Solofua le moliaga mamafa fa’asaga i se tasi o Leoleo Toese i Tafuna

Na solofua e le afioga i le ali’i fa’amasino ia Fiti Sunia le moliaga mamafa na tu’uaia ai e le malo se tasi o Leoleo o le toese i Tafuna, ina ua le mafai e le itu a le malo ona tu’uina atu ni mau e lagolago ai lea moliaga fa’asaga i le tama’ita’i ua molia.

Na ulua’i tu’uaia e le malo ia Viopapa Vitolio i moliaga e 2, lea e aofia ai le moliaga mamafa o lona fa’aleagaina lea o mau fa’amaonia a le malo, o le vaega D lea o solitulafono mamafa, ma le moliaga mama o lona fesoasoani lea e fa’aleaga mau fa’amaonia a le malo, o le vaega A lea o solitulafono mama.

O le aso Tofi na te’a nei na fa’atulaga ai le ulua’i iloiloga a Vitolio i luma o le Fa’amasinoga Fa’aitumalo. O lea ulua’i iloiloga, o le a maua ai le avanoa o le malo latou te tuuina atu ai ni molimau e lagolagoina ai le latou tagi fa’asaga i le tama’ita’i Leoleo.

O le ali’i loia tua ia Richard deSaulles o lo o tula’i mo Vitolio, ae o le ali’i loia sili lagolago ia Woodrow Pengelly o lo o tula’i mo le itu a le malo.

Ina ua valaau le mataupu a Vitolio, na tu’uina atu ai loa e Sunia le avanoa i le malo e valaau ai le latou molimau mo le iloiloga, peita’i na fa’ailoa e le loia a le malo le leai o se latou molimau e valaau.

Talu ai ua le mafai e le malo ona valaau sa latou molimau mo le tuuina atu o a latou mau e lagolago ai le moliaga mamafa fa’asaga ia Vitolio, na faia ai loa e le afioga i le ali’i faamasino ia Sunia le fa’aiuga e solofua ai le moliaga mamafa sa tu’uaia ai le tama’ita’i Leoleo, ae totoe ai loa na o le moliaga mama i le tagi a le malo.

Na talosaga le loia a le malo ina ia tolopo le mataupu a Vitolio mo se isi 3 vaiaso, ina ia lava ai se taimi e feutana’i ai ma le loia a le ua molia e uiga i lenei mataupu.

Na talia e Sunia le talosaga a le malo, ma fa’atulaga ai loa le isi iloiloga a Vitolio i le aso 4 o Oketopa, 2018.

O lo o tumau pea le tatalaina i tua o Vitolio ina ua mae’a ona ia totogi le tinoitupe e $2,000 sa fa’atulaga e le fa’amasinoga, e fa’atalitali ai taualumaga o lana mataupu.

O le solofua ai o le moliaga mamafa fa’asaga i le tama’ita’i Leoleo mai le Toese, ua manino mai ai le tumau pea o lana mataupu i lalo o le Fa’amasinoga Fa’aitumalo, sei vagana ai mataupu fa’asaga i ali’i Leoleo e to’alua mai le Toese, ia o lo o tu’uaia fa’atasi ma Vitolio i lenei mataupu, fa’atoa iloa i le masina fou le tulaga e o o i ai a laua mataupu pe a maua a laua ulua’i iloiloga.

O ali’i Leoleo e to’alua e aofia ai Mosese Lomu ma Toloa Koowaiyou. O lo o tu’uaia Lomu i moliaga mamafa e lua e aofia ai le Faaleagaina o mau faamaonia a le malo, ma le faia o gaioiga faasolitulafono fa’alilolilo. O Koowaiyou o loo tu’uaia i le moliaga mamafa e tasi o le faia o gaioiga fa’asolitulafono fa’alilolilo.

O lo o fa’aauau pea ona tatala i tua Lomu ma Koowaiyou ina ua mae’a ona la totogiina vaega tupe sa fa’atulaga e tatala ai i laua.

O le mataupu o lo o tu’uaia ai Leoleo e to’atolu mai le Toese, na afua mai i le fa’alavelave lea na sola ai i tua se ali’i pagota i le vaveao o le aso 12 o Aokuso, 2018, ma fana se ali’i i Leone ma manu’a ai o ia.

Ina ua taumafai le Ofisa o Leoleo e fesoota’i mai i le Toese mo le fia maua o se ripoti e fa’atatau i le ali’i pagota na sola i tua o Manu Lefatia, na fa’ailoa atu e Lomu e fa’apea, o lo o i ai pea le ali’i pagota i totonu o lona sela. O lea ripoti mai ia Lomu na lagolagoina e Koowaiyou.

O lo o tu’uaia Vitolio i lona faia lea o ni suiga i fa’amaumauga a le Toese, ina ia fa’ailoa mai ai sa latou faitauina ma siaki pagota ma iloa ai o lo o i ai pea Lefatia i totonu o lona sela, e ui  sa ia iloa lelei e leai se gaioiga faapea sa faia.