TALA I VAIFANUA

Pago Pago - AMERIKA SAMOA

FA’AOPOOPO ISI MALAGA A LE HAWAIIAN AIR - VAITAU O ASO FIAFIA:

Ua fa’amautu mai nei e le susuga le COO o le Hawaiian Airlines Jon Snook, “Ona o lo ua mou malie ese atu uma a’afiaga o le fa’asa ma isi mea uma sa fa’alavelavea ai femalaga’iga i le va o Amerika Samoa ma Hawaii, o lea ua mautinoa fo’i le i ai o le malaga fa’aopoopo a le tatou Kamupani Va’alele o le a fa’aopoopo i vaiaso ta’itasi ina ia mafai ona lava ma totoe avanoa e femalaga’i ai le atunuu i a latou asiasiga i aiga ma toe taliu mai i fanua.”

O se mea sili ona taua, ona ua faamautu mai o lo ua toe foi nei femalaga’iga uma lava i tulaga sa masani ai, ao le’i lutia le lalolagi i le fa’ama’i Covid-19.

Ua fa’ailoa mai, o le malaga fa’aopoopo o le a fa’aopoopo mai i le aso Lulu o vaiaso ta’itasi ma o le a amatalia nei faigamalaga fa’aopoopo ia Tesema 14, 2022.

Ua faailoa mai fo’i e Snook, “Ua mae’a fo’i ona sainia e le Hawaiian Air se feagaiga ma le Amazon ina ia mafai ona latou fela’ua’ia mai a latou meli ma afifi aua e pisi na’ua i latou i lea lava vaitau o le a tele ai fa’atauga a tagata e moomia vave ona to’ai taunuu mai i le vaitau fiafia o le lalolagi, le vaitaimi o le Kerisimasi ma le Tausaga fou. E aofia i lea maliliega ua sainia ma le Amazon ma le Hawaiian Air o latou malaga togipau ina ia fela’ua’i latou uta o le meli i le va o Hawaii ma isi setete uma o le Iunaite Setete.”

Ua fa’ailoa fo’i e Snook, “Ou te iloa lelei o le a mafai ona fa’aleleia atoatoa ai le fela’ua’iga o meli ma afifi e fia fa’ao’o mai i le teritori a’o le’i oo i aso fa’ailogaina mo aiga ta’itasi i Amerika Samoa.”

MALILIEGA I LE VA O SAMOA NA LUA - TULAGA O FEMALAGA’IGA:

I soo se fonotaga lava a le Atoa Samoa, e talanoaina lava mataupu uma tau e femalaga’iga i le va o le Usoga. Ua fa’apea fo’i le fonotaga na usuia ia Oketopa 13-14, 2022 i Apia Samoa.

Ua maea fa’atulagaina o se iugafono a le Atoa Samoa, ituaiga pemita e tolu o le a fa’aaogaina mai e ulufale mai ai nisi mai Samoa. Ua fa’ailoa mai fo’i o lo ua i ai nisi o mea ua le aofia i aiaiga o nei pemita. Ua fa’ailoa mai o le a leai ni lipoti a le ofisa o Leoleo ma le kilia a le Soifua Maloloina mo i latou e fia malaga ulufale mai.

I le taimi nei o lo’o ua mafai ona i ai pea lava le Pemita e 30 aso e mafai ai ona nofo ma tafao i Amerika Samoa le tagatanuu o Samoa, ae ese ai ma le isi pemita e talosagaina mo malaga to’atele mai o aiga poo aumalaga mo fa’alavelave, ta’amilosaga o ta’aloga ma mea e fa’ailogaina i Amerika Samoa. 

O le lona tolu o pemita lea e le’i mautu lelei ona feutaga’ia i le taimi nei o le pemita lea e na’o le 24 itula le umi e malaga mai ai le tagata ma toe taliu i Samoa, o lona uiga e aoga tele mo faipisinisi e malaga mai mo fa’atauga ma toe fo’i.

 Ua talanoaina fo’i pemita fa’apitoa mo tagatanuu Amerika Samoa e fia ulufale i Samoa, lea e ao ai ina totogia le latou pemita i le kamupani va’alele poo le Ofisa o le Amepasa o Samoa ona fa’ato’a malaga lea. Ua le aofia ai sitiseni Amerika i lea fo’i aiaiga mo femalaga’iga ulufale i Samoa.

Na fa’afesiligia fo’i se tuumamaina o le lafoga totogi i le malae va’alele i le taimi e malaga ese mai ai tagata malaga e toe fo’i mai i le teritori.

O nei mea sa fa’atalosagaina ai se toe feliuliua’iga o le tofa a le Malo o Samoa i le fonotaga sa faia nei, ina ia faia se suiga e tau fai aoga mo malo o Samoa na lua.

E ese mai nei mataupu, sa faaoloolo ma’au atu fo’i Amerika Samoa ma latou fa’afetaia le galulue fa’atasi mai o Samoa i lana matagaluega o Leoleo ma le Puipuiga o le Saogalemu Lautele i le taumafaiga e fa’afo’ia atu Pagota poo e na nofosala i Amerika Samoa, ae o le latou fa’ai’uga mai le Fa’amasinoga, a mae’a ona tulia le fa’asalaga ona toe fa’afo’i lea i Samoa lo latou atunuu na soifua a’e ai. 

O le tausaga 2021 lea na toe fa’afo’ia atu ai sui nei e to’a 26 e ala i le malaga fa’apitoa a le MV Lady Naomi i Samoa.

MASI’I MATAGALUEGA SISDAC-AS - FONOTAGA & FA’AALIGA O TALA, PESEGA I AUKILANI NIU SILA: 

O le fa’ai’uga o lenei tausaga ua fa’atulaga ina ia amata ai ona malaga atu usugafono a matagaluega e 21 o le SISDAC i le Lalolagi i Aukilani Niu SIla.  

O lea fonotele e ta’i 4 tausaga ma fa’atautaia ai fo’i ma fa’aaliga o fa’aevagelia fa’aleagaga pesega fa’aleagaga fa’apea ma pesega fa’asamoa o tala’aga o matagaluega ta’itasi o mea na tutupu ma ua mae’a fa’atuina i totonu o latou tovine, ma ta’aloga e fa’atauva ai tupulaga uma o le Ekalesia Aso Fitu Samoa Tuto’atasi i le lalolagi. O le a masi’i ai fo’i le Matagaluega mai Amerika Samoa nei, ma e tolu ekalesia mavaevae i lea tatou matagaluega lea i’inei, Leone, Malaeimi ma Ottoville Center lea e fa’amautu i ai le latou Ofisa ma alaalata’i ai le Ta’ita’i Matagaluega ma le Aiga, Pr Aumua Fa’asega Ah To.

I le fa’atulagaga o lenei fonotele a le SISDAC i le Lalolagi, ua paega fa’atasi ai Kalefonia, Hawaii ma Amerika Samoa i a latou sao e fa’atino mo le fonotele. Lea ua matu’u mai ai le sao mo i latou e fa’atino e Amerika Samoa o le Tala Fa’aleagaga e fa’aautu fo’i i le autu o le Fonotele i le 2023 Aukilani i Niu Sila, Kalefonia o le a latou saunia maia le pese fa’aleagaga ae o le Matagaluega i Hawaii o le a latou fa’atinoa le pese fa’asamoa o le tala’aga o le 4 tasuaga ua tuana’i i nei matagaluega e tolu ua soofa’atasi. O ta’aloga lava latou o le a faia ‘au ta’a’alo a matagaluega ta’itasi e milo ai le fa’atautaiga o ta’aloga i le 21 matagaluega a le SISDAC i le Lalolagi.

O le masi’i lea e fa’amoemoe i totino uma o le ekalesia, aua e tofu sao mo nei galuega fa’atino o le fonotaga ma ua iloga ona mamao fo’i le nofoaga e fa’atino ai le fonotaga aua o le SISDAC sa amata mai i lona Ofisa Autu i Aukilani Niu Sila, ona si’itia mai lea i Samoa ina ua mae’a fa’atula’ia ai latou Malumalu tetele ma galuega uma ua fa’atautaia ai.

Peita’i o lenei tausaga ua i ai le malumalu tele o le Matagaluega i Aukilani o le a fa’aulufaleina i lenei fonotaga, ma ua manatu ai ina ia usuia le fonotele 2022-2023 ma molimauina ai e matagaluega uma o le Ekalesia lea foi Nila o le Atua i Aotearoa.

“Ua fa’afetaia lea fo’i avanoa e feiloa’i ai ma isi uso uma i le galuega, e le faigofie ae o lo’o fai ma le fa’atuatua, ua tapena fo’i le matagaluega i le mea sili e mafai ona fa’atino ai le sao o lo ua lautogia mai e le Fa’afaletolu, ua tu’u i ai le atoatoa o le mea e mafai ona fa’atino, aua le tala fa’aevagelia ua tapena nei.” O se tala lea a le ta’ita’i Matagaluega Aumua Fa’asega Ah To.

 I le taimi nei ua tapena e le tagata lona visa i so’otaga i laina tafa’ilagi, e aofia ai uma lona aiga, ae  a oo loa i le pasese mo le aumalaga, ua sailia fa’atasi e ekalesia ina ia fa’afaigofie ona totogi fa’atasi o latou pasese e malaga uma ai fa’atasi. O le aotelega o le Ekalesia atoa i ona lala e tusa ma le 120 tagata e aofia ai fanau talavou e malaga uma lava mo ta’aloga soo ma isi matagaluega faapea ma sao ua atofa mai.

Tau ina ia manuia sailiga ma taumafaiga uma ia sao ma uli le fa’amoemoe o lea fo’i tovine aua fonotaga fa’apitoa e ao ina auai atu i ai.

I’UGA O FONOTAGA ATOA O SAMOA - TALIA LE AUMAIA O A’ANO MANU FASI MAI SAMOA:

E tusa ai ma i’ugafono ua fa’asalalau mai e le au fa’asalalau na malaga a le kovana, ua talia nei e le Malo o Amerika Samoa le fa’aulu mai o a’ano o manu fasi mai Samoa i Amerika Samoa nei. O le fa’aiuga lea na maua mai le usugafono ia Oketopa 13-14, 2022 lea na talimalo ai Samoa.

E ese mai le talia pea o isi uma fua o fa’aeleeleaga o lo’o mafai ona fa’aulu mai i Amerika Samoa, ua mafai nei ona fa’aulu mai ai ma le Povi Masima, Sosisi, fuamoa, ma apa pisupo ua mae’a gaosia mo fefa’ataua’iga a Samoa, ma ua pasia nei i le tualaga lelei gaosia ua i ai.

Ua le fa’ailoa patino mai pe o le mafai lea ona fa’aulu mai o nei oloa uma e mo le fesoasoani i le fofoga taumafa o aiga, pe mafai ona fa’aulu mai mo fefa’ataua’iga fa’apisinisi i le atunuu.

Ua mae’a ona fa’atulaga fa’atasi e le afioga le Palemia o Samoa ma le tatou Kovana Sili ni a la’ua komiti Fa’afoe latou te taga’i toto’a lelei i le mautu ona aiaia o nei fefa’ataua’iga ma le fa’aulufaleina mai o fua o fa’aeleeleaga ma le a’ano o manu fasi mai Samoa i le teritori.

“O le fonotaga lea sa matua fa’ailoa ai le taua tele o fagotaga i totonu o Samoa Atoa, e ao ina aoga atili i le tamaoaiga tausi o faigamalo e lua i le Atu Samoa. Ua faafetaia ai fo’i ma le fesoasoani a Samoa i le aufaigaluega mo le Star Kist Samoa ma ua iloga le aoga i le tamaoaiga tausi o Samoa na lua. I le taimi nei ua tusa ma le 85% o le aufaigaluega a le Star Kist e auina mai Samoa.” O se tala mai lea i le fa’asalalauga fa’amaumau o le fonotaga.

E ese mai fo’i le talosaga mai Amerika Samoa mo ni tagata faigaluega i le Kamupani I’a a le Star Kist Samoa, ae ua faapea fo’i ona i ai talosaga mai Ausetalia ma Niu Sila mo talavou fo’i e fia faigaluega faavaitaimi i o latou atunuu. Ua mafai ona ofoina mai nofoaga e nonofo ma fa’amautu ai a’o faigaluega ma ua saunia ma sainia fo’i latou Konekerate faigaluega, ia mae’a le vaitau o moomia e galulue ai ma toe taliu mai i Samoa.

O se mea sili lava, o lo’o mataituina i nei konekarate faigaluega mo so’o se atunuu i fafo, aia tatau ma le tausia lelei o tagata faigaluega mai Samoa.

O le aumalaga mai e faigaluega i Amerika Samoa mo le Kamupani i’a, o lo’o tu’umamaina lava avanoa e mafai ai ona talosaga e toe malaga atu i Samoa mo ni fa’alavelave e ono tutupu mai i o latou aiga a’o faigaluega ai iinei.