TALA I LE LALOLAGI

MALILIE MALO MA TERITORI I NI SUIGA MO FAIGA FAIVA TETELE

Ua iai nei se maliliega a nisi o malo ma teritori i ni suiga i tulafono mo faiga faiva tetele i se fonotaga a le Komisi o Faigafaiva a le Pasefika i Sisifo ma Tutotonu (WCPFC) lea sa faia i le atu Kuki, ae peitai, e laititi lava se suiga i taumafaiga i le mataituina o femalagaiga a va’a fagota, lea o lo o tele ina masalomia i le soia ai o  tulafono.

O le amataga o lenei masina sa mafai ona faamautu ai e nei malo ma teritori ia ni tulafono e mataituina ai le fagotaga o ituaiga Tuna eseese, e pei ole mata lapo’a, skipjack ma le yellowfin.

Na saunoa le susuga Glen Homes ma i se Fa’avae ua ta’ua o le ‘Pew Charitable Trusts’, e faapea, o se vaega pito sili ona taua lenei i le pulega a le WCPFC.  

O se vaega o lenei tulafono fou, ua fa’aitiitia ai le taimi e fagota latalata ai va’a fagota e fa’aaogaina masini e tosina mai ai i’a (FAD), mai i le lima masina, i le luma ma le afa masina, i tai i le moana sausau ma ogasami fa’asao. 

Na saunoa Holmes, e ui ina o le a avea lenei suiga ma tulaga o le a a’afia ai a latou i’a, ae peitai, e le o se popolega tele mo le latou Fa’avae, ona ua fa’amautu mai i su’esu’ega fa’a Saienisi, e leai sona afaina.

Ma i sona talitonuga, o le fa’aitiitia o le taimi e valavala ai va’a fagota, o se tulaga lelei lea mo motu o le pasefika, i tulaga o le tamaoaiga.  Ona ua talitonu Holmes, o leisi itu o nei suiga fou, o le a faatele ai i’a e mafai ona fagota e va’a tetele, ae o le a siitia ai pili mo ofisa lea o lo o gafa ma le fa’amalosia o tulafono tau faiga faiva.

ILOILOINA E OFISA FOU A LE MILITERI IA MOLIAGA I SOLITULAFONO MAMAFA

Na amata mai i le aso Tofi o le vaiaso ua mavae, Tesema 21, 2023, ona le toe fa’ataunu’uina e ta’ita’i militeri ia iloiloga ma le faamasinoga o fitafita e molia i le faia o amioga mataga ma isi solitulafono mamafa, ae ua tu’uina atu nei ia mataupu i lalo o se ofisa fou o Loia Faapitoa, lea o lo o galulue ai taitai sinia (general/flag officer leaders), ma e latou ripoti sa’o lava i failautusi o lala eseese o le militeri.

Ua fa’alauiloa mai e taitai sinia a le militeri le taua o lenei suiga fou ina ia toe faamautuina ai le agaga fa’atuatua i se faamasinoga tonu ma le tutusa mo fitafita uma.  E le gata i lea, o nei ofisa ua fa’apea ona filifilia ni loia agava’a mai i totonu o le militeri.  

O mataupu o le a iloiloina e lenei ofisa fou, e aofia ai le fasioti tagata, fasioti tagata le fuafuaina, ave faamalosia o se tagata, sauaga i totonu o aiga, ma moliaga e a’afia ai le faia o amioga mataga i fanau iti.

NANA E LUSIA LE AOFAIGA MONI O TAGATA MALILIU I SE LOLOGA

I se fa’alavelave na tulai mai i se a’ai ua ta’ua o Oleshky, i se vaega o Ukraine lea ua pulea nei e Lusia, ua ripotia mai ai se taumafaiga e nana le aofai tonu o tagata o lea nu’u na maliliu i le masina o Iuni, i se lologa maoa’e, ina ua pa se fa’atanoa vai tele.  

E tusa ai ma se su’esu’ega a le vaega fa’asalalau o le ‘Associated Press’, ua ta’ua ai le faia e le malo o Lusia ni tulaga tau fa’amata’u i le aufaigaluega a le falemai, e taofia ai i latou mai i le fa’alauiloa mai le aofaiga tonu o tagata na maliliu i lea faalavelave.

I fa’amaumauga a le malo o Lusia, e na o le to’a 59 i latou na maliliu i lenei lologa, ae peitai sa taumate e le militeri a Ukraine e faapea, i le taimi na tupu ai lenei fa’alavelave, e pe a ma le to’a 16,000 le faitau aofai o tagata o lea nu’u.  Ma o lo o iai so latou talitonuga, e silia ma le to’aselau tagata na maliliu.