Su’esu’e Leoleo se vevesi na tula’i mai totonu o le Toese

O le fa’aiuga o le vaiaso na te’a nei na tula’i mai ai se vevesi tele i totonu o le toese i Tafuna, e mafua mai ina ua fa’ao’olima ni ali’i pagota se to’alua i se isi ali’i pagota ma manu’a ai o ia.

O le fa’a faigata i Leoleo o le toese ona fa’afilemu le vevesi na tula’i mai i le va o pagota, na mafua ai loa ona talosagaina se fesoasoani a le Ofisa o Leoleo i Tafuna, e le i umi ae taunu’u ali’i ma tama’ita’i Leoleo e to’atolu i totonu o le lotoa.

Na tula’i mai  le fa’alavelave i le aoauli o le aso Sa na te’a nei, Tesema 4, 2016 pe tusa o le itula e 12:10 i le aoauli, ma na toe talosagaina ai loa ni isi ta’avale Leoleo fa’aopoopo, ma e le i umi ae aga’i atu ta’avale Leoleo fa’aopoopo e 4 e aofia ai ma le Loli lapo’a a le Vaega Fuimu i Tafuna, o le taimi fo’i lea na amata ai ona vaaia pagota ua fa’alogo ma usita’i i le fa’atonuga sa tu’uina atu.

Na taua e se molimau fa’atuatuaina i le Samoa News le faia o su’esu’ega a le Ofisa o Leoleo e tusa ai o le fa’alavelave sa tula’i, ina ua fa’ao’olima ni ali’i pagota se to’alua i le isi pagota e to’atasi ma manu’a ai o ia.

Ae pei ona taua e le molimau fa’atuatuaina i le Samoa News e fa’apea, o le vevesi i le va o pagota na amata mai i le aoauli o le aso To’ona’i, Tesema 3, 2016 ma toe tula’i mai ai loa le isi fa’alavelave i le aoauli o le aso Sa na soso’o ai.

E lei manuia taumafaiga a le Samoa News i le tau sailia lea o se fa’amaoniga o lenei ripoti mai le Pule o le Toese i Tafuna, po o le afioga fo’i i le Komesina o Leoleo, peita’i na faamaonia mai e se Leoleo Sinia i le Samoa News le i ai o se vevesi na tula’i mai i le va o pagota o lo o taofia i totonu o le toese, ma o lo o fa’agasolo i ai su’esu’ega a le Ofisa i le taimi nei.

E lei mafai e le Leoleo Sinia ona ia fa’amaonia mai tulaga ta’itasi o lenei fa’alavelave, ae poo ai fo’i manu’a na a’afia ai le ali’i pagota na a’afia, pau le tulaga sa ia fa’amaonia mai.

Ae na taua e le molimau fa’atuatuaina i le Samoa News e fa’apea, o le ali’i pagota na a’afia, o se tasi o ali’i pagota o lo o tuli sona fa’asalaga fa’a falepuipui i le taimi nei, sa alu e talanoa i lona nephew o lo o taofia i le isi fo’i nofoaga o le toese i le aso To’ona’i na te’a nei, ae alia’e mai ai loa le vevesi ina ua tu’i o ia e le isi ali’i pagota.

Na mafai ona vaovao le vevesi ma fa’a to’afilemu ai loa le mataupu, ae ina ua oo i le aso Sa na sosoo ai, na toe alia’e mai loa le mataupu ina ua alu le ali’i pagota na a’afia i le Ofisa o Leoleo i totonu lava o le toese e faila lana tagi fa’asaga i le ali’i pagota na fa’ao’olima ia te ia, ae toe tula’i mai ai loa le isi vevesi ina ua fa’ao’olima i ai le isi ali’i pagota ia te ia.

E talitonu le Samoa News, e ono faila e le malo moliaga fa’asaga ali’i pagota e to’alua o lo o tu’uaia na fa’ao’olima i le ali’i pagota na a’afia.