TALA I VAIFANUA

Pago Pago - AMERIKA SAMOA

TAOFIA SUEGA COVID-19 PE TAUNU’U MALAE VA’AELE I TAFUNA

I le fonotaga o le aso Lua na pasia ai e le Komiti Fa’afoe o le Covid-19 o le a le toe faia ni suega o le Covid-19 pe a to’ai taunuu i le malae va’alele i Tafuna e afua lea ia Seteme 19, 2022.

O lea mataupu sa fa’ailoa e le Matagaluega o le Soifua Maloloina i le taimi o le fonotaga. Ma ua fa’apena fo’i pasese e taunu’u mai i le malaga a le MV Lady Naomi, ae le taulia ai isi va’a e taunu’u mai i le teritori, e pei o va’a la’u oloa.

Fa’ailoa e le Matagaluega o le Soifua Maloloina e fa’apea, o le a fa’amauina le fa’ata e faitauina ai le vevela poo le fiva o e femalaga’i i le Malaeva’alele. Ma e fa’aaogaina le TalofaPass ina ia mafai ona toe siakia lelei ai tagata uma e malaga mai i le atunuu.

Ae ua fa’aauau pea lava ona faia tuiga puipuia o le Covid-19, e fa’amalosia fo’i le lua tui puipuia mo e faimalaga mai.

I se vaega o le lipoti a le Soifua Maloloina o lo’o fa’ailoa ai mai ia Setema 5 se’ia oo ia Setema 11, 2022 e 1,047 suega na faia ae maua ane e toa 18 i latou ua fa’amaonia i le  Covid-19 ma ua oo ai le aotelega o le faitauga o i latou ua maua i le Covid-19 i le atunuu i le 8,835, o e uma lava talu mai le Fepuari 21, 2022. 

FA’APA’IA 2 PAOPAO - FA’ATAUTAIA, TAOA ‘AOAOGA FA’APITOA FA’AALIGA A TAUTAI

O le sauniga sa fa’atautaia i le Malae o le Si’ugaula a le Atuvasa i Utulei, sa fa’aauau ai le sao o le vaega o le Fa’asao a Amerika Samoa i le Gataifale (National Marine Sanctuary of American Samoa - NMSAS), e fa’amanatu ai le latou 10 tausaga talu ona fa’atula’ia mai i le atunuu. 

O lea sauniga mamalu sa mua lava siitia e viia le Atua foafoa, na siitia lea e le susuga le Faifeau Patolo Mageo o le CCJS i Pago Pago.

O le Faaaliga Fa’apitoa a Tautai i le taeao o le Aso Lulu sa fa’apa’ia ai le sao o fanau a’oga e to’a 30 mai a’oga maualuluga i le teritori sa latou taina ai Paopao e lua i le taimi na fa’atautaia ai le polokalama e fa’afaigaluega ai i latou i le tu’uaga umi o a’oga na te’a nei.

Ua le mafai ona fa’amatu’u mai nei fanau i a’oga maualuluga o lo ua ao’oga ai i latou, ae sa auai o latou faia’oga sa a’otauina i latou i lea fa’atofala’iga taua tele.

O Rev. Ioane Matafeo ma Rev. Faleagafulu Filipo le Matuaofaiva, sa galulue fa’atasi ma aoao le fanau lenei ina ia iloa lelei mea uma e ao ina faia, ia ta ma faamae’a lelei paopao ua maimoaina e le mamalu lautele sa aofia i le Malae o le Suigaula a le Atuvasa.

Ua asia fo’i lea fa’amoemoe e le A’oga a Manumalo Baptist Academy, ma le a’oga a Fa’asao Malisi sa auai fo’i o latou sui mamalu ma faia’oga, ma sa autasia tagata uma na auai  e maimoaina  le gaosiga o nisi o measina taua a le atunuu e le vasega o matua matutua i le TAOA. Ua aoaoina ai i latou ma sa va’aia le naunau o fanau talavou e fia iloa ona latou lalaga ma faia tiute uma i le gaosiga o nei meaina a le atunuu.

Ua va’aia le so’otaga ua fa’amautuina i le va o fanauiti ma talavou o le atunuu o lo’o ua aofia i a’oga tulaga muamua ua latou a’oa’oina tomai ua fa’amatala ma fa’aaoao ai e o tatou tama ma tina matutua o le atunuu, o lo’o moe i ai le tofa ma le mau o nei faiva eseese ma o lo’o aofia i le Polokalama a le TAOA.

O nisi o measina a Samoa sa fa’aalia le gaosiga e aofia ai le saunia lelei o le Faguu Samoa e fa’amanogiina i fuga o le moso’oi. Sa maimoaina ma fa’aaoao ai fanau a’oga talavou. O le sauniga o Matofi, ma le filiga o le ‘afa lea ua va’aia e fausia ai le Paopao i ona so’otaga o le ama, lagofoe, ‘iato ma tuitui aga’i i le Liu o le Paopao, o se mea ua fiafia le fanau e fa’ata’ita’ia a’o maimoaina tama matutua o gaosia lea measina a Samoa.

O le fa’amasina o Laufala ma le taumafaiga ia gaosia lelei le laufala e  lalaga ai fala, ato tui ma isi oloa masani ona fa’aaogaina ai, e aofia ai ma Ietoga sa fa’ataita’ia fo’i e tina matutua mo le fanau talavou. Sa i ai le itu na aoaoina ai fo’i le lalagaina o Mailo ma isi mea uma e fa’aaoga i ai le Launiu, o pulou ma Ili ma ato e fu’e i ai le suavai.

O le isi mea sili ona taua, o le fa’amatalatalaina o fagogo e fiafia i ai le fanau e fa’alogologo ai. O le tama’ita’i fa’atonu o le TAOA, Faletua o Evelyn Satele sa fesoasoani lea i le tama o Tafaovale Anoa’i mo lena faiva lelei tele.

O le galuega sili ona mata’ina, o le tuuina i le tai o paopao na taina e le fanau a’oga i le tuuaga o a’oga. O Rev. Ioane Matafeo sa ia fa’amatalatala le gaosiga ma le taina o le Paopao ua maimoaina nei e le lautele ma o le a tu’u i le tai i le taeao lava lea.

O le Moso’oi le la’au ua fa’aaogaina mo le taina o le Paopao. E aoga lea la’au ona e mama lona laupapa, e mafai ona mautinoa lelei le opeopea i le tai. O le vanega ma le Taina o le Paopao sa fa’aaogaina ai To’i Savi ma le To’i Pua. O le aga o le va’a ua vane ese mai ai le malamala ina ia lava ma totoe le Liu o e paopao e nofo ai le tautai fagota ma tuu ai fo’i ana i’a o lona faiva.

E iloga le taumua o le va’a i ona teuteuga ina ua mae’a ona ta, ma lona taumuli ua na’o na fa’aofuofu mai i totonu ia iloga gofie ai o le taumuli lea o le paopao. Ama o le va’a e fapaleni ai lona opeopea lelei i luga o le tai, e toe fa’aaogaina ai lava fo’i le Moso’oi e lua ona “Iato e fa’aaoga ai le afa e fafau fa’atasi ai le Ama i le Liu e fa’aaogaina ai le afa, ae le ni fao. E tasi le Lagoofe e fa’avi lona pito i luga ina ia mafai ona tautau ai le afa fagota. I le fafauga o Iato e lua e tofu le itu ma tuitui e lua e fa’amausali atili ai le so’otaga lea ina ia le toe mamulu gofie pe matagataga i le sousou o le vasa. O laau e lua e fa’alalava i luga ane o le ama, ua fa’aigoaina o Lagofoe, e tuu atu i ai e le tautai lana foe ae se’i malolo mai le aloina o lona paopao.

Ina ia mae’a ona fa’atamatala vaega eseese uma o le Paopao ma lona fausaga, ona fata loa lea o le Paopao sei’a tuu i le Tai.

E to’afa taulele’a sa fili fa’apitoa latou te fataina atu le Paopao i le matafaga ma tuu atu i le Sami, sa opeopea lelei lava le Paopao ma o le ulua’i tautai na ia fa’afoea le paopao o le susuga Tiatia mai le a’oga a Fa’asao Malisi. O le ‘aiga fiafia toe mamafa sa fa’ai’u ai fo’i le fa’atofala’iga mo Tautai i lea aso iloga e fa’atauaina ai faiva uma e aga atu e fa’aaoga mo Tautai ma o latou tomai moomia fa’apea ma auupega e fa’aaogaina e i latou a’o faia o latou faiva i le alamoana.

AFIONA MARINER FA’ASAVALU, PULE SAMOA AIRWAYS I PAGO PAGO

O le masina ua te’a na fa’ailoa mai ai e Salevalasi Tauiliili Afiona Mariner Fa’asavalu ua filifilia o ia e avea ma Pule Sili o le Samoa Airways i lona Ofisa i Amerika Samoa. 

O le tausaga e 2019 na fa’amavae aloa’ia ai le susuga Toe Loia sa avea ma Pule Sili o le Samoa Airways i Pago Pago i tausaga ua te’a, ma na amata ai loa ona tautua Fa’asavalu ma Sui Pule o le Samoa Airways, ae tutupu loa ma le tele o a’afiaga o femalaga’iga ona o le Covid-19 ua fa’amamaluina ai le fa’asa ma fa’asolo mai ai lava se’ia oo ina iloiloina e le Samoa Airways i lona Ofisa Ulu i Samoa se tasi e avea ma pule i Amerika Samoa.

E tusa ai ma le fa’amatalaga ua tuuina mai e le pulega a le Sama Airways e to’a 4 i latou na tusi talosaga mo lea avanoa, e to’atolu ali’i ae to’atasi le tamaitai lea ua pale nei i le tofiga. 

Mai le tausaga 2012 na amata ai ona fa’afaigaluega e le Kamupani Va’alele a le Samoa Airways, a’o igoa o le Kamupani Va’alele a le Polenisia.