Solofua isi moliaga mamafa e 3 fa’asaga ia Anderson Taala Jr

Ua solofua e le Fa’amasinoga Fa’aitumalo isi moliaga mamafa e 3 sa faila e le malo fa’asaga i le susuga a Anderson Taala Jr, ina ua le mafai e le malo ona tu’uina atu ni mau e lagolagoina ai nei moliaga.

O Taala Jr, o ia lea e to’alua i ai ali’i o lo o molia e le malo i le fa’alavelave lea na tula’i mai ia Iulai 2019 ina ua talepe se fale i Pago Pago ae ave fa’agaoi le tele o meatotino sa i totonu, ma fa’atau atu i ni isi o tagata.

O nisi o meatotino sa gaoia mai i le fale i Pago Pago, sa fa’atau atu i le pisinisi a Le Aute ina ia maua mai ai fualaau fa’asaina o le aisa, ae o isi meatotino sa tulei ma fa’atau i luga o le itula o le Facebook e taua o le “American Samoa Stealz and Dealz”.

O Taala Jr, poo AJ e pei ona iloa ai e le to’atele o tagata, o lo o molia fa’atasi i laua ma le susuga a Faiaoga Satele, poo Fred Satele fo’i o le afioaga o Pago Pago.

O le vaiaso na te’a nei na faia ai le ulua’i iloiloga o le mataupu fa’asaga ia Taala Jr i luma o le Fa’amasinoga Fa’aitumalo. O le alii loia sili lagolago ia Jason Mitchell na tula’i mo le malo, ae o le alii loia fautua lagolago ia Bob Stuart na tula’i mo Taala Jr.

E 4 moliaga mamafa na ulua’i tu’uaia ai e le malo ia Taala Jr, o ia moliaga e aofia ai moliaga e 2 o le gaoi, tasi le moliaga o le talepe fale i le tulaga lua, faapea ai ma le moliaga lona fa o lona taliaina lea o ni oloa sa ave faagaoi e se isi tagata.

Ae i le mae’a ai o le ulua’i iloiloga i le vaiaso na te’a nei, na solofua ai loa e le afioga i le alii Fa’amasino ia Elvis P. Patea moliaga e 3, ae totoe ai na o le moliaga e tasi, le moliaga o le talia o oloa sa ave faagaoi faasaga ia Taala Jr.

E talitonu le Fa’amasinoga, e le i mafai e le malo ona tuuina atu nai e lagolagoina ai moliaga e 3 ua solofua e aofia ai moliaga e 2 o le gaoi faapea ai ma le moliaga e tasi o le talepe fale i le tulaga lua. Ae sa mafai e le malo ona tuuina atu mau e lagolago ai le moliaga o le talia o ni oloa sa ave faagaoi faasaga ia Taala Jr.

O le tama’ita’i Leoleo Suesue ia Emma Tiatia na valaau e le malo e molimau i le ulua’i iloiloga, o ia fo’i lea sa autu i ai le suesueina o lenei solitulafono.

Na taua e Tiatia i lana molimau e fa’apea, o lenei mataupu na tofu atu i le Ofisa o Leoleo i Fagatogo, ina ua talosagaina e se Tina le fesoasoani a Leoleo e tusa ai o lona fale na osofa’i ma talepe e ni tagata, ao toesea ai lo latou aiga i Apia i le masina o Iulai.

O le aso 18 o Aokuso na te’a nei na aga’i atu ai Leoleo i le fale o le Tina na a’afia i Pago Pago, mo le suesueina o le mataupu e fa’atatau i le osofaiga sa aafia ai le fale o lea aiga. Na molimauina e Leoleo ina ua latou taunu’u i le fale pine faamau e faamaonia ai vaega o le fale na talepe, e aofia ai ma nisi o meatotino sa paepae solo i luga o le fola faapea ai ma vaega eseese o le fale.

Na taua e le Tina e ana le fale i Leoleo e fa’apea, na faateia lo latou aiga ina ua latou toe fo’i mai i le atunu’u i le aso lava lea, Aokuso 18, ae latou molimauina ai loa le vaaiga mata’utia i totonu o le latou fale, e aofia ai le tele o meatotino ua gaoia atoa ai ma le faitoto’a na talepe e se tagata.

O meatotino na taua e le Tina i Leoleo na gaoia e aofia ai laptops e 3; o mea faigaluega e alu i le uila e pei o le Grinder, Skill-saw ma le Drill; o pea tautaliga auro; o le laau su’isu’i e tasi; o le mama auro e tasi; o pea seevae; o se fana o le ituaiga o le 22 caliber rifle; o ietoga tetele e 2; tasi le vacuum, faapea ai ma se pelu o le ituaiga o le ‘samurai sword’..

O le aso lava lea a o galulue Leoleo i le tau tuu faatasia o mau faamaonia o lenei mataupu, ae aga’i atu loa se ali’i mai Pago Pago ma faailoa atu i Leoleo, o lo o i ai ni fa’amatalaga na te fia ofoina atu e fesoasoani i le latou suesuega.

Na taua e le ali’i lea i Leoleo, a o fai lana tagamea i le Fale Ta Lavalava i Pago Pago, na alu atu le ali’i o Fred Satele ma fai atu ia te ia, pe mana’o e fa’atau lana laptop i le $40. E le gata i lea, sa toe fai atu fo’i Satele ia te ia, e 3 ana laptops o lo o i ai o loo fia faatau i le ta’i $100 i le laptop e tasi. Na taua e le ali’i lea i Leoleo lona teena o le manaoga o Satele.

E tasi le vaiaso talu ona amata le suesuega a Leoleo, ae latou mauaina loa nisi faamatalaga e ono fesoasoani i le latou suesuega. O ia faamatalaga na tuuina atu lea e le Tina e ana le fale na osofaia, ina ua ia faailoa i Leoleo ata o oloa o lo o faatauina i luga o le Facebook a le “American Samoa Dealz and Steals” , lea e masalomia o oloa uma nei sa gaoia mai i lona fale.

O le vaega lea o le American Samoa Dealz and Steals, o se faalapotopotoga latou te fa’aaogaina le Facebook e faia ai fefaatauaiga mo soo se oloa lava i se tau talafeagai ma gafatia e ni isi o le atunu’u lautele.

O se tasi o ata sa pu’e e le Tina e ana le fale na osofaia ma lafo i Leoleo, o le ata o le susuga a Satele o loo ia uuina le fana o le ituaiga o le 22. Na taua e le Tina lea i Leoleo, o foliga uma lava ia o le fana lea na gaoia mai i le latou fale.

Ina ua fesiligia e Leoleo le susuga a Satele e tusa ai o lenei mataupu, sa ia ioeina ai loa i Leoleo lona osofaia o le fale a lona aunty i Pago Pago ae ave faagaoi le tele o meatotino mai totonu i le masina o Iulai, a o toesea ai lona aunty ma lona aiga i Apia mo se latou tafaoga.

Na taua e Satele i Leoleo e fa’apea, o le tele o meatotino sa ia gaoia na alu ma ave i Le Aute ae faafesuia’i ma fualaau faasaina o le aisa, ae o isi meatotino sa ia gaoia na tuuina atu i luga o le Facebook a le “American Samoa Dealz and Steals” e fa’atau tu’i ai.

Ina ua fesiligia o ia i le fana o le ituaiga o le 22. lea na vaaia sa maitauina i se ata i luga o le Facebook o lo o ia uuina, na tali le ua molia, e le o le fana lea sa ia gaoia, ae o le fana lea a se tasi o anauo.

I le fa’amatalaga tusitusia a Satele sa tuuina atu i Leoleo, sa ia taua ai igoa o i latou e toa’tolu sa ia alu ma fa’atau i ai isi meatotino sa ia gaoia.

Na mafai e Leoleo ona latou fesiligia i latou nei e to’atolu e fa’atatau i meatotino sa gaioia e Satele.

Na taua e se tama’ita’i e fa’apea, e tasi le mea faigaluega e alu i le uila na ia faatau mai ia Satele i le $40, atoa ai ma le laptop e tasi i le $80. O ia meatotino na toe faafo’i i Leoleo.

Na taua e se alii, na faateia o ia ina ua taofi e Satele lana ta’avale i luga o le alatele i Pago Pago, ma fesili atu pe na te fia faatauina lana laptop ma le uaea e fafaga ai le a’a i le $200, faapea ai ma le mea faigaluega e alu i le uila e tasi i le $40.

Na taua e le ali’i lea lona taliaina o le talosaga a Satele ma ia faatauina mai ai meatotino e pei ona taua. O ia meatotino ua toe faafo’i uma atu i Leoleo.

Na taua atili e le ali’i lea i Leoleo e fa’apea, na mafua ona ia faatauina meatotino nei mai ia Satele, ona sa talosaga atu o ia, o lo o matua mana’omia lava se tupe e tausi ai si ona Tama o loo tigaina i le Falema’i.

O le alii mulimuli na fesiligia e Leoleo, o le ali’i lea sa ave i ai e Satele le tele o meatotino na gaoia. Na taua e le ali’i lea i Leoleo e fa’apea, na te le iloaina o ni meatotino sa gaoia ia na alu atu ma Satele ma fai atu ia te ia e faatau i luga o le Facebook a le “American Samoa Dealz and Steals”.

O le tupe na maua mai i meatotino sa fa’atauina e pei ona taua e le ali’i lea i Leoleo, na la vaelua afa ai ma Satele.