Sulufa’i le fanau i le Ofisa a Leoleo ina ua sauaina e le matua

Pago Pago - AMERIKA SAMOA

E tusa ai ma faamaumauga a le malo, o le Taeao o le aso 12 o Aukuso, na sulufai atu ai se teineititi ma sona tuagane laititi i le Ofisa a Leoleo I Fagatogo , e ripotia le ‘e’e ma palauvale o le la Tama, i lo la Tina, i totonu o le latou fale i Fagatogo.

(Ua le lomia e le Samoa News ia suafa o i latou na aafia ma molia I lenei mataupu Ona o le puipuiga o fanau laiti.) 

Na faapea loa ona agai atu leoleo i le fale o le ua molia ma lokaina mai ai loa o ia.

Sa faatalanoaina ai foi ma le tina o le aiga ma sa ia tauina atu i leoleo le pisa o lona toalua ma u’unai solo o ia.

Na faailoa atu e le tina i leoleo, o le tama o le aiga o loo i totonu o le fale ma agai atu ai loa leoleo, ae o latou vaaia le ‘alo ifo o se tagata ma sana ato faafafa i autafa o le fale, ma na valaau mai iai le tina, o lona toalua lea.

Sa tu le ua molia ina ua valaau atu iai leoleo, e sau.  Ma ia fesiligia leoleo pe aisea o le a loka ai o ia.  

Na faailoa atu iai e leoleo le o’o atu o se faasea i lo latou ofisa e uiga ia te ia.

Ae ina aapa atu leoleo e loka mai lima o le ua molia, na oso le ua molia ma faapea atu i leoleo, e tu’u o ia ae e le’i pule I lona ola.

Sa taumafai lava leoleo e loka mai le ua molia ae o le faaauau foi lena ona ia tete’e mai i gaioiga a leoleo, ma na o’o lava ina ona ia tauvalaau se igoa.

Ina ua taumafai leoleo e toso i lalo ia le ua molia e taofi ma loka mai ai ona lima, ae tago le ua molia, i le togi lana ato fa’afafa i autafa, ae piki e se isi alii ma tamo’e ese mai i le nofoaga na tupu ai le faalavelave.

Na fai sina umi o taavivili leoleo ma le ua molia ae na i’u lava Ina mafai ona tuuina le ua molia i totonu o le taavale a leoleo ma aveina atu ai loa o ia i le ofisa a leoleo.

Sa faatonuina foi e leoleo, ia le Tina o le aiga, ina ia malaga atu I le Ofisa o Leoleo.

Na malaga faatasi atu le tina ma lana tama teine i le Ofisa a Leoleo.

Ma na faamatalaina e le teineititi lona lagonaina o le ua molia o palauvale leotele i lona tina ma le tuliina i fafo e lona tina o lona tama.

Na faamatalaina foi e le teineititi le faatonuina o ia e lona tina, e ave lona tuagane ma o i le ofisa a leoleo e su’e mai se fesoasoani.

I le faamatalaga a le tina, o le taeao lea na tupu ai le faalavelave, ina ua fa’ato’a ala ifo, na alu ai e siaki lana pepe sa moe i totonu o le potu a Ona matua. Ma na ia vaai ai i lona toalua, ua lua aso talu na alu ae lea fa’ato’a toe vaai iai.

Sa ta’ua e le tina lona fesiligia o le ua molia po o le a le mafuaaga ua alu atu ai i totonu o le faletaele a ona matua ae liliu mai le ua molia ma palauvale mai i le tina.

Na ta’ua foi e le tina lona faatonuina o le ua molia ina ia alu ese ma le fale, ae musu le ua molia.

O lea na alu ese ai loa le tina ma le fale ma ave lana fanau.

Sa ta’ua e le tina, e na o le pau lava lana vaai i Lona toalua, e foliga mai ua na tagofia ia fualaau faasaina.

Ua molia nei lenei tama i moliaga e lua, o le Faaoolima i le vaega e tolu - o se vaega ‘C’ o solitulafono mama, e mafai Ona nofosala ai i aso e sefululima, po o se sala e $300; po o faasalaga uma e lua.

Faitauga 3:  Tete’e i le ave faapagotaina o ia e leoleo, o se vaega ‘A’ o solitulafono mama, e mafai ona nofosala ai i le tausaga atoa po o se sala tupe e $1000; po o faasalaga uma e lua.

Faitauga 4:  Faatupu vevesi I totonu o Aiga.  O se vaega’B’ o solitulafono mama, e mafai ona nofosala ai I le le sili atu ma le ono masina, po o se sala tupe e le silia ma le $500; po o faasalaga uma e lua.

E $2000 le vaegatupe sa faatulagaina e mafai ona tatalaina ai le ua molia, e faatali ai lona faamasinoga.