TALA I VAIFANUA

Pago Pago - AMERIKA SAMOA

TATALA GALUEGA E LUA & SUA LE ELEELE MO LE FALEAOGA FOU 

E moni ai le saunoaga a le afioga Kovana Lemau PS Mauga i lana folasaga sa ia saunoa i ai i le tatalaga o nei galuega, “o nei gallega uma ua mae’a fa’ataunuu ma ua mautinoa e aoga mo le tupulaga fai a’e o Amerika Samoa, e tatau ona faia mea sili mo le lumana’i o tatou fanau, e tatau fo’i ia i tatou matua ona tuuina atu ia i latou avanoa lelei ma siomaga lelei tapena mo i latou e a’oa’oina lelei ai.”

O le aso Lua na a’e ai a’oga a le malo, ma e tolu galuega a le Matagaluega o A’oga na fa’atautaia ai. Na tatalaina le falea’oga fou i le Alataua ll Elementary School, ma le suaina o le eleele mo le isi faleaoga fou o lea lava aoga i Nua ma Seetaga. 

Ona soso’o lea ma le auai mai fo’i o le afioga le Kovana Sili ma le Faletua Ella Mauga ina ia tatalaina le Fale Ta’alo o Manulele Tausala Elementary School.

“O isi nei galuega ua manatu le faigamalo e ao ina fa’ataunuuina aua le a’otauina o fanau o lo’o sailia le atamai, o le tiute fo’i o le malo e ao ina fa’ataunuuina aua le lumana’i o le malo o Amerika Samoa, ia gafataulimaina e ona tupulaga faia’e le lumana’i ma o latou fo’i lu’iga e feagai ai ma i latou,” o se toe fa’aopoopo atu lea a le afioga i le Kovana.

O le falea’oga fou a Alalataua II Elementary sa fausia lea e le Kamupani a le Jay’s Construction i lalo o le pulega a Sam Lei Sam. O le fuafuaga fa’ataoto o le fausaga o le falea’oga lea e aofia atoa ai le umukuka, fale’ai ma faleta’ele ae 4 foi falea’oga ua mae’a aofia ai. Ua i ai ma le potu fa’apitoa mo le pulega ma le Ofisa o le Pule A’oga.

O le tau aofa’i o le galuega e $1.6 miliona ma sa fa’atupeina i tupe o le Covid-19 a le Matagaluga o Aoga. 

E pei ona fa’ailoa i pepa o fa’amatalaga mai le Ofisa o le Kovana, o le  Jay’s Construction ua faakonekarate e fausia le isi faleaoga fou i Alataua II Elementary. 

O le Manulele Tausala  o lo’o fa’aigoina i le suafa o le faletua o le Peresitent o Amerika, ia Lady Bird Johnson, sa umusaina i le aso 18 Oketopa 1966.

Na fa’tautaia galuega o le faleta’alo i Manulele Tausala elementary e le Quality Painting Construction a le tofa Atuatasi Jerry Seigafo ma o le faleta’alo lea e 120x75x140 le umi ma ua aofia ai i totonu ma faleta’ele mo tamaitai ma ali’i o fanau a’oga i le Laumua i Nuuuli. O le tau aofai o lea faleta’alo ua fa’ailoa mai e $1,106,800 ma ua fa’atupeina lea e le fa’atupega mo galuega e fa’atautaia mai e le Ofisa o le Kovana Sili o Amerika Samoa ma ua fa’aaogaina ai tupe mai le DOI mo le toe fa’aleleia o galuega sa fa’atupe e le Malo tele po’o CIP.

LO’U FATU - ATA TIFAGA TUUFA’ATASIA E LE BYU & DOH

O se ata fa’asolo pu’upu’u ua mae’a saunia lelei e le Iunivesite o Bringham Young ma le Matagaluega o le Soifua Maloloina, ina ia fa’aatagia ai le a’afiaga o i ai o tatou tagatanuu ae maise fo’i i fanau talavou i ma’i o le Fatu o lo’o ua ta’atele nei i le tatou atunuu.

Ua fa’aaoainga fo’i le MPH Center a le ASCC mo lea tu’ufa’atasiga ma le faaliga o lea ata fa’asolo aoga tele. O lea ata faasolo sa fa’aalia lea i le fa’aiuga o le vaiaso ua te’a mo le maimoaga a nisi iloga ole atunuu.

O le vasega o Fomai fa’apitoa mai le Iunivesite o Bringham Young na malaga mai mo suesuega ma togafitiga mo fanau uma lava ua a’afia i le Rheumatic Fever Relief Team, poo gasegase tau le fatu, ua mafai ona latou tuufaatasia lea ata fa’asolo taua tele i le Gagana Samoa.

Ua fa’ailoa mai o le a fa’aaogaina tatau lea fo’i ata fa’asolo e fa’atautaia ai nisi o fa’alauiloaga taua o lea ituaiga o gasegase i le atunuu e le o toe mamao. O le taumafaiga lea a le Matagaluega o le Soifua Maloloina a le tatou Malo ina ia fa’aititia atili le to’atele o fanau talavou mai le maua i le RHD poo ma’i fatu.

Afai e te le’i maimoaina lea lava ata fa’asolo fa’asamoa, o le a maua lava lou avanoa i le taimi o le a fa’alauiloa fa’alaua’itele ai fa’asalalauga fa’alaua’itele mo le silafia a le mamalu lautele i a’afiaga ma ala e puipuia ai lou sui mai le a’afia i ituaiga gasegase eseese i le fatu.

O le igoa o lea ata faasolo ua fa’aigoaina “Lo’u Fatu.”

FA’AMONIA LE ISI 21 TAGATA FA’AMA’I O LE COVID-19

Mai fa’amaumauga a le Matagaluega o le Soifua Maloloina mo le Covid-19 ua fa’ailoa, mai le 1,835 suega Covid-19 na faia mai ia Aukuso 29-Septema 04, 2022  e na’o le 21 i latou na fa’amaonia ua maua ai le verusi Covid-19. Ua maua ai nei le aofai o i latou ua maua i le covid-19 i le aotelega e 8,217 tagata talu mai le aso 28 Fepuari, 2022.

Ua leai se tasi na toe taofia i lea vaitau atoa, ma o lo’o tumau pea lava le aofa’i o e ua maliliu ma lisia ua afua ona o le maua ai i le Covid-19, i le na’o le 34 i latou.

I le taimi nei ua fa’amauina fo’i le 85.4% le aotelega o le faitauga o le atunuu ua mae’a faia tui puipuia e lua o le Covid-19. O le aofai o i latou ua faia na’o le tasi le tui uipuia ae le’i faia le tui lona mua ua. ai nei le 623 peita’i e to’a 2,753 i latou o lo ua aga’i atu e faia o latou tui lona lua e puipuia mai ai i le Covid-19.

I le taimi nei, e ese mai le taumafaiga a le Komiti e taofia pea le atunuu i le tulaga mama mai le Covid-19, ae amata mataituina fo’i e i latou le ulufale mai o le “Monkeypox.”

Ua fa’ailoa mai ua amata tapenapena fo’i le vasega o foma’i i le DOH ina ia lava taoso galuega suesue ma togafitiga a’o le’i ulufale mai lea gasegase i le atunuu. Ma ua mae’a ona umia fo’i ele Matagaluega o le Soifua Maloloina ulua’i tui puipuia mo le Monkeypox i le taimi nei.