a’u fo’i o se sui ua tofia mo le Konekeresi a le tatou Malo, ua ou toe manatua ai i latou uma o le tatou atunuu, o e pele ia i tatou, ua maua i le ma’i suka. Ua mae’a silafia fo’i e le atunuu a’afiaga tiga uma e ono lamatia ai le soifua o tagata uma ua a’afia, ma o le umi lava ona feagai o le tagata ma lea gasegase, o le tetele fo’i lea o a’afiaga e oo i ai lona soifua ma taumafai e gafa taulima ona a’afiaga tau le soifua maloloina.” 

“E tatau ia i tatou e le’i maua, ona taga’i toto’a i a’afiaga nei ma tatou faia ai suiga tetele i a tatou fa’ai’uga fai ma mata’i a tatou taumafa i aso ta’itasi, ia taumafai atili i le tulaga paleni o ‘aiga ta’itasi, ma ia tausisi lava i le fa’amalositino,” o se toe tima’i mai lea a Uifa’atali. 

“Ua tatou iloa lelei le tiga ma le umi ona feagai o nisi o tatou pelega ma lenei ma’i tumau, a oo loa ina maua ai i tatou, ua faigata loa ona toe fa’afo’i lo tatou soifua i le tulaga maloloina lelei. Ae ua amata fo’i ona taumafai e togafitia ma tumau i ai i aso ta’itasi. O le isi fo’i lea ma’i tumau, ua numera tasi ai Amerika Samoa i le lalolagi, i le to’atele o tatou tagata o lo’o maua ai ma ua faigata lava ona toe soloia lena faitauga toatele o le tatou atunuu ua a’afia.”

“O le a le manofo lo’u nei sui, ou te taumafai atili lava e tausailia ala e mafai ai ona maua fa’atupega ae maise o tima’iga taua mo le atunuu ina ia mafai e i tatou oan fa’aititia le aofai o tatou tagata e a’afia ma fa’amauina suafa i le lisi tumau o e ua maua i le ma’i suka, i le lumana’i. O le mana fo’i o le Atua le isi lava malosi’aga tele, e mafai ona fa’amamaina ai le tatou atunuu mai ‘ave malolosi o le Ma’i Suka, peita’i o le Upu lava ua tatou mautinoa, afai ua e silafia, ia taumafai ona fa’atino pe fai loa.”

TU’UMALO FA’ATONUSILI MATAGALUEGA UAFU & MALAE VAALELE

O le vaveao o le aso Gafua, Novema 14, na tu’umalo ai le fa’atonusili o le Matagaluega o Uafu ma Malae Va’alele, Christ King. Ua 56 tausaga o lona soifua, i le taimi na maliu ai. 

O lona maliu fa’afuase’i na fa’ateia ai le to’atele, aua sa vaaia o ia i nisi o nofoaga a le malo, ae maise o asiasiga i le Malaeva’alele ma Uafu. Sa vaaia foi o ia i le lotu i le Aso Sa.

O le masina o Ianuari o le tausaga ua te’a sa tofia ai King, e Kovana Lemanu P.S. Mauga, e avea ma faatonu sili o le matagaluega. Sa avea o ia ma sui faatonu o le Matagaluega talu mai le 2005 ma sa avea foi ma fesoasoani faapitoa i le pule sili o le Puleaga a le Eletise ma le Suavai Taumafa mo le 5 tausaga. 

Sa galue foi o ia o se supavaisa o vaalele mo le United Parcel Service i Ontario International Airport mo le tele o tausaga.

O King o se tagata toaga i le lotu i lana Ekalesia Katoliko. O se tagata fa’au’u mai le Marist Brothers sa ia tautua fo’i i le Komiti Fa’afoe a le Marist Brothers Crusaders Alumni Association.

E le gata i lea, o ia o se sui malosi o le Lions Club. Sa avea o ia ma Peresetene o le Kalapu e fa taimi.

Ua tuua e ia lona faletua o Danielle ma le la fanau tama e toalua o Aiden ma Baelin. E momoli atu le faamaisega a le Samoa News i le aiga o King i nei taimi faanoanoa.

SAILI TOGAFITIGA O GASEGASE O LE FLU

Ua fa’amauina le to’atele o e gasolo i le falema’i ona o latou gasegase e foliga mai o le Influenza, ae ua faigata lava ona te’a, ua le pei o le mea na masani ai.

O nisi nei o mea e fa’ailoa ai ua e a’afia i lea fo’i ituaiga o le Flu lea ua pepesi mai i lenei vaitau:

• E fiva mai oe, Oso ai ma le ma’alili ma tale fo’i.

• E tiga le fa’a’i ma a’ala i le tele o taimi e mafua ai le tale.

• Tiga mai Maso o le tino.

• Tiga vivili le Ulu.

• O nisi taimi e vaivai le fa’alogo i le tino ma gagase.

• E pua’i ma tata fo’i le manava, ma e matele la ia auga i le fanauiti.

O le tele o taimi e le so’ona tigaina ai le sui ua maua i lenei influenza, ae peita’i, e tigaina tele atu isi tagata nai lo le toatele o isi sui ua maua lava ma toe te’a ae le’i sulufa’i mai mo se togafitiga e toomaga i ai le tigaina.

O e tigaina ma moomia lava le oo mai i le falema’i e saili togafitiga oe 65 tausaga ma matutua atu. O nisi o le mamalu lautele ua mae’a a’afia i le ma’i sela, ma i latou fo’i o fanauiti e le’i atoa le ta’i 5 tausaga le matutua.

Afai ua matauina ua e a’afia i le Flu lea, e ao loa ona e nofo i le fale aua le faigaluega. O le isi lea ala e pesia atu ai nisi e to’atele mai ia te oe. O fanauiti fo’i ua matauina e matua ua a’afia i le Flu lea, fa’anofo fanau ua maua i le Flu i le fale, aua e vave atili ai ona to’atele fanau a’oga e pesia ma a’afia.

O lo ua fa’ailoa mai ala e mafai ai ona pesia nisi ia te oe ua Flu, o le tale atu lea o se tasi ia te oe e pipisi atu ai. O le mafatua o se tasi a’o e latalata i ai. Fa’amolemole i latou e fetalei, ia pupuni ou fofoga ma afai e fa’aaogaina pepa solo e pupuni ai fofoga a’o tale, fa’amolemole e tia’i nei pepa solo ua ame’a fa’aaogaina i lapisi ae le o le tia’i fa’asoloatoa i le nofoaga o e i ai.

Afai ua e fa’alogoina auga ua fa’ailoa i luga, o lona uiga ua i ai oe i le lisi o e ua mafai ona a’afia ai le isi ou uso a tagata o e soso’o atu i ai i so’o se taimi ua e fa’atasi atu ai i le galuega, poo luga o le pasi pe o soo se nofoaga faitele lava.

O auga nei ua mautinoa ai ua e maua i le Flu:

• Vave le manava ma ua fa’alogoina le faigata ona e manava i lou isu.

• Amata ona uli mai laugutu o fanauiti.

• Tiga uma maso o le tino ma ua gagase ai, ma ua le fia savavali fanauiti.

• Leai se vai i le tino o fanauiti mago ai gutu ma ua le loimata mata pe a tagi.

• Ua le fiafia le fanau e feso’ota’i ma oe ae o lo’o ala fanauiti.

• Oso fa’ama’i lili le fanauiti.

• Maualuga le fiva o fanauiti e sili ma le 104 tikeri 

• Fiva ma Tale ma ua le toe fo’i i se lelei, ae fa’atetele.

• Tiga mea o le tino ae maise lava o le fatafata ma le manava.

• Fa’aauau pea lava ona niniva e le fia tu i luga.

• Faigata ona fa’atula’i gofie i tagata matutua.

• Gagase tele tino.

• Fa’ateteleina atili ai ma a’afiaga masani o isi gasegase o maua tumau ai.

O le togafitiga lava ua tatau ona faia o le fai lea o tui puipuia o le Flu i tausaga ta’itasi.  Aua le fa’alatalata i le sui o e va’aia o fa’agasegasea, ae ia tumamao mai ma ia mautinoa o faia sau pupuni fofoga ona e alu ane ai lea e tausi ma’i ai. Pupuni fa’atasi lou gutu ma le isu i taimi uma e faia ai pupuni fofoga.