TALA I VAIFANUA

Pago Pago - AMERIKA SAMOA

FESOASOANI MAI LE OFISA O TURISI I E MALAGA I SAMOA:

O se malaga fa’apitoa mai a le Pulega a le Ofisa O Turisi a Samoa sa talimalo ai le tatou Matagaluega o Fefa’ataua’iga a le tatou malo ma le Ofisa o Turisi a Amerika Samoa, o se sootaga lea e mafai ona fesoasoani atili i le to’atele e fia malaga i Samoa, e asiasi i aiga, ae sili ona aoga fo’i i le vasega o e fia malaga tafafao ae fa’amautu i nofoaga o faletalimalo ma e moomia fo’i ni ta’avale e feoa’i ai e tafafao.

O le tamaitai pule sili o le Puleaga a le Samoa Turisi Pativaine Petaia - Tevita sa ia fa’ailoa mai, “O lenei taumafaiga ina ia mafai lava ona fa’afaigofie feuiuia’iga uma mo e fia tafafao mai i Samoa. E mafai ona tu’u ese uma popolega pe afai o le a fa’afeso’ota’ia lava faletalimalo o lo’o fia alaala ai i latou, ma fa’asolo atu ai ina mae’a totogia le pasese e malaga atu ai ma toe taliu mai i aiga ma le saogalemu, toe fa’aopoopo atu ma le tapena mai fo’i ma se ta’avale o ituaiga e manana’o lava i ai turisi.”

“O le ituaiga faiga lea ua mafua ai ona malaga mai uma sui o pisinisi ta’itasi ua mafai ona auai fa’atasi i lenei taumafaiga a le matou ofisa ina ia mafai ona fesoasoani atili i e tafafao mai. O lo ua mautinoa nei e mafai ona fa’aleleia atili e i matou mo tautua eseese nei mo le vasega o tagata turisi.” O se tala lea a Pativaine Petaia Tevita

“Ua le gata i le vasega o i latou mai Niu Sila ma Ausetalia, ae ua fa’apea fo’i o tatou lava tagata Samoa e fia malaga asiasi atu ma tafafao, ua taumafai ai lenei fesoasoani. Lea la ua faia nei fo’i lea ituaiga fesoasoani i e uma e fia malaga atu i Samoa mai Amerika Samoa nei.”

E to’alua nisi sui sa malaga fa’atasi mai ma le Ofisa o Turisi, lea e fa’atasi mai ai ma le Tausala Lalelei o Samoa Haylani Kurupu ma le susuga Clayton Simamao mai le UTOS poo le Unit Trust of Samoa.

O sui na malaga mai faletalimalo i Samoa e aofia ai le sui mai le Amoa Resort, Amanaki, Lava, Taumesina ma le faletalimalo Tivoli Hotel ma Le Vasa Hotel.

E LE FA’AGALOINA - FITAFITA TUAI  I SOO SE TAIMI!

I  le tuleiga a le afioga le Kovana Sili Lemanu P.S. Mauga, sa ia fa’ailoa ai, “Mai le tele o tausaga o le tala fa’asolopito o Amerika, e to’atele na’ua Toa sa tula’i mai e tau’avea le saogalemu ma le nofo filemu o ona setete uma ma ona teritori. O i latou ia sa latou talia ma tauto ina ia ofoina atu lo latou ola e puipuimalu ai lo tatou atunuu ma le Malo tele atoa. Ua le gata i lea, o lo tatou saogalemu ma le nofo filemu, ua mafai ai ona fa’aauau lo tatou nofo lelei ma fa’aauau le tatou soifuaga masani fa’asamoa e agatonu ai o tatou tagata ma malutia ai o tatou aiga i le Olaga Fa’asamoa, i a tatou tu ma agaifanua e iloga ma tu’ese ai lava i tatou i soo se mea tatou te nonofo ma soifua ai.”

“Mai le tele o senituri, ua le suia pe avea ai le taualoaina pea e i tatou uma o tautua a tatou Fitfitia Tuai ua mae’a le latou auaunaga, ae maise fo’i o tatou fitafita o lo’o tula’i pea ma fa’atino le auaunaga, i latou o lo’o tiute pea i o tatou laufanua ae maise o atunuu e mamao ua fa’amautu i ai nofoaga a le vaega ‘au.”

“E mautinoa ua i ai le sao o Amerika Samoa i lenei laina o Toa Samoa ile auaunaga a le Vaega Au ma o le Matagaluega o le Puipuiga o le Iunaite Setete ma ona Teritori. O i latou na o lo’o ua tula’i ma ofo atu e oo lava i le soifua, ina ia puipuia lo tatou saogalemu.”

“I lenei aso ua fa’ataua ai e o tatou malo uma fa’asetete ma teritori o le Iunaite Setete o Amerika la outou tautuatoto, tautua tuavae, tautua matavela ma le tautua le fa’atuaoia i tafa o taua ma nofoaga o vevesi, matou te talia fa’afatueleele lo outou tautiga ma lo outou sailimalo. Fa’afetai fa’afetai tele, E le mafai ona galo ia i matou uma la outou tautua ua sapi ai i matou uma i ma’a o malie.”

“Tau ina ia avea a’u e fai ma sui o i ma’ua ma le afioga le Sui Kovana, ma o ma’ua aiga ma fanau, matou te fa’aoo atu ai le fa’afetai ma le fa’amalo i la outou tautua saili sa fa’atino fa’apea ma le fa’afetai ia i Fitafita  o lo’o fa’aauau pea ona tiute, aua le puipuigamalu o le tatou atunuu. Fa’afetai tele lava, o la outou fa’aeaea i lo tatou atunuu e talia fa’afatueleele ma e tumati’e fo’i la outou fu’a o le tautua ua au mo le atunuu i taimi uma.”

“Ia manuia le aso faapitoa ma e fa’ataua ai le tautua a tatou Fitafita Tuai uma, ae maise o tatou fitafita o fa’aauauina le ‘au’aunaga”

O le taeao ole aso Tofi na fa’atino ai le savaliga ina ua mae’a le tatalo sa si’itia e Rev. Patolo Mageo mo e uma sa maea potopoto ane i le malae ma amatalia loa le savaliga lea sa ta’ita’ia mai lea savaliga e le afioga le Kovana Sili ma le faletua Lemanu PS Mauga & Ella Mauga, fa’apea le afioga le Faipule o Amerika Samoa i le Konekeresi, Uifa’atali Aumua Amata, ma le to’atele o ta’ita’i o le malo i le Kapeneta a le Kovana ma o latou aiga. Sa auai fo’i le Faife’au mo le USArmy Re. Fouvale ma le Faletua.

Ua fa’apea fo’i ona auai sui Vetereni uma sa maua le avanoa e fia savavali ai i lenei solo fa’aaloalo e taualoa ai le latou tautua, ma o se ala foi ua tapena e fa’ailoga ai le fa’afetai fa’atasi a le Iunaite Setete atoa mo ana fitafita tuai. 

Na toe fa’alogoina fo’i le leo o le fa’afetai ina ua tula’i le susuga le fa’afeagaiga, Rev Asaua Fuimaono e ta’ita’ia le sauniga mamalu mo le fa’amau fa’ailogaina o le aso fa’apito augafa i le vasega o Veterei uma i le atunuu.

O le aufaipese mamalu fo’i a le AOG Antioch i Iliili sa peseina vi’iga o lea sauniga mamalu. 

Na matua toe va’aia le fa’aluaina fo’i o le tatalaga o le Paka Liona i le fiafia na toe faliu i ai le malo ma le Ofisa o Vetereni ina ia fa’amanatuina le atoaga o le 247 tausaga foi o le US Marine Corp.

Ua ese fo’i lenei tausaga i le fa’amanatuga ole aso VA aua ua soloa’i mai le Vasega o JROTC, ua fa’asolo mai ma au savavali a matagaluega eseese, ae maise o le solo o le au tietie pasika, ma o le to’atele o i latou na o sui vetereni i le atunuu.

Na auai foi nisi o a’oga i lea fo’i aso fa’ailogaina ma savavali fa’atasi mai fo’i ma i latou uma mai le Tasi Street se’ia pa’ia mai le Malae o le Ofisa o le Vetereni ma ua aofia ai fo’i ma le Ausavavali a le matagaluega o Tagata Matutua o le Atunuu, TAOA. O le latou sao sa faia ai le latou ta’avale teuteuina lea na tietie atu ai le Miss American Samoa, Ms Hani Fuimaono,  ma le Tausala Lalelei fo’i o Samoa, Ms Haylani Kurupu, lea sa malaga mai fa’atasi ma le aumalaga a le Samoa Tourism Organizatiom ma sa api i le Sadies by the Sea, Utulei.

Na tofusia tagata uma ma latou pepa ai e ta’i $10. e filifili ai o ia poo le a le ituaiga tausami e fia tausami ai i lea aso.

I so’o se aiga foi na tapena e i latou uma na tofu fa’atutuina latou fale’ie e tapena mai ai tausami eseese, ua gatusa uma lava le tau o mea taumafa ma le vaiinu i lona tau aofai lea e $10.

FAIA LE FA’AU’UGA VASEGA SUISUI A LE UAROTA MESEPA – EKALESIA A IESU KERISO:

O le vasega suisui a le  ASCC Land Grant ACNR lea e fa’auluulu i le tofa Aufa’i Apulu Ropeti Areta, ae fa’afoea le vasega suisui e le Tamaitai o Diana Tarrant ma lona fesoasoani o Shalley Taileva.

E to’a 9 i latou ua faamanuiaina o latou taumafai ina ua mae’a lelei le 40 itula o le kosi Suisui La’asaga lona 2.  O i latou nei sa mae’a ona fa’au’u mai muamua i le isi vasega muamua o le suisui sa fa’atautaia lava fo’i e Diana Tarrant.

I le sauniga sa fa’atautaia na ta’ita’ia lea e le susuga le Epikopo Isaalo Taula i le itula e 10:00 i le taeao o le aso Tofi na te’a nei, ma sa auai fo’i nisi o tama o aiga fa’apea ma fanau ina ia fa’amanuiaina atili le taumafaiga a tina i o latou sailiga tomai.

O le susuga Autagavaia Alfred Peters sa avea ma sui mamalu o le pulega a le ASCC Land Grant ACNR, e molimauina lea fo’i taumafaiga ua mae’a.

Ua mae’a fa’asolosolo le au fa’au’u ina ia mafai ona ta’utino se mea ua latou iloa mai lenei vasega. O i latou uma sa molimau mai sa matua le iloa se suisui pe fua le tino o se tasi e fua fa’atatau i ai se la’ei poo se ofu, ae ua i’u nei le taumafaiga, o lo’o ua mae’a fo’i ona iloa lelei fua le tino, tipi le ofu ma su’i loa ina ia paleni lelei ma le tino o le sui o fia maua lona ofu fou.Va

O i latou ua pasi mai lenei a’oga suisui ua aofia ai: Talo Ioapo, Adelina Faumui, Fa’ana Tago, Lina Amituana’i, Fiapapalagi Su’a, Wynona Matu’u Segi, Sina Fa’asili, Amioga Laulu, Fatima Meleikiole.