Solofua moliaga umia faasolitulafono pauta cocaine ma le faamoemoe faatau atu

Pago Pago, AMERIKA SAMOA - 

Ua solofua e le Faamasinoga Faaitumalo le moliaga o le umia faasolitulafono o le pauta faasaina o le cocaine ma le faamoemoe e tulei ma faatau atu na tu’uaia ai ni ali’i se to’alua, ina ua le mafai e le malo ona tuuina atu mau e lagolago ai lea moliaga faasaga i nei ali’i e to’alua.

Sei vagana ai le moliaga mamafa e tasi o le umia faasolitulafono lea o vaega o le pauta faasaina o le cocaine faasaga i ali’i nei e to’alua, ua tofu atu nei i luma o le Fa’amasinoga Maualuga, ina ua faamalieina le Faamasinoga o lo o ia i mau faamaonia a le malo e lagolago ai le latou tagi ua faaulu faasaga i lenei mataupu.

O le vaiaso na te’a nei na faataunuuina ai le ulua’i iloiloga faapitoa o le mataupu o loo tu’uaia ai Matavale Fiu ma Gaisoa Mapo i luma o le afioga i le ali’i Fa’amasino ia Elvis P. Patea. 

E toatasi le molimau na valaau e le malo i le taimi o le ulua’i iloiloga, o le susuga lea i le ali’i Leoleo Suesue ia Levi Tafaovale mai le Vaega e Suesueina Fualaau Faasaina a le Ofisa o Leoleo.

Na taua e le ali’i Leoleo i lana molimau e faapea, a o faatalitali i se telefoni mo ni mataupu e aafia ai fualaau faasaina i le po o le aso 25 o Iulai o le tausaga nei, na faafuase’i ona ia maua se telefoni mai le Vaega o Leoleo o loo tiute i luga o le alatele, e talosagaina ai lana fesoasoani faasaga i fualaau faasaina na maua i se taavale na latou taofia i se vaega o Tafuna ona o le le usita’i i tulafono tau ta’avale afi i luga o le alatele.

Na aga’i atu le ali’i Leoleo Suesue ia Tafavale, faatasi ai ma se ali’i Leoleo Satini i le Ofisa o Leoleo i Tafuna mo le suesueina o lea mataupu, ma maua ai loa le avanoa la te fesiligia ai Leoleo sa i ai i le taimi o le fa’alavelave.

Na taua e Leoleo nei e faapea, na latou taofia se ta’avale i se vaega o le alatele i Tafuna ma latou maua ai, e to’afa ni ali’i o loo i totonu o le ta’avale pikiapu e aofia ai ma le ave ta’avale, lea na mulimuli ane faamaonia lona igoa, o ia o Alesene Tipi. E leai se laisene ave taavale a Tipi sa i ai i le taimi na taofi ai lana ta’avale, ae sa faalogoina fo’i e Leoleo le malosi o le manogi ava malosi mai lana tautala, o le mafua’aga lea na faatonu ai loa e Leoleo ia Tipi e oso i fafo ma le ta’avale ae se’i faatino le suega e iloa ai le malosi o le ‘ava malosi i lona tino.

A o talanoa Leoleo ma Tipi, na latou faatoa iloa ai loa i le taimi lea, o lo o i ai le pasese a le ta’avale e to’atolu o loo i le nofoa pito i tua o le ta’avale. O loo aofia ai i totonu o le pasese e to’atolu le ali’i o Matavale Fiu, le isi alii o loo molia i lenei mataupu.

Na taua e Tafaovale i lana molimau e faapea, o  le taimi lava na oso mai ai i fafo Fiu ma le ta’avale, na faigofie ai lava ona iloa o ia e Leoleo mai se tasi o mataupu sa latou suesuenina, lea o loo i ai se tusi saisai e pu’e faapagota ai Fiu. Na vave le faaiuga a Leoleo ma taofia ai loa Fiu mo se taimi le tumau ao faatali gaioiga e saili faamaumauga pe faamaonia o loo i ai se poloaiga mai le Fa’amasinoga e pu’e faapagota ai Fiu.

Na saili e Leoleo isi alii e toalua sa i totonu o le taavale a Tipi mo ni aupega ma fualaau faasaina, ma faamaonia ai le leai o ni aupega poo ni fualaau faasaina na maua ia i laua, o lea na tatala ai loa i laua e toe fo’i atu i o laua aiga.

A o talatalanoa Leoleo ma Tipi, na faafuase’i ona savavali atu ni ali’i se to’alua, o i laua ia o Gaisoa Mapo, se tasi e toalua i ai alii ua molia i lenei mataupu, ma le susuga a Elijah Leasau. Na faailoa e alii nei e to’alua i Leoleo o laua suafa, faapea ai ma le latou fesootaiga ma Tipi, o i latou o ni uo.

Na savali atu Mapo ma talosaga i le Leoleo pe mafai ona alu atu e talanoa ia Fiu mo se mataupu taua, lea fo’i na talia e le Leoleo ma savali atu ai loa Mapo ma talanoa ia Fiu. 

A o talanoa i laua nei e to’alua, na vaaia e Leoleo le tago atu o le lima o Mapo ma popo le fatafata o Fiu. Ina ua sauni Mapo e savali ese mai i le vaega o loo tu ai Fiu, na vaaia e Leoleo se pepa iila o loo uu i le lima o Mapo. Na oso atu le Leoleo ma fai ia Mapo e avatu le pepa iila o loo i lona lima ia te ia, peita’i na musu Mapo e ave le pepa iila i le Leoleo, ae sa ia tago ma tuu i totonu o le taga o lona ofu o loo fai.

O le taimi lava lea na taofia ai loa Mapo i lalo o le vaavaaiga a Leoleo ma auina faatasi atu ai loa i laua ma Fiu i le Ofisa o Leoleo i Tafuna mo le faatalatalanoaina o lenei mataupu.

Na taunuu Fiu ma Mapo i le Ofisa o Leoleo i Tafuna ma faatonuina ai loa e le Leoleo lutena ia Mapo e faaali atu mea o loo i totonu o le taga o lona ofu o loo faia. Na faaali e Mapo mea uma o loo i totonu o le taga o lona ofu o loo fai ma vaaia ai e Leoleo se pepa iila feololo o loo i ai vaega o le pauta paepae. Sa maua ai fo’i ma se tama’i straw e fa’aaoga o se  sipuni e asu ai le pauta.

Ina ua maea ona fesiligia e Leoleo ia Mapo ma Fiu e uiga i le pepa iila sa maua ai fualaau faasaina, na toe tatala ai loa i laua e toe aga’i atu i le fale. E le i umi ae aga’i atu i totonu o le Ofisa o Leoleo le susuga a Leasau ma ia faailoa i Leoleo, ua mae’a ona ia talanoa ia Fiu ma Mapo e uiga i le pepa iila na maua ia Mapo, ma ua ta’utino atu Fiu ia te ia, o ia (Fiu) e ana le pepa iila o lo o i ai vaega o le pauta faasaina o le cocaine sa maua ia Mapo.

O le mae’a ai ona fesiligia e Leoleo o i laua e to’alua ua molia i lenei mataupu, na faia ai loa se suega faapitoa i le pauta sa maua ma faamaonia ai, o vaega ia o le pauta o le cocaine. 

O le tele o le valga o le cocaine sa maua ia Mapo na mafai ona faamaonia e Leoleo, e le o ni vaega ia e fa’aaoga mo le tagata lava ia, ae o vaega e umia ma le faamoemoe e tulei ma faatau atu i isi tagata.

Ina ua maua le avanoa o le Loia a Mapo, susuga Marcellus Talaimalo Uiagalelei na te fesiligia ai le molimau, sa ia fia malamalama pe na faapefea ona faia le suega e faamaonia ai le pauta o le cocaine. Na tali le molimau, sa fa’aaoga le ‘test kits’ e saili ai le pauta paepae sa maua i le taga simoi lea na pau mai i totonu o le taga o le ofu a Mapo sa faia.

Na fesili Uiagalelei i le molimau poo le a le elemeni sa ia sailia e faamaonia ai o le cocaine lea na maua. E le i mafai e le molimau ona tali lea fesili. 

Na toe fesili Uiagalelei pe sa i ai nisi mau faamaonia na maua ia Mapo e pei o se vaega tupe tele, o se fua e fua ai fualaau faasaina, straws, pepa iila poo nisi lava mau faamaonia e lagolago ai o loo auai Maopo i le faatauina atu o fualaau faasaina. Na tali le molimau, e na o le 2 lava mau faamaoni ana maua ia Mapo, o le pepa iila simoi sa i ai le pauta o le cocaine ma le straw e tasi ua uma ona tipi le tulimanu.

Na maua le avanoa e fesiligia ai e le loia a Fiu, susuga Ryan Anderson le molimau e tusa ai o lana faamatalaga. Na fesili Anderson i le molimau pe sa ia maua se isi pepa iila o loo i ai vaega o le pauta faasaina o le cocaine ia Fiu. Na tali le molimau e leai. Na toe fesili Anderson pe sa ia maua se isi lava mau faamaonia ia Fiu e aofia ai fua e fua ai fualaau faasaina, o se vaega tupe tele poo nisi lava mau faamaonia. Na tali le molimau, “e leai”.

I le faaiuga o faafinauga a Loia, na talosagaina ai loa e Uiagalelei le Faamasinoga ina ia solofua le moliaga o le umia faasolitulafono ma le faamoemoe e tulei ma faatau atu fualaau faasaina faasaga ia Mapo, ona e leai ni mau e lagolagoina ai le tagi a le malo. Na lagolago Anderson le loia a Fiu i le talosaga a Uiagalelei, lea fo’i na talia e le Fa’amasinoga, ma solofua ai loa lea moliaga.

Na taua atili e Uiagalelei e faapea, e leai se poto masani o le molimau na te sailia ai poo le a le pauta paepae lea na maua ia Mapo.

Saunoa le afioga i le Faamasino ia Patea faapea, ua faamalieina le faamasinoga, e leai ni mau na folasia e le malo e lagolago ai le moliaga pito i mamafa lea ua solofua faasaga ia Fiu ma Mapo.