Sulufa’i se avetaavale i le ofisa a leoleo ae o lo’o fa’asuaava

Pago Pago - AMERIKA SAMOA

E tusa ai ma fa’amaumauga a le faamasinoga, o le aso 21 o Ianuari, 2025 na sulufa’i atu ai se aveta’avale i le Ofisa a Leoleo i Fagatogo, ona o se fa’alavelave na tula’i mai i le afioaga o Fagale’a, na fasia ai o ia ma tata’e ai le fa’amalama o lana taavale e se tasi, ae molia ai o ia i le fa’afoeina o le ta’avale, ae o lo’o fa’asuaava.

I le fa’alavelave na tupu i lea aso, na vala’au ai e se tamaitai ia le ofisa a leoleo ma ripotia le fa’aleagaina o le taavale a le susuga ia Max Williams (lea na sulufa’i i le ofisa a leoleo), e le susuga ia Roddy Vanilau.

Na aga’i atu leoleo i Fagale’a (leisi itu o Fagasa) ma fa’atalanoaina le fa’atau oloa lea na maua mai ai ni ata vitio o le faalavelave, ma molimauina ai le tu’iina e Vanilau ia Williams, a’o saofa’i Williams i totonu o lana taavale, faapea ma le togiina o le fa’amalama o le taavale i se ma’a.

Sa fa’atalanoaina e leoleo ia seisi molimau ma na ia fa’amatalaina lona va’aia o se taavale lanu efuefu, o masau atu i le auala laupapa.  Ona tu lea o le taavale i tafatafa o le uafu, ma talanoa le aveta’avale ma ni tamaiti sa ta’e’ele i lalo o le auala laupapa.

Ona toe masau ese lea o le taavale, ma na ta’ua e le molimau, na toeititi lavea ai sona alo e valu tausaga, na ta’a’alo soka ma ana uo i luma o le latou fale.  Na ta’ua e le molimau lona ‘e’e atu i le aveta’avale ina ia alu lemu lana ta’avale.  Sa ia fesiligia foi tamaiti na ta’e’ele pe latou te iloa le aveta’avale, ae tali mai e leai.

Ina ua fa’atalanoaina e leoleo ia Vanilau, sa ia faamatalaina e faapea, na masau atu le ta’avale lea ma na ia vala’au atu i le aveta’avale e alu lemu lana taavale.  Ae na fa’atu e le avetaavale ia lana taavale ma palauvale mai ia Vanilau, ma fai mea e leai se feau a Vanilau.

Ona fa’aauau lea ona masau atu le taavale a Williams agai i leisi itu o Fagasa ma na toeititi lavevea ai ni tamaiti laity se toalua na ta’a’alo i luma o le latou fale.  O iina na tamo’e atu ai Vanilau faatasi ma lona uso laititi, e taumafai e tuliloa le taavale.

Ina ua maua atu e Vanilau ma lona uso ia Williams ma lana taavale, sa fesiligia e Vanilau ia Williams po o le a sana mea e fai, pe ana faapea e lavevea tamaiti i lana taavale.  Ae peitai, na palauvale mai iai ia Williams ia Vanilau.  Ma o le to’atama’i o Vanilau, na ia tu’iina Williams a’o saofa’i i totonu o lana taavale.

Sa ta’ua e Vanilau le taumafai o Williams, e togi o ia i se apa pia ma fa’afefeina o ia, o le a alu e aumai sana fana.

Ina ua mae’a ona fa’atalanoaina e leoleo ia Vanilau, sa o latou taumafai loa e saili isi tamaiti na iai i le taimi na tupu ai le faalavelave.

Na fautuaina foi e leoleo ia le tua’a a Vanilau ina ia agai atu ma ona atalii e to’alua faapea lona ‘nephew’ i le ofisa a leoleo i Fagaitua, mo le fa’aauauina o su’esu’ega i lenei faalavelave.

Ina ua fa’atalanoaina e leoleo seisi foi molimau, sa ia ta’ua lona va’aia o le alu saoasaoa o le taavale ma na valaau iai lona uso laititi e alu lemu lana taavale.  Ae solomuli mai le taavale ma palauvale mai le aveta’avale ia latou.  Na o latou molimauina le agai atu o le taavale i le faleoloa i Fagale’a ma toeititi lavevea ai ni tamaiti laity se toalua na ta’a’alo i luma o se fale.

Na ta’ua e le molimau le latou agai atu i le faleoloa ma lona uo ma e taunu’u atu, o lo’o inu pia ia Williams i totonu o lana taavale ma na latou iloa foi o lo’o fa’asuaava o ia.

O lo’o ta’ua i fa’amaumauga a le faamasinoga, le taunu’u atu o leoleo i le nofoaga na tupu ai le fa’alavelave, ua leai se Williams, ae o le taimi lena ua agai mai ai o ia i le ofisa a leoleo i Fagatogo.  Ae na lokaina ma molia ai o ia i lona fa’afoeina o se taavale ae o lo’o fa’asuaava.

I le fa’amatalaga a Williams i leoleo, na alu e fai sana faatauga i le faleoloa i Fagale’a ae ona va’aia ni alii o savali atu i lana taavale.  Ma na tu’i ina o ia e Vanilau a’o saofai i totonu o lana taavale ma sa fai atu Vanilau, ua masau tele le alu o lana taavale.  Ona togi lea e Vanilau, ia le faamalama pito i tua o lana taavale.

O moliaga a Vanilau, na aofia ai le Faatupu Vevesi i nofoaga faitele, Fa’ao’olima i lona tulaga e tolu faapea ma le Faaleagaina o meatotino, i lona tulaga e lua.

O le moliaga o le fa’atupu vevesi, o se vaega ‘B’ i solitulafono mama, e mafai ona nofosala ai i le o’o atu i masina e ono, po o se sala tupe e $500; po o faasalaga uma e lua.

O moliaga o le fa’ao’olima ma le fa’aleagaina o mea totino a isi, o ni moliaga i vaega ‘A’ i solitulafono mama, e mafai ona nofosala ai i le tausaga, i le moliaga e tasi.  Po o se sala tupe e ta’i $1,000; po o faasalaga uma e lua.

E $500 se vaegatupe na fa’atulagaina e mafai ona tatalaina ai i tua le na molia, e fa’atalitali ai lona faamasinoga.