Sua le eleele amatalia galuega auala aga’i Coconut Point

O le taeao ananafi na suaina ai le eleele e tatala ai galuega fa'atino a le Kamupani ua fa'akonekarate mo le galuega o le alatele e agai atu i totonu i le Coconut Point i le afio'aga o Nuuuli.

O le galuega lava lea ua aofia i le totogi o le tauofoga e ao ai ona fa'amama ma lia'i ese nisi o vaega o le alatele o lo'o i ai nei, sua fa'alelei ma ia toe fa'ata lelei le alatele lea, atoa ai ma le toe fa'ataoto lelei o ni laina o tautua lautele o lo'o aofia i le ogaeleele o lo'o ua toe fa'aleleia ai le alatele ua lautogia i totonu o le afio'aga o Nuuuli.

Ua tatau fo'i ona mautinoa lelei e le Kamupani Fauala ua fa'akonekarate ua saogalemu lelei feoa'iga a tagata savavali mai ta'avale feoa'i i luga o lenei alatele. Ua i ai se vaega o lea alatele e ao ina fa'asima lelei ona o tulaga o tafega pe a o'o ina loloto timuga i le afio'aga.

O le umi o le galuega lea ua fa'ailoa mai e tatau ona tau sa'o mai lava i le magatolu ma le alatele e aga'i i Fagatogo ma Leone, e 2,300futu le umi, ae fa'atulaga mai le 11 futu le lautele. Ua faatulaga fo'i le mafiafia o le sima i le vaega o le alatele e fa'asima i le 6 inisi le mafiafia e fa'aaogaina ai le Portland Cement, lea ua fa'atulaga e fausia atoa ai le ala afea i tua mai le alatele, o ala savali fa'apea ma le alatele mo ta'avale, ae maise fo'i o alavai e fa'auia i auvai mai le alatele o le a fausia. O le itu tauagavale o le alatele e tatau ona fa'atulaga lelei ai alavai, ina ia mafai ona fa'auia sa'o paipa o tafega i le sami.

O le Kamupani ua fa'akonekarate mo lea galuega o le Kamupani Fauala fou a le Silva Group i le latou tau na fa'aulu i le tauofoga e $891,338.39 mo le umi e 240 aso faigaluega.

O le galuega o lo'o fa'atupea lea e le US DOT po'o le Matagaluega o Feoa'iga  a le Malo tele, i lona vaega o lo'o fa'atupea galuega o Alatele Fausia o le Feterale [Federal Highway Administration].

O le sui Inisinia o le Fausaga o le Alatele mo lea galuega o Dympna Pangilinan, [CE].O le Inisinia o le Poloketi Reupen R. Siatu'u, o le Pule e va'aia le galuega lenei o le susuga Onolata R.M. Saleapaga ma le susuga Kaleopa Kaleopa e na te pasia le fausaga ma le galuega atoa lea.

Na tula'i lana susuga le Fa'afeaiga EFKAS i Nuuuli, Rev. Leitualasa Malieitulua e na te tapena le vi'iga o le Atua e ala i ana upu fa'amalosi'au i le mamalu o le malo mo galuega lelei uma mo le atunu'u, ae maise o le taumafaiga ina ia fa'asoasoa lava le seleni ina ia 'au'au, atoa ai ma le loto fia fai mea lelei mo tagata uma, a'o le vi'iga fo'i o le Atua i so'o se mea e taumafai ina ia faia ma ia mae'a lelei.

O lana tatalo fo'i na si'itia mo le fa'amoemoe i le vasega o e galulue, o e va'ai ma i latou o le seua le galuega ina ia tino mai i lea vaitaimi atoa ua fa'atulaga i le maliliega o le fausaga o le alatele i le afio'aga. "A uma se galuega, o i tatou lava o tagata le aoga, ae o le vi'iga ia si'i lava i le Atua!"

Ina ua mae'a ona tu'u lea o le avanoa i le afioga le Kovana mo lana saunoaga. O lana fa'afetai fo'i i le pulega a le afio'aga e maopopoo ai mea uma e fia fa'ataunu'u mo le afio'aga o le fatu o ituau malosi.

Na tali fuatau le afioga le Ma'opu Soliai Tuipine Fuimaono, ma sa ia faailoa ai, le agaga fiafia tele o le afio'aga ina ua tafa le finagalo o le afioga le Kovana ina ia galueaina le latou alatele, ua loa fo'i o tigaina ai le mamalu o le afio'aga i le fesoua'ina i le palapala ma le pefu ma le tele o omoomo.

Peita'i sa ia fa'ailoa patino, "O lo'o i ai tala o lo'o fa'asalalau e tusa o le aumaga ma le fa'aletonu lea ua fasi ai nisi na malomaloa i luga o latou ta'avale ma uia totonu o Nuuuli. Afai ua solia le tulafono i luga o le alatele a le Malo, ae paga lea o lo'o i totonu o le afio'aga lea alatele. Ia fa'amolemole i e femalaga'i, ia le so'ona tuliususu ma fa'aumuumu i luga o tou taavale pe a uia Nuuuli.”

“O Nuuuli tuai e le toe faia i ai sa'u tala, ae o Nuuuli fou lenei, ua taumafai lava ia fa'afilemu mea uma, ua i ai Iesu i le nu'u nei. Ua tele fa'ailo ua iloga ai ua tamali'i lava amioga a Nuuuli, ae vaivai le fa'amoemoe pe a tutupu mea fa'apenei, ma toe laga ai ni uiga le taofiofi. Fa'amolemole toe taga'i ane i nei tala ua fe'avea'i mai i fa'asalalauga,” o lana saunoaga lea, ma ua latou o ane loa e sua le eleele, sa tofusia uma le to'atele o sui iloga o le malo, sui o le ekalesia ma le afio'aga i Nuuuli, ae maise o le Kamupani Fau Alatele o le a nafa ma le galuega, ma faipule fo'i e to'alua o le itumalo o le Ituau, sa tofu suo ina ia suaina le eleele e amatalia ai lea galuega taua.

O le aiga tele ma fa'aaloaloga na pa'au i ai le afio'aga na fa'atasia ai le mamalu o le faigamalo ma e uma na aofia i le Maota o le afioga le Ma'opu Soliai.