Silia ma le 30 tausaga o feagai pea Vaifanua ma tulaga faaletonu i suavai taumafa

Pago Pago - AMERIKA SAMOA

I le molimau a le afioga i le Senatoa a le itumalo o le Vaifanua, ia Satele Aliitai Lili’o, i luma o le komiti o le Suavai ma le Eletise, i le amataga o le vaiaso, sa ia fa’aalia ai le lata i le 30 tausaga, e le o mafai ona taumafa e tagata o le itumalo ia le suavai lea o lo o alu atu i le ASPA.

Sa auai le sui Pule a le ASPA, le susuga ia Ryan Tuato’o faapea le susuga ia Junior Sisifo Lauvao, lea e mataituina ia afi a le ASPA, i le iloiloga lenei a le Senate.

Na molimau le afioga Satele sa ia faao’o atu lenei mataupu i le CEO a le ASPA, o Wallon Young, i le faaiuga o le tausaga ua mavae, ina ua auai mai le CEO i iloiloga o le paketi.  Ma sa saunoa Young i lena taimi, e o’o atu ia Tesema o le a mafai ona taumafaina e le itumalo o le Vaifanua ia le suavai, pe a mae’a ona faatuina pamu vai i Aua.

Ae peitai, e le i tupu lea tulaga.

Na saunoa foi le afioga i le Senatoa, sa faatuina foi pamu vai i Alao, ae e le i atoa se lua vaiaso, ae toe leaga.  Ma ua silia ma le 30 tausaga o faatau e tagata o lona itumalo ia fagu vai e taumamafa ai, ona o le vai lea e alu atu mai i le ASPA, e le mafai ona taumafaina e se tasi.

Sa faamamafaina e le afioga Satele, o se tasi o tiutetauave a le ASPA, o le tautuaina lea o tagata o le atunuu i suavai e mafai ona taumafaina, aua o se vaega taua tele lea i totonu o le soifuaga o se tagata, ma e tatau ona ave le faamuamua a le ASPA i lea tulaga.  Sa fia malamalama le afioga i le Senatoa po o afea tonu o le a mafai ai ona faaleleia tulaga o le suavai mo lona itumalo.

Sa ta’ua foi e Satele, sa tulai mai foi lea faafitauli i le afioaga o Aoa, ae o lea ua mae’a ona fofoina lea faafitauli.

Ae mo afioaga e pei o Auasi, Utumea, Alao ma Tula, o vai ia e latou te maua mai i pamu a le ASPA, e le mafai ona fa’aaogaina mo le kukaina o taumafa, pe taumafaina foi.

Sa faamanino e le sui pule a le ASPA, le susuga ia Ryan Tuato’o e faapea, o lo o iai ni faafitauli o feagai ma i latou i le pamu lea o lo o i Aua.  Sa faamanino e Tuato’o, na malaga mai inisinia o le kamupani sa faatauina mai ai ‘filters’ ia sa fuafua e fa’aaoga i le pamu I Aua, ae peitai, na iloa mulimuli ifo i le galuega, e le o sa’o ‘filters’ ia na faatau mai.

Ma o lo o galulue nei le pulega o lo o mataituina le suavai ma kamupani i atunu’u i fafo ma o lo o iai se faamoemoega o le a mafai ona toe faimalaga mai inisinia nei i le faaiuga o le masina po o le amataga foi o le masina fou, e toe faapipi’I ia ‘filters’ fou.

Sa faamanino mai e Tuato’o le taua o le faamamaina o le vai mai pamu vai i Aua ma Alao, ona o le maualuga o le masima i totonu o le suavai i totonu o pamu ia. 

O lo o iai se talitonuga i le sui pule, o le a mafai ona faamae’aina nei galuega ia Mati.

Sa faaalia e le afioga Satele lona faamoemoega o le a mafai ona maua se fofo o lenei faafitauli ma mafai ona maua e lona itumalo ia se vai taumafa e mafai ona fa’aaogaina.  Sa toe faamamafa mai e Satele, o le suavai lea o lo o sapalai mai e le ASPA, e le gata ina e le o mafai ona taumafaina e tagata, ae o lo o faaleagaina ai foi fanua a tagata o lona itumalo.

Na saunoa le afioga i le Senatoa, e o’o lava i le fa’aaogaina e fufulu ai ta’avale, e le mafai ona o le maualuga o le masima i totonu o le vai.  Ma ua silia ma le 30 tausaga o tupu lenei faafitauli, ae o lea lava e totogi e tagata ia pili o le vai.

Sa tufatufaina atu e le afioga Satele ia ni fagu vai mai i lona itumalo e faamanatu atu ai i le pulega a le ASPA ia le mafatiaga o feagai ma ona tagata.