SUA ELEELE MO LE FAUSAGA NOFOAGA FOU A LE SAMOA FORD MOTORS

Pago Pago, AMERIKA SAMOA

O le aso Lulu Tesema 30, 2020 le 8:30 i le teao na faatulaga e amatalia ai le sauniga mamalu ina ia suaina le eleele mo le fausia ai o le Nofoaga Tumau o le Kamupani Taavale a le Samoa Ford Motors ma le Pago Motors Hyundai. O le eleele ua fa’atualga nei i le lisi ua mae’a ona sainia e le Malo ma le Samoa Ford Motors ma le Pago Motors Hyundai, o le a fa’alautele atili ai le nofoaga e fa’alauiloa ai ituaiga o ta’avale Ford ma le Hyundai mo latou fefa’ataua’iga, fa’atasi ai ma latou fale Inisinia e toe siakia ma fa’aleleia ai a latou ta’avale.

O le sauniga sa taitaia e Patele Kolio Etuale o le Ekalesia Katoliko i Iliili. O i latou foi sa auai o e na vala’aulia fa’apitoa ma sui fo’i o le Kapeneta ma le Ofisa o le Kovana o le tatou malo.  le fofoga o le polokalama fa’asolo o le fa’amoemoe o le Samoa Ford Motors ma le Pago Mtors Hyundai. Na tula’I fo’I le tamaitai Ta’ita’ifono o le Komiti Fa’afoe o Pisinisi uma a Lealaifuaneva Peter Reid Jr i Amerika Samoa, fa’atasi ai ma Samoa, Olivia Reid mo lana saunoaga na maofa ai fo’i i latou na auai i le lafolafo a le tamaitai talavou.

“O le ‘a ‘ou le toe so ‘ona tala le ‘ato seu o seu, pe ‘ou te ufitia vagamea. Ma ‘ou te le toe taina fo’i i tua le tili, pe ‘ou te toe lotoia le lauti fatulalo, i pa’ia sausau’o’o, pa’ia sausau gata, ma pa’ia fa’atafafa ua afifio ma papa’a’ao i lenei aso, aua lele fo’i ua ‘uma ‘ona lulu le aveo, tu’ulaupua ma toto le niu piu i le tua’oi e sa ai le vatapuia o le tagata soifua ma le Atua foafoa ‘ae a fo’i sa ma faiga o Samoa o lea ua uma na tofi lauti ma mamalu fa’aitiiti e le fofoga o le tatou aso, le afioga ile ali’i faipule ia Larry Sanitoa, aua e le gafataulimaina fo’i e lo’u nei tagata fa’atauva’a ma le vaivai. 

‘Ae tau ia ina ‘ou saua le va, e faigata le afio mai ole Ao o le Malo o Tutuila ma Manu’a, le tofa ile To’oto’o ia Lolo Matalasi Moliga, o le mamalu lava lea o le Tafatolu o si o tatou Malo. Tulou. ‘Ou te fa’atulou atu fo’i le afio o lana afioga ia Epikopo Peter Brown ma le afioga ia Patele Kolio Etuale , o le mamalu lava lea o le Aiga Sa Levi. Tulou.  O le mamalu ole aofia, nu’unu’u atu fa’atini o tausala o ‘outou pa’ia ma o ‘outou mamalu. Ta’oto la ‘ia o le fiso ma ona lau, aua e talatau Toga ‘ae talatofi Samoa. Tulou, Tulou, Tulouna lava!”

 O lana fa’afetai na mua I ai ona manatu, “I lenei aso matagofie, lele ua logo ai i tino matagi lelei, aua ua papae i paga ti’a ole tauti’aga. Ua le o se taeao fa’ataitainono lo tatou taeao ‘ae ua manuafulu e tasi le tatou fesilafa’iga, ma ‘ua sausaufialele ai nei le manu sa moe’afusia, aua le tatou taulaga na si’itia e le afioga ia Patele Kolio Etuale tatou te patipatia ai le agalelei ma le alofa o le Atua lea ua taunu’u ai le fa’amoemoe a lenei kamupani. Tatou vi’ivi’i ‘a’e la ‘ia ile Atua aua o lona alofa lea ua tatou sapi ai nei ma tatou sa’a ai nei i ma’a o malie.”

Ona ia tapa loa lea o le fa’amoemoe ua taunuu o le la’au o le ola lea mo i latou, o e galulue ma taumafai atina’e mea lelei aua le aga’i i luma o le taumafaiga ma le tautua a le Samoa Ford Motors ma Pago Motors Hyundai. “I lenei taeao ma le aso, ua savini fa’apunu o manu se lagona, aua o le fa’amoemoe ua taunu’u o le la’au lea o le soifua. Fa’afetai tele i lau afioga i le Kovana Sili, lau Tofa Lolo Matalasi Moliga i lou titi faitama, i lou manatu mai i le tagitagi atu a lenei Kamupani vaivai i se ‘ele’ele o le Malo se’i fausia ai se fale e fa’alelei atili ai le tautua a le Samoa Motors ile mamalu o sio tatou Atunu’u. Fa’amalo fai ole faiva, ua moni ai le upu, ua itiiti mea na ‘ou fa’alogo i ai, nai o mea ua ‘ou va’ai i iai. Lea ua e fa’ati’eti’e lenei kamupani i le ma’a salafa ma ua e fa’aeaina ai taumafaiga a le nei kamupani. O lea ua matou tepa i ‘ula taga’i fo’i i ‘ula, le atu sa tuliapu e le sa’u lele ua fa’amanuiaina ai le nei atina’e. Sa matematelima fo’i le faiva o Pa’usisi, pe tua ini a, le matou sanisani atu i sau fesoasoani. Fa’afetai, fa’afetai, fa’afetai tele i lau afioga ile Kovana Sili, i lau Tofa Lolo Matalasi Moliga aua lea ua matou futifutimanu’ula ina ua liutino le matou tatalo sa fauao faupo. E ua malie o, ua malie malo i lau fa’aaloalo lea ua matou tiu ai nei.”

Sa sili ona ia fa’afetaia le fa’amoemoe o le Malo, ina ia fa’amanatu le soifua tautua ma le sao o le tama faipisinisi iloga o le atunuu, a’o le tua’a fo’i o i latou uma e to’alima, o e na tupuga mai ia Lealaifuaneva Peter Reid Jr. ma sa ia faapea ai, “Ua ‘ou manatua ile aso lenei le tagi ‘alao a le tamaloa o Sekiseki aua ‘ua pogisa lona mafaufau ma ‘ua sola fo’i le gagana ile fia maua o se upu e fa’amatala atu ai le o’otia o lona loto ‘ona se fa’aaloalo ua maoa’e ma le matagofie. Ua liliu ane ona fofoga ile Lagi ma tatalo ile Atua fa’amolemole ia fa’agaganaina ma’a o le laufanua ma la’au o le vao ‘ina ‘ia fa’aleo atu ai le tagi tu’i o lona loto ‘ona ua uiga’ese lau fa’atupu lea ua ‘a’ao iai lau afioga a le Kovana Sili aua lea ua e fa’ati’eti’e si o matou Tama o Lealaifuaneva Peter E. Reid, Jr. i le tumutumu o Matafao i le fa’aigoaina o se tasi o maga o ‘auala ile suafa o sio matou tama e fa’ailoga ai sana tautua fa’ale’a’u’a’u i le tatou malo ma le Atunu’u. Sa leai se matou manatu o le a e amana’iaina i sio matou Tama ma si ana tautua. Fa’afetai, fa’afetai, fa’afetai tele i lau Afioga mo lau fa’aeaea i si o matou tama.”

Peita’i i le tausaga 1998, na faamatuu ese atu ai e Lealaifuaneva Peter Reid Jr le fa’afoega uma o ana “Aiga o Pisinisi GHC Reids” i lana fanau e to’alima ina ia latou fa’afoea. O le Samoa Fod Motor na fa’atuina e le latou tama i le tusaga e 1974, fa’atasi ai ma nisi o ana pa’aga faapisinisi, ae na toe fa’atauina e ia siea o nei sui uma mulimuli ane. 

“Peita’i ua tuputupu pea lava le taumafaiga, ua soso’o fo’i tautua a le GHC Reid i le nofoaga tuai o i ai nei pea i latou, ma ua fa’afaigata ai ona toe faia se isi suiga tele i pisinisi uma ona o le utiuti o le avanoa. O le maua ai o lenei eleele ua lisia nei, o se fiafiaga sili lea, ae ua sili atu ona fa’aetaia e i latou uma le fa’aea ua tuuina mai e le Kovana ma le Malo, e fa’asuafaina ai le ala ua sootaga uma ai pisinisi i le Senator Inoye Industrial Park o Amerika Samoa.”

O le tele o lea lisi e tolu eka ua i ai i le Paka Liona, ma o le toina mai o lea eleele mo le taumfaiga lenei ia fa’alautele ma fa’alelieia atili le tautuaina o le mamalu o le atunuu ma ia o gatasi fo’i ma isi lala o le Ford i le Iunaite Setete o Amerika, o le a siitia atili ai ma le sao o latou pisinisi nei e fesoasoani ai i le Malo mo ni avanoa faigaluega mo nisi e to’atele o le atunuu ma siitia fo’i ala o fefa’atauaiga ia fa’aleleia atili le tamaoaiga tausi o le malo ma pisinisi i le atunuu.”

“O le sailiga o se eleele mo lea fa’amoemoe maualuga o le pisinisi e tusa e tolu lelei tausaga o taumafai, peita’i o le sootauau o le susuga le fa’atonu Fuiavailili Keniseli Lafaele, le susuga Iulogologo Joe Pereira ma Kovana Lolo Moliga, lea ua mafua ai le aso ma lona fa’amoemoe maualuga. O se fiafiaga o le a eseese nei potu tetele o le a fa’alauiloa atu ai ituaiga ta’avale o le Samoa Ford Motors mai ta’avale o le Hyundai a le Pago Motors. Ua fai si leva o tau faia lea tulaga, ae ona o le utiuti o le avanoa i le nofoaga o i ai nei.”

“O le fa’afetai tele ona ua fuli le faigamalo ma latou fa’aigoaina le eleele i lo latou tama faipisinisi iloga o le atunuu, ae o le o se tasi e manatu i ni fa’aeaga fa’alialia pe fa’alauiloa ai o ia. E manatu lava ia i galuega fa’atino mai tua, ia natia fa’afatualavai. Peita’i o lona fa’anaunautaiga, ia tupu ma olaola pisinisi e tautuaina tagata lautele i o latou mana’oga ma le malo ia atina’e lelei lona tamaoaiga.”

Na fa’aiu ana upu ma fa’apea ai, “O le tatalo a lenei Kamupani, ia foa’i atu e le Atua pulepuletetele le malosi o le tino ma le filemu ole mafaufau, ma ‘ia fa’aopoopo ni aso e tele i lou soifua ina ‘ia fa’aauau ai pea au galuega lelei mo sio tatou atunu’u ‘ae o e se’e i tutuvao. Fa’afetai.”

Na saunoa le afioga le Kovana ma ia fa’ailoa atu, “O lea mea ua faia e le Malo mo le afioga le Tei o le Maoputasi Lealaifuaneva Peter Reid Jr, o se mea ititi pe afai e toe tepa i le sao o lenei Faipisinisi i le atunuu. E afua mai lona avea ai ma fitafita i le vaega au a le Malo Tele, lana tautua o se faipisinisi ma e le tasi fo’i se pisinisi na fa’atuina ma o lo’o faaauau mai pea ona aoga i le atunuu, ae maise fo’i o lana auaunaga i le Fono Faitulafono mo le silia ma le 20 tausaga,ao lona sao i aiga ma le afioaga o Pago Pago, tainane le fiafia e galulue fa’atasi ma le autalavou i fa’agatama i le tai ma sapaia foi isi fa’agatama.”

I lea lava taimi sa saunoa fo’i le afioga le Kovana Sili e tusa ai o lana fa’aitiitia o le totogi o lisi uma o pisinisi eseese o lo ua fa’atutuina ma fa’atautaia mai le Senator Inoye Industrial Park mai le .50sene i le sikuea futu ile na’o le .25 ma na afua mai ia Oketopa o le 2020 lena tulaga.

Na fa’alauiloa mai fo’i le ali’ipule sili ua atoa le 13 tausaga o lo’o galue mo nei pisinisi o ta’avale Ford ma Hyundai a Lealaifuaneva, le sui sa latou fa’afaigaluegaina mai Wisconsin, David Yakim. O ia lea ua mafai ai fo’i ona latou soso’oa le fau ma le fau i le taumafaiga ia fa’atuina le Ford Hyundai Samoa i Apia.

Ua le gata ai ia Yakim taitai ua fia fa’afetaia latou tautua, ae ua aofia ai ma le pulega o isi latou pisinisi uma, Mark Foster o le Peter E Reid Stevedoring & Polynesia Shipping ervices; Mrs Gherith Lober-soliai o le GHC Reid & SLC Manufacturing mo le Vaimalu; ma o ta’ita’i nei ua galulue fa’atasi mo le manuia o lo ua aeae ai nei latou ma i lenei vaitau.

Ona o lea ua maua le eleele, o se fa’amanuiaga sili lea ua fa’aosofia atili ai o latou naunauta’iga, ia fa’alautele fa’aleleia ma fa’amautu atili taumafaiga uma o pisinisi tau ta’avale mo Ie atunuu lautele ma le malo foi