TALA I VAIFANUA

Pago Pago - AMERIKA SAMOA

ULUA’I AOAOGA FA’APITOA TAPENA “AMATAGA FOU” MO LE 8 VAIASO

O le faletua o le susuga le Foma’i Dr Gebhard, le tamaitai o Helen Gebhard sa ia fa’afoea lenei semina, ma o le fa’aautu o lea polokalama na malaga mai ma ia, “Ose Amataga Fou” ina ia mafai ona fa’ailoa atu i le mamalu o le atunuu e maua i le Ma’i Suka, ala e mafai ai ona soifua pea ma mita’i lou lea gasegase a’o fa’aumiumi le mafutaga mafana ma lou aiga ma uo mamae.

O lea polokalama o lo’o fa’atautaia i le Setete o Utah, ma ua aoga tele i tamaitai na soifua a’e i atumotu e aofia fa’atasi ai uma malo fa’aatumotu o le Pasefika, Tonga, Samoa, Fiti, Amerika Samoa ma isi uma atumotu o le vasa pasefika.

Ona o lenei tina o se tasi e masani ona fa’atautaia fonotaga fa’apenei i lea setete sa soifua ma tautua ai, o lea ua ia fiafia e na te fa’aulufale maia fo’i lea faiga fou ma mita’i ai se suiga lelei mo i latou ua fa’aolioli mai o le a a’afia i le ma’i suka, ina ia toe mafaia ona liua e i latou lea tulaga ae toe fo’i i le malosi lelei.

Ua faamoemoe tele lea polokalama i le tausami paleni, fa’atele fuala’au ‘aina i lau ‘aiga e tasi fa’atonu i le aso, taofia le tausami na’o mea ‘ai suamalie pe oona fo’i, ae ia fa’apaleni lelei au ‘aiga uma e tolu. 

E ese mai lea, ua naunau lea polokalama i le suiga lelei e fua mai ona ua auai fa’atasi le aiga atoa i le lu’iga lea, ia le maua se tasi o le aiga i le ma’i suka.

“E tatau ona amata mai lava le mataituina o meaai e fia fa’atau mai i le fale mai le faleoloa, seia oo i le kukaina o mea’ai ina ia ave’esea lava le tele o mea lololo ae fa’aaoga na’o le a’ano o manu e leai se gao o i ai. Ua fa’apea fo’i ona faamalosia matua ina ia fa’atau mai le tele o fuala’au ‘aina mo aiga fa’avai’aiga a le fanau, ae le fa’atau mai le tele o mea’ai gaosi mai falegaosi oloa e i ai Bingo, chips eseese ma ia mea fa’apena e tele i ai le masima.” 

Mai le ulua’i aso ua fuaina pauna ma fa’amaumau le uumi ma le lautele fo’i o le tino, o ia mea uma e toe fuaina i vaiaso ta’itasi e 8 ua faatulaga ona fa’ato’a toe va’ai pea o a mai se suiga i le sui ma ona faitauga, poo aga’i i luma pe leai. O le taumafaiga lava ina ia mautu le fa’amalosi, “Ia fa’aititia le Ma’i Suka i Amerika Samoa.

Ona o lea fa’ato’a amata le polokalama aoga lenei, ua talo atu ai i le to’atele ina ia auai, ae maise pe afai o oe o lo’o e taumafai ma fa’amalosi ina ia le maua oe i le Ma’i Suka. Lesitala lou suafa i le DYWA i ona sui totino ua fa’amauina i lenei taumafaiga, Amy Seui ma Mrs Peko. 

O le isi fonotaga o le 10:00 am i le Aso Gafua o le vaiaso fou, ma ua moomia lava ona fa’atamo’e le taumafaiga lenei ia iloga fo’i le aoga aua e i ai lava lau tusi o fa’amaumauga e ofoina mai, ia mafai ona tumau lou fa’amoemoe maualuga, ia le lisia lou suafa i le lisi o e ua maua i le ma’i suka i Amerika Samoa.

Manatua o togafitiga masani lava, ia lava le fa’amalositino, ia ‘ai mea’ai paleni, ia naunau e fa’atino lou mana’oga i aso ta’itasi, aua le fa’atuai, ma ia e to’aga e fa’amautu lou fa’amoemoe, ia e soifua maloloina.

FONOTAGA KOVANA LEMANU  & LANA KAPENETA

I le fonotaga a Kovana Lemanu Mauga ma lana Kapeneta i le aso Gafua, ua mafai ona ia fa’afetaia ai le mamalu o ana Fa’atonu o lo’o tutula’i mai tautua eseese a le Malo, aua ua latou faia le auaunaga, ma ua iloga fo’i ona latou fa’ao’o le tautua mo le mamalu lautele o le atunuu.

Ua fa’ailoa atu fo’i e Kovana Lemanu i lana kapeneta le latou paketi fa’asoa ma le paketi fa’aopoopo ua tuuina atu i le iloiloga a le fono faitulafono e pasia mai.

Ua ia fa’ailoa atu fo’i, “E mo’omia lava ona tatou galulue fa’atasi mai i le taumafaiga lea ua fa’atulaga e fa’aaoga i ai le tele o le paketi faaopoopo ua talosagaina. O galuega mo le Manu’atele lea e moomia ai lea paketi fa’aopoopo ua talosagaina, aua ua tatou iloa uma lava le tele o fa’afitauli o lo ua fa’aolioli mai i le lumana’i mo tatou uso uma i le Manu’atele.”

“Ua tatou iloa lelei le tele o omiga e feagai ai ma i latou o lo’o alaala tumau i Manu’a. Sa umi se taimi e le o mafai ona taula mai va’a i uafu o Manu’a, e i ai le isi va’a e alu atu e la’u i ai uta ma pasese ona aumaia lea e le va’a la’ititi lea uta ma le mamalu o le pasese i le Uafu. Afai e pau ai se uta i le sami. ua fa’aleagaina uma lena vaega o oloa ma mea totino a lena aiga. O le tele o taimi e toe a’au lava tagata o aiga e taumafai ona fa’afo’i mai latou uta i le uafu ma taumafai e fa’aaoga pea mea sa la’u mamao atu mo i latou. Ua lamatia le soifua ae maise ua le aoga oloa na uta atu.”

“O lo’o tele le mana’omia i le Manu’atele, ma ua alagatatau ia i taotu o ta’ita’i o matagaluega ma tautua eseese a le Malo ona faao’o atu nisi o tautua o lo’o faia uma i Tutuila, e tatau fo’i ona fa’apena le tautuaina o tagata i le Manuatele.” O se toe tima’i lea a Kovana Lemanu i lana kapeneta.

Sa fa’ailoa atu fo’i ma le agaga fiafia ma le fa’afetai le talia mai e le Peresetene o le aafia ai o le atunuu i le KingTide lea na tupu ia Iulai 12-15, 2022.

“E moomia ona tatou galulue a’ia’i ia fa’atulaga uma fa’amaumauga tusitusia ma le fa’amaoni lava ina ia pasia lelei le toe fa’aleleia o nei mea na fa’aleagaina i le malosi ma le maualuluga o galu fa’apea ma le matagi malolosi na to fa’ata’uta’u mai i lena vaitau i Manu’a ma isi nofoaga uma o Tutuila fa’apea ai ma le motu o Aunuuu. Taitai uma ia nofouta i le sa’o ma le lelei ona fa’atino o faamaumauga uma e moomia mai e le FEMA, aua ne’i fa’aletonu se mea ona o le fa’atalale e faatino o tatou tiute mo le Malo ma o tatou tagata.”

O isi mataupu sa talanoaina o le tulaga o le faamanatuga o le Kerisimasi ma le Polokalama ia Tesema; Sisigafu’a o le tausaga 2023 ia Aperila, ae o le mataupu mulimuli o le Tatalaina aloaia o le Lions Park i Tafuna.

Na fa’afetaia lava e le susuga le Sui Kovana Talauega Eleasalo Ale le mamalu o le Kapeneta aua o lea ua tauau ina fa’ai’ui’u lava le vevesi tele i le Covid-19, ae ua tutumau lava le galulue fa’atasi ma le felagolagoma’i i lo latou va ae maise o le tautuaina fo’i o le atunuu.

Ua tima’ia fo’i i latou uma lava o taiulu o matagaluega ina ia auai uma i mea ua fa’atulaga i le polokalama mo le CoastWeek  la e fa’atautaia e le Matagaluega o Fefa’ataua’iga ae maise fo’i o le Fonotaga Fa’aitoa e fa’alauiloa ai fa’alavelave Fa’afuase’i Fa’anatura lea e ia Setema 27-29, 2022, lea e fa’atautaia e le Ofisa o le ODAPM.

FOAI ROTARY CLUB - MO LE HOPE HOUSE

Ua fa’ailoa le foa’i tele ua asia ai e le Rotary Club o Pago Pago le Hope House i Fatuoaiga.  O le foa’i ua fa’ailoa mai o le tele o ili e mafai ona fa’atautau mai le taualuga o potu o sui ta’itasi ma ua faapena fo’i ona avanua ma nofoa e ta’otooto, fa’alue ai ma moe le matua, ae maise o le Pusa Aisa e mafai ona teuina i ai vai e tausia ai le soifua maloloina lelei o matua ua tausia fa’apitoa i lenei Adult Care i Fatuoaiga.

O le asiga a le Rotary ua faataunuu nei, aua o nei matua matutua o nisi ua loa ona tautuaina le atunuu e afua i a latou pisinisi sa fa’atautaia, poo ni tofiga fou sa tutula’i ai ma galulue i le Malo o Amerika Samoa, ae maise o Ekalesia o loo fa’aauau pea ona galulue ai.

Ua fa’aioa mai e tolu nofoa fa’apitoa e fa’aluelue ma taotooto ma moe ai lava le tagata matua, 18 ili ua tuuina atu e mafai ona fa’aili ia malu ai le nofoaga atoa, ma pusa aisa e tasi mo le teuina o latou fuala’au vai mo latou togafitiga e fa’ainumia i aso ta’itasi.

I lea aso na asia ai e le Rotary Club le nofoaga ma faia le foa’i, sa matua fa’agae’etia loto o i latou uma ua tausia fa’apitoa ai i lea nofoaga ma ua fai faigapese ma ua sisiva ona o le agaga o le fa’afetai, ma sa fa’aalia fo’i le agaga fa’afetai tele o le tamaitai tausima’i Frances Saelua ona o le agaga tausimatua ma le alofa, na fa’atino ai lenei foai e le Rotary Club i lenei tausaga.