TALA I VAIFANUA

Pago Pago - AMERIKA SAMOA

TOE FA’AAUAU AUINA ATU GASEGASE I NZ - POLOKALAMA MEDICAID

Ua fa’alauiloa e le American Samoa Medicaid State Agency, ua toe amatalia nei ona auina atu gasegase “non-emergency” o lo ua mae’a maua latou Medicare i Niu Sila ina ua mae’a ona toe tatala aloa’ia femalaga’iga i le va ma Samoa ma Niu Sila fo’i.

Fa’alauiloa e le tamaitai fa’atonu o le Medicaid Office, Sandra King-Young,  “Ona o lea ua tatala aloa’ia femalaga’iga i le va o Niu Sila ma Samoa ua mafai nei ona fa’aauau le tatou auaunaga e auina atu tatou gasegase ua agava’a. Ua ese mai lea, ona ua fa’afaigata fo’i ona fa’afetauia le totogi o le Medicaid i falema’i i Hawaii, ua fa’afaigata lava ona toe avea nisi o le tatou atunuu mo talavai i lea itu o le polokalama.”

O le a fa’aauau fo’i la ona auina atu gasegase mo talavai masani i Niu Sila ma ua nofo sauni fo’i Niu Sila mo le latou vaega tausi o le polokalama masani na fa’atula’ia mo le togaifitga o tatou tagatanuu, a’o le’i tutupu mai fa’afitauli o le Covid-19, peita’i e tatau lava ona mua’i pasia mai e le komiti a le LBJ/OMR.

Ua fa’ailoa mai e tatau ona mua’i talia mai e le Medicaid le tagata ma’i ma e agava’a i le polokalama , ona fa’atalosaga atu ai lea i le Medicaid late te totogia le pili mo lea sui mo le tautua o moomia.

O i latou uma fo’i e fia talosaga mo nei avanoa e siakia ai latou gasegase i Niu Sila e ao ina mua’i talia mai e falema’i i Niu Sila a latou talavai o moomia ona fa’atautaia ona fa’ato’a malaga ai lea. Peita’i pe afai e le talia mai le talosaga, o le a le mafai ona malaga lea sui mo talavai i Niu SIla. O le toe fa’atagaga lava mo se sui e malaga mo talavai, o le a tuuina lea i le Fa’atonu o le Medicaid, aua e tatau lava ona i ai le fefaatauiga o le tupe totogi mai le Medicaid mo le togafitiga o gasegase uma lava e auina atu.

I le vaitau e afua mai ia Mati 2020 lea na tapunia ai le Medicaid e auina atu ai tagata gasegase i fafo mo talavai e 625 tagata mama’i na auina atu mai le LBJ Medical Center i Niu Sila. Sa i ai nisi sa te’ena peita’i o le aofai lea o sui sa mafai ona fa’aaogaina lea tautua mai le 2017 e oo mai i le 2020.

E aofia i lea faitauga nisi sa matua masii mai va’alele mai Niu Sila e auina fa’atopetope atu mo togafitiga poo tulaga tau Medivac.

I le taimi nei e fa’aaogaina lava le iloiloga lea e fa ona la’asaga e sailia ai nisi e malaga atu mo a latou talavai i Niu Sila e faaaogaina ai le Medicaid poo e foi ua mae’a maua a latou Medicare.

Ua fa’ailoa mai ua i ai nisi o aiaiga fou ua fa’atulaga mai e NZ ina ua toe tatala mai nei avanoa nei mo togafitiga o e gasolo atu i NZ e fa’aaogaina ai le Medicaid. O lea la ua fa’ailoa mai ua i ai le NZ ETA poo le visa talosaga mo le sui gasegase ina ia maea fa’atumuina ai le pepa e ulufale atu ai i Niu Sila.

Ua ese mai fo’i ma le $300 e ao ina totogia e fa’aagaaga mo le nofoaga o le a atofa mai mo le gasegase. O lea tupe e totogi i le Medicaid Office ‘ae le’i malaga. Mo se fesili telefoni 699-4777 i le Ofisa o le Medicaid.

FAIA ASO ANANAFI FA’ATA’ITA’IGA MO FA’ALAVELAVE FA’AFUASE’I I MANU’A

I se pepa o fa’amatalaga mai le Matagaluega o le Puipuiga Fa’alotoifale i le fa’aiuga o le vaiaso ua te’a, sa fa’ailoa ai e fa’apfea o le aso ananafi sa fa’atulaga e faia ai se fa’ata’ita’iga mo fa’alavelave tupu fa’afuase’i, a le Ofisa e gafa ma fa’alavelave tutupu fa’afuase’i (EOC) i le Manu’atele, lea o lo’o fa’alogoina pea le lulu o le ele’ele.

O lea Fa’ata’ita’iga i lona atoaga, e fa’atino ai fuafuagaa a le faigamalo i le fa’atula’i vave ’eseina o tagata nu’u o Manu’a pe a tula’i mai se fa’alavelave fa’afuase’i.

O se avanoa taua fo’i lea mo Ofisa ma i latou e tali muamua atu i ia tulaga; le Ofisa e gafa ma Fa’alavelave Tupu Fa’afuase’i, le Matagaluega o le Puipuiga o le Saogalemu Fa’alotoifale, le Ofisa o Malae Va’alele, fa’apea le Ofisa o Leoleo e toe taga’i ma fetu’una’i ai tapenaga mo le fa’atula’ivave ‘ese atu, feso’ota’iga, fa’apea le galulue fa’atasi. 

O le mae’a ai o lenei fa’ata’ita’iga o le a toe Iloilo ai ni mea lelei, mea ua fa’aletonu mo le toe faleleia atili o le tapenaga a le faigamalo. O le a fa’amautuina mai lea i a’i latou ua tofia e fa’amsinoina ma togi’ina lenei fa’ata’ita’iga. 

Ua fa’ailoa e ni isi i Manu’a ua faalogoina pea lava luluga i le Manu’atele ae peita’i ua le malolosi pe tetele e pei ona fa’alogoina i le vaiaso ua te’a.

Talu ona fa’alauiloa e le vasega suesuega o fa’alavelave fa’afuase’i o le luluga o lo’o fa’alogoina nei i le Manu’atele e afua mai i se maugamu o loo tulata i Tau nai lo Ofu ma Olosega, sa fesiligia lava e le mamalu o tagata o nonofo mau i le Manu’atele, poo a ni galuega o lo’o ua fa’atulaga e le Malo mo le fa’asaoina o le soifua o i latou pe a oo i nei vaitau e tutupu ai nei fa’alavelave fa’afuase’i fa’anatura i le Manu’atele.

O se tasi lava o nei fa’afesili, ua latou moomia ai ona iloa patino pe moni lava o le fa’aletonu lea, e afua mai se nofoaga e tulaga atu i Ta’u.

Afai o Ta’u, o le a la se fuafuaga mo tagatanuu o lo’o alaala tumau i Tau? Ua fesiligia fo’i e se tasi o le afio’aga o Ta’u, pe o mafai ona fa’ailoa e le Malo ia i latou, pe mata o saogaleu fo’i le ala ua mae’a tapena e le malo mo e sopo atu ai i mea maualuluga i le afio’aga, mai le tetele o luluga ma le tauasuasu e mafua mai ona o maugamu ua pa i le atunuu, ae o lo’o i ai fo’i le lava e masani ona faigata ona fa’asaoina mai ai i latou pe a oo ina uia e i latou lea ala sopo mo nofoaga maualuluga.

“I le taimi nei ua taumafai lava i matou uma e soifua ai ma le tele o luluga ua mae’a fa’alogoina, ona ua fa’ailoa mai e le o afaina tele ai le soifua i lenei vaitau i luluga laiti o lo’o fa’alogoina,” o se tala lea mai Manu’a. “O lea ua fa’aolioli mai le amataga o aoga i lenei vaiaso, peita’i, o le to’atele o matua o lo’o ua naunau i le fia iloa o le fuafuaga lenei mo latou fanau, pe a tutupu mai fa’aletonu nei, ae se’i mita’i pe a mai le fuafuaga fa’ataoto mo le latou saogalemu mai nei fa’alavelave fa’afuase’i.”

SAILIA TOTINO KOMITI FA’AFOE VAITA’ELE A LE ATUNUU - PALA LAGOON

Ua faailoa e le Peresetene ua tuana’i nei lana nofoaiga, Billy Young, ua amata nei ona tau sailia mai nisi o sui e tula’i mo le Komiti Fa’afoe o le Vaita’ele o le atunuu, le Pala Lagoon i Tafuna. Ua fa’auia atu fo’i tusi talosaga ina ia mafai ona ofo mai tautua a nisi e to’atele e mafai ona filifilia ai.

O le masina lenei o Setema lea ua fa’atulaga e tapena ai lea fo’i tiute fai mo le auaunaga a le Vaita’ele ina ia mautinoa ua fa’aauau ma lelei fa’atino. E ese mai lea, e tatau lava ona mautinoa le fa’aauau fo’i ona lelei uma o vaita’ele ma mea uma ua aofia i lea tautua mo le mamalu lautele ae maise mo le fanau iti a le atunuu.

Ua mafai ona piki mai e se sui ua fia tautua sana pepa talosaga mai le Ofisa o le Pala Lagoon Swimming Center i itula masani lava o lo’o tatala ai le tatou Vaita’ele.

O le aso e fa’amuta ai le taliaina o talosaga nei o Setema 11, ae ua fa’atulaga le fonotaga tele e fa’atino ai le tele o tiute fai a le Komiti Fa’afoe ua fa’atulaga i le aso 21 Setema 2022.