Solofua e le Fa’amasinoga le tagi faasaga ia Faiaoga Satele

I le silia ai i le 6 masina talu ona taofia i le Toese i Tafuna le susuga a Faiaoga Satele, ona o tu’uaiga i lona gaoia o le tele o meatotino mai le Fale a lona aunty i Pago Pago ae faafesuia’i ma fualaau fa’asaina mai le nofoaga o Le Aute, o le vaiaso nei lea na solofua ai e le Faamasinoga lea tagi faasaga ia Satele.

O le vaiaso nei na te’a nei na valaau ai le mataupu a Satele i luma o le afioga i le alii Faamasino ia Fiti Sunia, ona o le talosaga a le malo e solofua ai le latou tagi faasaga ia te ia.

Na taua e le Loia a le malo ia Laura Garvey e faapea, ua uma ona fesootai atu le aiga na aafia ma talosaga ina ia solofua le latou tagi. Sa ia talanoa fo’i i le tama teine a le ulugalii na aafia, ma ua ia malie atoatoa fo’i i le talosaga a ona matua.

O le mae’a ai ona faafofoga o le Fa’amasinoga i le folasaga a le malo, na solofua ai loa e Sunia le tagi faasaga ia Satele.

O Satele na molia i le moliaga mamafa o le talepe fale i le tulaga 2; faapea ai ma moliaga e 2 o le gaoi. O Satele ma le susuga ia Anderson Ta’ala Jr sa molia e le malo i lenei mataupu. O le mataupu a Ta’ala Jr o lo o i ai pea i luma o le Fa’amasinoga Maualuga, e le o mautinoa pe solofua fo’i e le malo pe leai.

O se tepa lenei i le tagi a le malo faasaga ia Satele, atoa ai ma le tele o meatoino sa gaoia ma faatau atu i ni isi o tagata o le atunu’u, ae o le isi vaega tele o meatotino na gaoia na faafesuia’i ma fualaau fa’asaina.

O lenei mataupu na tofu atu i le Ofisa o Leoleo i Fagatogo, ina ua talosagaina e se Tina le fesoasoani a Leoleo e tusa ai o lona fale na osofa’i ma talepe e ni tagata, ao toesea ai lo latou aiga i Apia mo se tafaoga e 3 vaiaso le umi i le masina o Iulai na te’a nei.

O le tama’ita’i Leoleo ia Ema Tiatia na tofia e autu i ai le suesueina o lenei mataupu, fa’atasi ai ma le fesoasoani a ni isi o Leoleo lagolago.

O le aso 18 o Aokuso 2019 na aga’i atu ai Leoleo i le fale o le Tina na a’afia i Pago Pago, mo le suesueina o le mataupu e fa’atatau i le osofaiga sa aafia ai le fale o lea aiga. Na molimauina e Leoleo ina ua latou taunu’u i le fale pine faamau e faamaonia ai vaega o le fale na talepe, e aofia ai ma nisi o meatotino sa paepae solo i luga o le fola faapea ai ma vaega eseese o le fale.

Na taua e le Tina e ana le fale i Leoleo e fa’apea, na faateia lo latou aiga ina ua latou toe fo’i mai i le atunu’u i le aso lava lea, Aokuso 18, ae latou molimauina ai loa le vaaiga mata’utia i totonu o le latou fale, e aofia ai le tele o meatotino ua gaoia atoa ai ma le faitoto’a na talepe e se tagata.

O meatotino na taua e le Tina i Leoleo na gaoia e aofia ai laptops e 3; o mea faigaluega e alu i le uila e pei o le Grinder, Skill-saw ma le Drill; o pea tautaliga auro; o le laau su’isu’i e tasi; o le mama auro e tasi; o pea seevae; o se fana o le ituaiga o le 22 caliber rifle; o ietoga tetele e 2; tasi le vacuum, faapea ai ma se pelu o le ituaiga o le ‘samurai sword’..

O le mae’a ai ona talanoa o Leoleo ma le Tina e ana le fale, na amata ai loa ona galulue Leoleo i le tau tuu faatasia o mau faamaonia e faatatau i lenei mataupu.

O le aso lava lea a o galulue Leoleo i le tau tuu faatasia o mau faamaonia o lenei mataupu, ae aga’i atu loa se ali’i mai Pago Pago ma faailoa atu i Leoleo, o lo o i ai ni fa’amatalaga na te fia ofoina atu e fesoasoani i le latou suesuega.

Na taua e le ali’i lea i Leoleo, a o fai lana tagamea i le Fale Ta Lavalava i Pago Pago, na alu atu le ali’i o Fred Satele ma fai atu ia te ia, pe mana’o e fa’atau lana laptop i le $40. E le gata i lea, sa toe fai atu fo’i Satele ia te ia, e 3 ana laptops o lo o i ai o loo fia faatau i le ta’i $100 i le laptop e tasi. Na taua e le ali’i lea i Leoleo lona teena o le manaoga o Satele.

E tasi le vaiaso talu ona amata le suesuega a Leoleo, ae latou mauaina loa nisi faamatalaga e ono fesoasoani i le latou suesuega. O ia faamatalaga na tuuina atu lea e le Tina e ana le fale na osofaia, ina ua ia faailoa i Leoleo ata o oloa o lo o faatauina i luga o le Facebook a le “American Samoa Dealz and Steals” , lea e masalomia o oloa uma nei sa gaoia mai i lona fale.

O le vaega lea o le American Samoa Dealz and Steals, o se faalapotopotoga latou te fa’aaogaina le Facebook e faia ai fefaatauaiga mo soo se oloa lava i se tau talafeagai ma gafatia e ni isi o le atunu’u lautele.

O se tasi o ata sa pu’e e le Tina e ana le fale na osofaia ma lafo i Leoleo, o le ata o le susuga a Satele o loo ia uuina le fana o le ituaiga o le 22. Na taua e le Tina lea i Leoleo, o foliga uma lava ia o le fana lea na gaoia mai i le latou fale.

Ina ua fesiligia e Leoleo le susuga a Satele e tusa ai o lenei mataupu, sa ia ioeina ai loa i Leoleo lona osofaia o le fale a lona aunty i Pago Pago ae ave faagaoi le tele o meatotino mai totonu i le masina o Iulai, a o toesea ai lona aunty ma lona aiga i Apia mo se latou tafaoga.

Na taua e Satele i Leoleo e fa’apea, o le tele o meatotino sa ia gaoia na alu ma ave i Le Aute ae faafesuia’i ma fualaau faasaina o le aisa, ae o isi meatotino sa ia gaoia na tuuina atu i luga o le Facebook a le “American Samoa Dealz and Steals” e fa’atau tu’i ai.

Ina ua fesiligia o ia i le fana o le ituaiga o le 22. lea na vaaia sa maitauina i se ata i luga o le Facebook o lo o ia uuina, na tali le ua molia, e le o le fana lea sa ia gaoia, ae o le fana lea a se tasi o anauo.

I le fa’amatalaga tusitusia a Satele sa tuuina atu i Leoleo, sa ia taua ai igoa o i latou e toa’tolu sa ia alu ma fa’atau i ai isi meatotino sa ia gaoia.

Na mafai e Leoleo ona latou fesiligia i latou nei e to’atolu e fa’atatau i meatotino sa gaioia e Satele.

Na taua e se tama’ita’i e fa’apea, e tasi le mea faigaluega e alu i le uila na ia faatau mai ia Satele i le $40, atoa ai ma le laptop e tasi i le $80. O ia meatotino na toe faafo’i i Leoleo.

Na taua e se alii, na faateia o ia ina ua taofi e Satele lana ta’avale i luga o le alatele i Pago Pago, ma fesili atu pe na te fia faatauina lana laptop ma le uaea e fafaga ai le a’a i le $200, faapea ai ma le mea faigaluega e alu i le uila e tasi i le $40.

Na taua e le ali’i lea lona taliaina o le talosaga a Satele ma ia faatauina mai ai meatotino e pei ona taua. O ia meatotino ua toe faafo’i uma atu i Leoleo.

Na taua atili e le ali’i lea i Leoleo e fa’apea, na mafua ona ia faatauina meatotino nei mai ia Satele, ona sa talosaga atu o ia, o lo o matua mana’omia lava se tupe e tausi ai si ona Tama o loo tigaina i le Falema’i.

O le alii mulimuli na fesiligia e Leoleo, o le ali’i lea sa ave i ai e Satele le tele o meatotino na gaoia. Na taua e le ali’i lea i Leoleo e fa’apea, na te le iloaina o ni meatotino sa gaoia ia na alu atu ma Satele ma fai atu ia te ia e faatau i luga o le Facebook a le “American Samoa Dealz and Steals”.

O le tupe na maua mai i meatotino sa fa’atauina e pei ona taua e le ali’i lea i Leoleo, na la vaelua afa ai ma Satele.