Suiga i le faigamalo ona o a’afiaga i le itu tau tupe mai le Feterale

O le masina na te’a nei na faalauiloa ai e le afioga i le ali’i Kovana ia Lolo Matalasi Moliga ni isi o suiga laiti i totonu o le la faigamalo ma Lemanu Peleti Sialega Mauga, e mafua mai ona o fa’afitauli ua tula’i mai i le itu tau tupe, talu mai le faaiuga a le peresetene o le malo tele o Amerika e tapunia ai nisi o Ofisa a le feterale.

O le aso Gafua o le vaiaso ua te’a sa toe tatalaina ai ofisa fetarale sa tapunia, ina ua pasia se pili e le Konekeresi e toe fa’aauauai galuega. Ae peitai o lea pili, ua ma’ea ona avea ma tulafono, e muta lona aoga i le aso 15 o Fepuari.

I sana tusi sa tufatufa atu i Fa’atonusili o Matagaluega ma Ofisa ta’itasi uma a le malo, na taua ai e le afioga i le ali’i Kovana e fa’apea, o le taimi lava na amata ai ona tapunia nisi o Ofisa a le feterale, na amata ai loa fo’i iina ona lagonaina i totonu o le faigamalo a Amerika Samoa tulaga fa’aletonu i le itu tau tupe.

I le aafia ai o tulaga o tupe mai le feterale, na taua ai e le ali’i Kovana le tatau lea ona faia se gaioiga a le malo ina ia mafai ai ona fa’asaoina mai nisi o tupe lotoifale, ina ia fesoasoani ai i le manaoga e pei ona tula’i mai.

O ni isi la nei o suiga laiti a le ali’i kovana ua faia ina ia mafai ai ona fa’asaoina mai nisi o tupe a le malo, e ala i le soona fa’aaogaina o tupe lotoifale.

E LE TOE I AI NI OVA TAIMI

Ua le toe fa’atagaina nei e le malo ona faia ni ova taimi i soo se matagaluega a le malo e totogi i tupe lotoifale. Ua taoto atu nei i Fa’atonusili latou te galulue e mata’itu ma fa’atonutonu tulaga o galuega, ina ia mautinoa e le toe i ai se tagata faigaluega a le malo e galue ova taimi. Se’i vagana ai lava se tulaga ua mana’omia ai le galulue ova taimi, ona fa’atoa mafai lea ona talia e ala i se faatanaga mai le Kovana.

E LE TOE I AI NI MALAGA I FAFO

E le toe fa’atagaina ni malaga i fafo e fa’atupe mai i tupe lotoifale, se’i vagana ai lava malaga e fa’atupe mai i tupe feterale poo isi fo’i alatagatupe e ese mai i tupe lotoifale, ona fa’atoa mafai lea ona fa’ataga ma talia e le kovana.

E LE TOE FA’ATAGAINA LE FA’A FAIGALUEGAINA O NI TAGATA FOU

E oo lava fo’i i le toe fa’afaigaluegaina o ni tagata faigaluega fou e totogi i lalo o tupe lotoifale, ua taofia fo’i e le ali’i kovana lea fuafuaga, ona o le taumafai lava ina ia fa’asao mai tupe lotoifale a le malo, ina ia mafai ai ona fesoasoani i ni isi o manaoga e tula’i mai i totonu o le malo, a o fa’agasolo ai taumafaiga e toe fa’atulaga lelei tupe feterale mai le malo tele.

Afai e i ai se manaoga faapitoa mo le fa’atumuina o ni avanoa faigaluega i totonu o matagaluega a le malo, e tatau i le Fa’atonusili ona tusia se tusi ma tuu atu i le Kovana, e fa’amatala uma ai tulaga uma e fa’atatau i lea manaoga, ina ia faitau i ai le kovana ma malamalama atoatoa i ai.

TOE ILOILOINA O KONEKARATE

A o le i oo i le taimi e toe fa’afou ai konekarate a le malo mo i latou o loo faa faigaluega i lalo o konekarate, ua fautuaina e le Kovana afioga i Fa’atonusili atoa ai ma Fa’auluuluga o Matagaluega ma Ofisa Tumaoti a le malo, ina ia iloilo toto’a muamua vaega uma o le konekarate, ma vaavaai pe i ai ni vaega e tatau ona sui ina ia iloa ai konekarate tonu e manaomia ona toe fa’afou.

O nei suiga uma e pei ona taua e le ali’i kovana, o le a tumau pea ona i ai se’i vagana ua toe i ai se isi fa’aaliga e tuuina atu.

Talu ai tulaga utiuti o meatotino a le malo aemaise ai lava i le itu tau i tupe lotoifale, ua fautuaina ai e le afioga i le ali’i Kovana afioga i Fa’atonusili ina ia latou galulue vavalalata mo le taumafai e fa’atumau pea tulaga manuia ma malosi i totonu o le faigamalo a le atunu’u.