TALA I VAIFANUA

Pago Pago - AMERIKA SAMOA

TUUMALO LE AFIOGA LE ALO O SALAMASINA - SATELE GALUMALEMANA SATELE

O le tauaofiaga a le Maota Maualuga o le Fono Faitulafono a le tatou Malo i le aso 22 Setema, 2022 na tomua lava i le latou 3 minute o le tatalo le leoa e faamau ai lo latou nofo fa’anoanoa ona ua tu’ua e se tasi o latou pa’aga i le galuega le Maota ma ua malolo tumau, le afioga le Alo o Salamasina Satele Galu Satele, mai galuega ma mea uma i lenei olaga.

O le afioga le Peresetene o le Senate, Senatoa Tuaolo Manaia E. Fruean sa ia tula’i ma fa’ailoa atu, “Le mamalu e o le Senate, e ao ina outou silafia, ua faia se tasi o poutu toa i le tatou nei Maota, ina ua tu’ua le malo e lana afioga le Alo o Salamasina Satele Galu Satele lona nofoa, ae malolo mai ona tiute uma i lenei lalolagi.”

Ua fa’ailoa mai e se tasi o le fanau, e afua i le tusa ma le tausaga atoa nei, talu ona po’ia le tama matua i gasegase ma sa tele lava taimi e saili togafitiga lava i le falema’i ma toe te’a mai i tua. Sa i ai se manatu fo’i o le fanau, ua maloloina o ia, peita’i na faate’ia lava i latou i le vave o le suiga o le soifua o le tama ma maliu ai loa i le aso 21 Setema, 2022.

Ua iloga le tula’i mai o lea tama i ona tofiga fa’ata’ita’i o le atunuu. E fa’aalia fo’i ona lona finagalo e le alofia e ia so’o se tasi pe afai e ono a’afia ai i ona taofi fa’aalia, aua e manatu tele o ia i mea sa’o ma le tonu. E mulimulita’ia e ia tulafono e fa’atautaia ai galuega a le Malo ma ina ua ia iloa e le o tonu se mea, e le auai ai fo’i ma lona taofi fa’aalia.

O le tele o mea na fa’ataututu ai taofi o le afioga le Alo o Salamasina ma le fa’auluuluga o le Malo sa tutupu lea i le faigamalo a Lolo Moliga ma Lemanu Mauga. O le tulaga lea na toe ave’esea ai fale fa’atalipasi mai le tulaga sa i ai i luma o le Laufou e pei ona fa’atautaia ai nei, o le isi lea mea sa tetele i ai taofi o lea tama o le atunuu.

O le vaitau fo’i o le fa’ama’i Covid-19, o lea lava le tama sa sili ona lalamua ona manatu faaalia e taofia femalaga’iga fa’avaomalo ina ne’i pesia ma maliliu nisi e to’atele o le atunuu. O se mea mulimuli fo’i lea sa oo lava ina ma’i, ae o ana toe tima’iga ia sa fa’aalia i totonu o le Maota Maualuga i ana sailiga tofa.

O le auaunaga a le afioga le Alo o Salamasina Satele Galue Satele sa oo ina avea ma Failatusi o le Ofisa o Mataupu Tau Samoa a le tatou Malo, i le nofoaiga a Kovana Lolo Moliga ma Lemanu PS Mauga. Peita’i i lona fa’atafa le malie lava i nisi o mataupu na feutaga’i e i latou ma le taiulu o le tatou faigamalo i lena vaitau, na ia tu’ua ai lava le tofiga lea ma fa’amavae mai ai. 

Sa mua’i avea lea ma Kovana Itumalo o le Falelima i Sisifo a le tatou Malo a’o le’i tofia e avea ma le Failautusi o le Ofisa o Mataupu Tau Samoa. Na tofia nei o ia e avea ma Senatoa o Leasina i lenei nofoaiga a le Maota Maualuga o le fono faitulafono a le Malo o Amerika Samoa, lea ua tu’ua ai nei le mafutaga ma isi ta'ita'i o le Senate.

Na mua’i avea o ia ma Faipule o le Tualatai a’o talavou lana afioga, ae o le umi o lana tautua i le malo sa avea ai o ia ma Pule Sili o le Ofisa o Tiute a le tatou Malo.

Na fa’atino lava ala fa’atamali’i e agatonu i afioga i Senatoa ina ua logotala le Maota Maualuga ua fa’ia se tasi o Lupe mai le fuifui, o le to’esea fo’i lea o se tasi o tama o le atunuu ua iloga lana tautua i lona itumalo, afio’aga ma le pa’ia lasi o Aiga, i ona itu tetele ma ona itu taulagi. O le afioga Tuiagamoa Tomasi Tavai sa ia tula’i mo lea fa’ailo e agatonu i lana afoga le Alo o Salamasina.

Sa faailoa mai e le afioga Pulu Ae Ae Jr., “O Satele o se isi tama matua lea o Amerika Samoa e tautala sa’o lava ia, e na te fa’aalia lona taofi e manatu i ai, o se mea sa’o ma tonu. Ou te misia o ia aua e le faigofie ona maua fo’i tagata fa’apenei i vasega o ta’ita’i i le tele o taimi.”

O Satele ua tu’ua nei le malo ae ua atoa le 80 o tausaga o lona soifua. O lo ua soifua pea o ia e ala i si ana fanau i ana usuga e lua i lona soifuaga ma fanau a lana fanau. Fa’amasie le Atua i agaga o le fanau ma aiga ona o le tu’ua ai o le Malo e le tama matua le afioga le Senatoa o Leasina.

KEMUPENI E TAUALOA AI GASEGASE UMA - POIA AI TINA O AMERIKA SAMOA:

O lo ua fa’alauiloa mai nei le taumafaiga a le Malo i ana tautua eseese, mai matagaluega se’ia oo i faalapotopotoga ta’itasi e ‘auga latou tautua i le ituvai o tamaitai, ua mafuli i latou uma e fa’atino le Kemupeni, ia mataituina uma gasegase o lo’o lutia ai le vasega o tina ma tamaitai i le atunuu.

O lea fa’amoemoe maualuga na amatalia lea i le fa’atofala’iga na fa’atino i le Malae o le Suigaula a le atuvasa i Utulei i le taeao o le toe aso o Setema, 2022, le aso Faraile lea ua te’a. Ua amata fo’i i lea aso ona asiasi atu tamaitai tausima’i o le Matagaluega o le Soifua Maloloina i tua i afio’aga ma falema’i fa’aitumalo fo’i, ina ia fa’atautaia ai talavai mo Tina uma ma tama’ita’i, o lo’o moomia ona faia suega o le Kanesa o so’o se ituaiga, ma suega fo’i o le Ma’i Suka ma le Toto Maualuga, ae maise o le Ma’i Fatu ma ua matua una’ia malosi fo’i tina ma tamaitai o le atunuu, ia fa’amalositino atili, ia fa’aititia ai le soona mamafa o le tino.

Mai le Malae o le Suigaula o le Atuvasa, sa va’aia fo’i le savalia e le faletua o le Sui Kovana o lea fa’amoemoe matagofie ma auaunaga eseese sa faia latou folasaga, o a latou tautua eseese ua fa’auia ma taumafai atili ai ona tima’ia tina uma o le atunuu, ia amana’ia lo latou soifua maloloina lelei, ia fa’aumiumi atili ai le mafutaga vavalalata ma le mafana i totonu o aiga fa’atasi ma tama o aiga ma le fanau.

“E le o tau tima’ia tina e fa’ailoa atu le taua ia i latou o le mafutaga vavalalata ma fanau ma tama o aiga, aua ua silafia lelei e le tina lo latou aoga tele i lea li’o taua ma lona sao i lana fatuaiga tausi. Peitai o le ala e fa’aumiumi ai lea mafutaga, o le taga’i toto’a lea o le tina i lona soifua maloloina lelei, aua e mua lava lo tatou popole i le soifua maloloina o le tama ma le fanau, ae fa’atu’utu’u lava lo tatou toe vaai ifo ia i tatou lava. Ua matauina fo’i, le vave ona tu’ua e tina o nisi aiga le mafutaga, ona ua tuai ona toafitia o tatou gasegase, aua ua le ave ia i tatou le fa’amuamua, ae fa’atuai lava ona tatou sailia togafitiga mo i tatou tina.” O se saunoaga lea a le faletua ia Maryanne Ale.

Na asiasi ane o ia i le itu o lo’o taula uma i ai taumafaiga a le malo ina ia fa’alava le tausiga a tina uma i fanauiti e afua mai lava i le taimi o lona ma’itaga se’ia oo i le 5 tausaga o le tamaititi, lea e fa’atino mai e le Polokalama a le WIC o le Matagaluega o Alagamanuia mo Tagata Lautele, faapea ma isi laulau eseese aua le tausiga o le soifua maloloina o tina.

O le tele o tima’iga, ia vave ona faia se talavai e fa’amautu ai pe ua maua i le gasegase pe leai. O nisi nei talavai, ua na’o le faia lava o se suega faigofie, a e mautinoa ai e le o a’afia, ae afai fo’i o a’afia i se gasegase tumau lea, ua vave ai ona fa’ailoa mai vaifofo e ao ina faia ia mautinoa e faigofie ai ona toe te’a lea gasegase tumau ma oe.

O lo ua auga fa’atasi nisi o tautua a le Malo ma isi fo’i fa’alapotopotoga tumaoti, e pei la o auanaga mo tina uma e maua i le Kanesa  e sailia lava mai talavai e faia i le OBGyn a le falema’i, ae a mautinoa loa ua maua, ona fa’auia mai lea o se fesoasoani tautua tupe mo le tina ina ia fa’amalosia lona alu e saili togafitiga pe faia lona taotoga, e pei ona fautuaina ai e le foma’i.

O lo ua i ai fo’i le Matagaluega o Tina ma Talavou a le tatou Malo, lea ua fa’aauala mai ai le tele o fesoasoani mo tina ina ia mafai ona fa’a’auupegaina i latou i tomai e mafai ai ona maua ni a latou galuega, pe afai e ie’i mafai ona maua taleni e gafatia ai ona faigaluega i latou ma tausia nai a latou fanau a’o fa’amoemoe le olaga o le fanau ia malupuipuia lelei e latou matua i totonu o aiga.

Ua i ai le vasega o faamaumauga uma mai le Matagaluega o le Soifua Maloloina, lea ua fa’atula’ia e igoa o “LIma Fesoasoani” poo Helping Hands lea e mafai ona fesoasoani i tina mo le tausiga lelei o fanauiti.

I le lotoifale o aiga ta’itasi o le tumama lava e fa’asinotonu lea matata i le tina, ma ua iloga foi ona tima’ia  aiga ina ia taga’i toto’a e fosoasoani tele i tina i le tauavea o nei matata pe a oo ina talavou le soifua o le fanau ma le tama fo’i o le aiga. 

“E pei lava o le isi lea mea e mafua ai ona le maua se taimi paganoa o tina e o mai ai e faia latou talavai ma sailia poo maua i gasegase tumau, aua e mua lava lana taumafaiga ia mautu uma mea mo le soifua maloloina lelei o fanau ma le tama o le aiga, ae mulimuli lava tepa ane ia te ia. O le popolega fo’i ia te ia le tausiga lelei i aso ta’itasi, e vave i le fale e tapena le mea taumafa ma le fale ia lelei a’o le’i manava atu galuega a le tama o le aiga.” O se fa’asoa mai lea a se tasi o tina sa oo ane e maimoa ma tima’ia o ia i le Kemupeni tele lea a le Malo na fa’atautaia.

I le vaega o le tautua lautele i gasegase pipisi sa oo ane saofa’i lelei ai le tamaitai foma’i o Francine Amoa ma sa ia fa’ailoa se mea sa ia maua mai le tele o taumafaiga na fa’ato’a uma atu nei mo le Covid-19. 

“Ua matauina o tina lava e oo ane ma fanau, e le to’atele ni tama e alu atu na’o ia e avatu fanau e faia tuiga puipuia, e iloga lava o tina e pa’u i ai le mamafa o lea pitola’au tausi i totonu o aiga.” O se tala mautinoa lea a le tamaitai foma’i fa’apitoa mo fa’amaumauga ma togafitiga o le Covid-19.

Sa oo fo’i i le auaunaga lea ua fa’asifo mo meaola fa’afagafao, ua fa’ailoa mai, e to’atele lava o le atunuu o tina e vala’au atu ina ia faia tui o meaola e puipuia mai ai i fa’ama’i ina ne’i afaina le fanauiti ma sui fo’i o aiga ina ua le soifua maloloina latou ta’ifau ma pusi. 

O le kemupeni lea ua faia mo le fa’alauiloaga o auaunaga uma ua ofoina mo tina, o le a fa’aauau pea lava se’ia oo ia Iuni 2023, ma ua fa’atulaga le Liki Kirikiti a tamaitai o le a amatalia lea ia Oketopa 03, 2022. Ua tatau ona lava tapena fo’i ‘au Kirikiti a afioaga ta’itasi mo lea fa’amoemoe lelei.