Soalaupule e Senatoa leisi la’asaga pe a le faataunuuina tiute a le Loia Sili

Pago Pago - AMERIKA SAMOA

Sa fai sina vevela o felafolafoaiga a afioga i Senatoa, i le amataga o le vaiaso, ae e le’i amataina la latou tauaofiaga masani, i le soalaupuleina o le mataupu e faatatau i le Iugafono a le Senate #38-35, lea na pasia i lona faitauga lona tolu i le amataga o le masina ma fa’ao’oina atu i le ofisa a le Loia Sili.

O le auga o lenei iugafono, e ‘suesue ai le fa’aaoga ma le le tatau o tupe sa le’i faapaketiina ma fa’asoasoaina i tupe maua o le tausaga tupe 2023, i le aofaiga e $36 miliona, ma vala’au ai le Loia Sili, ia Fainu’ulelei Alailima Utu, e talosaga le faamasinoga, ina ia tofia se loia tutoatasi, e suesueina le fa’aaoga e le tusa ai ma le tulafono, o nei tupe, ua soli ai le tulafono lautele 37-12.’

I le amataga o le iloiloga a Senatoa, na fa’aalia ai e le afioga i le Peresetene o le Senate, Tuaolo Manaia Fruean, po o le a se gaioiga a le Senate, pe afai e mae’a le 30 aso faatulagaina i totonu o le iugafono, e tatau ona tali mai ai le Loia Sili, ae le tali mai.  Sa saunoa Tuaolo, e o’o atu i lena taimi, ua fai le malologa a le Fono, ma sa ia fia faafofoga i se faamaninoga mai i le loia a le Senate, ia Mitzie Jessop-Ta’ase.

Sa saunoa Jessop-Ta’ase, e mafai lava ona faataunuu iloiloga ma fonotaga a le Senate i le taimi o le malologa a le Fono, ae a toe fa’aauau tauaofiaga a le Fono, e tatau ona faaulufaleina se iugafono, ina ia aloa’ia ai so’o se faaiuga na tasi ai le Senate.

Sa ta’ua foi e le tamaitai loia, afai ae mae’a le 30 aso faatulagaina i totonu o le i’ugafono, e aunoa ma se gaioiga a le Loia Sili, e iai le aia tatau a le Senate, e pei ona faatulafonoina, e ‘subpoena’ mai ai le Loia Sili e faamanino le mafua’aga ua le tali mai ai i le i’ugafono.  Ma e tusa ai ma tulaga o le tulafono, e tatau ona faaooina mai e le Loia Sili sana lipoti tusitusia.

Na fa’aalia e le afioga i le Senatoa, Magalei Logovi’I, e faapea, ua mae’a ona o la talanoa ma le Loia Sili e tusa ai ma lenei mataupu, ma sa saunoa le Loia Sili, e le mafai ona ia fa’ao’oina atu lenei mataupu i le faamasinoga, se’ia vagana ua fa’ailoa mai e le Senate, suafa o i latou, o lo o masalomia i le fa’aaogaina le tatau o tupe a le malo.

Sa saunoa Magalei, sa mafai ona faamautuina i le faagasologa o iloiloga a le Senate, ua solia ma le iloa, e nisi o taitai o le malo, ia le tulafono, i le faatinoga o a latou tiute, e pei o le Teutupe ma le ‘Chief of Staff’.  Na fia malamalama Magalei, pe mafai ona faao’o atu suafa o nei taitai i le Loia Sili, ma talosagaina se su’esu’ega e pei ona ma’oti mai i totonu o le i’ugafono.

Na tali mai le loia a le Senate, e mafai.  Ma sa saunoa le tamaitai loia, o suafa o le Kovana ma le Lutena Kovan lea o lo o ta’ua i totonu o le I’ugafono, e faapea na fono ma le Peresetene o le Senate ma le Fofoga Fetalai ia Setema 21, 2023, lea na faailoa atu ai i le Peresetene o le Senate ma le Fofoga Fetalai, le fa’aaogaina o le $36 miliona, o se tupe faasili sa aoina.

Ma sa lipotia mai ai e le Kovana, le fa’aaogaina e le Faigamalo o le $36 miliona lea, e ui ina sa o latou iloa, e tusa ai ma ala o le tulafono, e tatau ona lipoti mai so’o se tupe aoina (po o tupe faasili) i le Fono Faitulafono, mo le faasoasoaina.

Sa faamalamalama foi e le loia a le Senate, o lo o talosagaina foi i totonu o le I’ugafono a le Senate, le suesueina o le Ofisa a le Kovana, ma afai ae masalomia ai nisi o le aufaigaluega, e tatau foi ona su’esu’eina i latou e le loia tuto’atasi.

Na saunoa Tuaolo e tusa ai ma sona malamalama’aga, e le manaomia ona faauluina e le Senate ni igoa o taitai o le malo, ua masalomia, i le solia o le tulafono.  I sana finauga, o le galuega lea a le loia tutoatasi.

Sa faaleoina e le afioga i le Senatoa, Utu Sila Poasa, lona lagolagoina o le saunoaga a Tuaolo.  Ma sa ia saunoa mai e faapea, o le mafua’aga lea ua valaauina ai se loia tuto’atasi, ona o lana su’esu’ega e tatau ona tutoatasi mai i fa’atosinaga a le faigamalo po o le fono faitulafono.

Na fesiligia e le afioga i le Senatoa, Satele Aliitai Lili’o, pe mafai ona ave sa’o se talosaga a le Senate, i le Faamasino Sili, mo le filifiliga o se loia tuto’atasi, ona ua alu le taimi, ae o le tausaga faai’u lenei a le Faigamalo lea o lo o iai.  Ma na fa’aalia e Satele lona atugaluga, ona o le a leai se gaioiga e faia pe afai ae mae’a atu le taimi o le Faigamalo.

Sa faamanino e Jessop-Ta’ase e faapea, o le tiute a le Fono Faitulafono, o le faavaeina lea o tulafono, ae o le tiute a le Kovana ma le Faigamalo, o le faamalosia lea o tulafono, ma o tiute o lala ia e lua o le malo, e taita’ia e nei tulafono.  Sa saunoa le tamaitai loia, i lalo o le tulafono, afai ae solia e le kovana po o le lutena kovana ia le tulafono, e mafai e le fono faitulafono ona ave’esea (impeach) i la’ua.

Ae peitai, e fa’ato’a mafai ona faagasolo ia tulaga o le ave’esea (impeachment) pe afai e faamaonia i luma o le faamasinoga ia tu’uaiga ua fa’asaga ia i la’ua.

Afai foi, ua masalomia nisi o taitai o le malo, e pei o Faatonusili, Aufaigaluega a le Ofisa o le Kovana po o le ofisa a le Loia Sili, i le solia o le tulafono, e mafai ona filifilia se loia tuto’atasi e su’esu’eina moliaga ua fa’asaga ia i latou.

Sa faapea ona fa’aopoopo mai le afioga i le Senatoa, Togiola T.A. Tulafono, o ia foi o se loia, ma ia faamanino atili lenei mataupu e faapea, e mafai ona su’esu’eina e se loia tuto’atasi ia taitai o le malo, e amata mai lava i le kovana, se’ia o’o atu i tagata faigaluega i totonu o ofisa ma matagaluega, e aofia ai foi ma sui faitulafono ma le aufaigaluega a le Maota Fono.

Ae o le sitepu muamua, e pei ona ma’oti mai i lea vaega o le tulafono, e tatau ona faia muamua se su’esu’ega a le Loia Sili, i tu’uaiga ua faia e faasaga i so’o se tasi ua masalomia i le solia o le tulafono.

Sa fa’amaoti mai foi e Togiola, o tu’uaiga o soligatulafono e tatau ona faatatau i solitulafono mamafa, lea e pa’u i luga o le Loia Sili e na te faamaonia lea tulaga, i lana uluai suesuega.  Ona fa’ailoa mai lea e le Loia Sili, le manaomia o se loia tutoatasi, e su’esu’e nei tu’uaiga ma faila loa moliaga i luma o le faamasinoga. 

Ma talosagaina ai le Faamasino Sili, ina ia filifili se loia tutoatasi e su’esu’eina lenei mataupu, ona o lo’o a’afia ai tagata faigaluega a le malo.

Sa faalototele atu le afioga Togiola i sui o le Senate, o lea ua mae’a ona faatino le latou vaega, o le faia lea o iloiloga e faamaonia ai, pe sa o gatasi gaioiga a taitai o le malo na ‘subpoena’, ma tulaga o le tulafono.  Ma na saunoa Togiola, ae o lea ua faamaonia, e leai ma o le mafua’aga lea o le I’ugafono.  Ae sa ia fautuaina foi le Senate, ina ia manatua, o gaioiga ia na o latou iloiloina, ua solia ai le tulafono, ua na o ni tu’ua’iga, aua o le faamaoniga o nei solitulafono, e le o’o iai lo latou malosiaga.

Ae o le gaioiga mo le faamaonia o nei soligatulafono, e a le Loia Sili ia, lea e amata le suesuega e ala i le faia o uluai su’esu’ega.  Afai ae maua ai le moni ma le faamaoni o nei tu’uaiga, o le a ia fa’ao’oina atu loa nei mataupu i le faamasinoga mo le filifiliga o se loia tutoatasi.

Sa toe faamamafa e Togiola i le Senate, le mae’a ona faatino o le latou vaega, ma ua ta’atia atu nei i le Loia Sili, e faia lana vaega.

Ma sa fa’aalia foi e Togiola, lona lagolagoina o le naunauga a le Peresetene o le Senate, ina ia aveina atu se tusi i le Loia Sili, e toe faamanatu atu iai le ogaoga o lenei mataupu.

Ina ua saunoa le afioga i le Senatoa, Fonoti Tafaifa Aufata, sa ia fa’aalia lona le fiafia e tusa ai ma lenei mataupu.  Na saunoa Fonoti, e na o le pau lava le vaifofo, o le talosagaina o le malo feterale e o mai e su’esu’e lenei mataupu.  Sa ia fa’aalia e faapea, o lea e talanoa i le faitau miliona o tupe a le malo ma e mana’omia ona aumai ni tagata su’esu’e papalagi, e leai ni aiga po o pi’itaga iinei, e latou te su’esu’e auiliili lenei mataupu.

Ae peitai, sa tete’e Togiola i lea manatu ma ia fa’aalia e faapea, e ono avea lea ma tulaga e fa’ailoa atu ai i fanau talavou a Amerika Samoa, e faapea, e le faatuatuaina i latou.  Ma ia u’una’ia le Peresetene o le Senate, afai ae le gaioi le Loia Sili, ona filifili lea o seisi e faia le mea sa faatonuina le Loia Sili e fai.

Sa toe faamanino foi e Togiola, e mafai ona ave sa’o lava se talosaga a le Fono, i le faamasinoga, e filifili se loia tutoatasi.  Ma e le o ma’oti mai i le tulafono, le mafai ona faia o lea tulaga, pe afai e le gaioi le Loia Sili.  Ae o lo o iai le aia tatau a le Senate, pe a tasi i latou e le o faataunuuina tiute a le Loia Sili e pei ona faatulafonoina, e talosagaina ai le faamasinoga, e ‘subpoena’ le Loia Sili mo se faamalamalaga o le mafuaaga o le le faataunuuina o lona tiute, e pei ona ta’ua i totonu o le iugafono.

Ma e iai foi le malosiaga i le Senate, e talosagaina ai le faamasinoga, e faatonu le Loia Sili, e faataunuu lana galuega.