Silia ma le $30 milion mo polokete tetele e tolu a le Ofisa o le Soifua Maloloina

Pago Pago - AMERIKA SAMOA

Ua silia ma le $30 miliona ua mae’a ona fa’aagaga e le faigamalo a Pula ma Pulu, mo ni poloketi tetele, o lo’o faamuamua e le Ofisa o le Soifua Maloloina.  Ma o le aso Lua o le vaiaso ua tuanai sa faapea ona fa’apa’iaina ai le lau’ele’ele mo nei galuega i le nofoaga o lo’o iai le falema’i i Tafuna.

O nei poloketi po o fale fou, e mo le fa’alauteleina o le Falema’i mo Manu, faapea ma le falemai o iai nei, aemaise ai se nofoaga tutotonu mo le ‘Behaviorial Health Service Drug and Alcohol Rehabilitation Center’.

Ma o nei poloketi uma o lo’o faatupeina e le ARPA (American Rescue Plan Act).

Sa fa’amamafaina e le Afioga i le Kovana Pulaali’i N. Pula, le tulaga pagatia ua iai le atunu’u, ona o Fualaau faasaina, ma le mana’omia o se nofoaga e mafai ona fesoasoani i tagata o le atunu’u ua a’afia i Fualaau faasaina.  Sa ia saunoa i le galulue so’o tau’au o le Ofisa o Mataupu tu Samoa faapea ma pulega a matai o afioaga taitasi aemaise o ekalesia. 

Na saunoa le afioga Pula, o le poloketi muamua, e silia ma le $20 miliona, e mo se nofoaga autu e fesoasoani i e ua a’afia i tulaga o le ‘ava malosi ma fualaau faasaina.  Ma sa fa’aleoina e le afioga i le kovana ia lona agaga fa’afetai mo lenei poloketi, ona e pei ona sa ia saunoa, o se auaunaga ua mana’omia.

Sa ta’ua e le afioga i le kovana le iai o se fuafuaga a le malo, i auala e mafai ona falifuaitau ai i tulaga o fualau faasaina.  

E le gata i lea, sa faapea foi ona fa’alauiloaina e le kovana ia se vaega faapitoa (task force) a le malo,  o le a faapea ona galulue fa’atasi ma le Ofisa o Mataupu tau Samoa, e fa’asaga tau i fualaau faasaina, e ala lea i le fa’aaogaina o alagamanuia sa mafai ona maua mai i se vaegatupe na maua mai i se fa’amasinoga lata mai, e a’afia ai fualaau faasaina, e mafai ona fa’amautuina ai polokalama fa’atulagaina o le a pito augafa i le taofia o fa’afitauli ona o a’afiaga o fualaau faasaina.

Ma o le a faapea foi ona a’apa atu le malo i taitai po o fa’auluuluga o ekalesia, ina ia mafai o.na auai i lenei taumafaiga aufaatasi.  O le sini fa’atulagaina, ina ia o’o atu i le tau mafanafana o le tausaga e 2027, ua toe tineia e le malo ma tagata o Amerika Samoa ia lenei faafitauli.S

Sa faapea ona ta’ua e le afioga i le kovana e faapea, o le sini autu a le malo, o le taumafai lea e fa’amalosia pe siitia ia le puipuiga i tuaoi, malaevaalele, uafu ma falemeli, ina ia mafai ona fa’asagatau i le tele o faafitauli ua tutupu mai, e a’afia ai fualaau faasaina.

O le a aofia ai foi a’oa’oga mo tagata faigaluega o lo’o gafa ma le puipuiga o le saogalemu lautele, e le gata ina ia mafai ona o latou taulimaina le atamai faapitoa e fofoina ai fa’afitauli i le feavea’iina o Fualaau faasaina ma isi solitulafono e sootaga faatasi ai.

Na saunoa foi le kovana, i le mafuaaga o le faapitoa o se vaega o lenei fale fou, i le soifua maloloina o tagata ua a’afia i Fualaau faasaina, ona o lo’o iai se faamoemoega mo le tapaina o se fesoasoani mai i le malo Feterale.

O seisi vaega taua o nei poloketi, o le falema’i lea o le toe fa’ateleina lea o le falema’i manu, lea o le a fa’aaluina ai se vaegatupe e $2.4 miliona.

Sa fa’aleoina e le afioga i le kovana, le taua o lenei falema’i, ma se fa’amamafa i le taua o manu sa gaosia e le Atua.  O le a faapea ona siitia ai tulaga o lenei auaunaga, e le gata mo fagafao a aiga e faapea so’o se manu i totonu o le atunu’u.

Ma le lona tolu o poloketi, o le toe faateleina lea o le falema’i lea o lo’o iai nei i Tafuna/Petesa.  Ma o lea gauega, sa amataina i le vaiaso ua tuanai.

Sa fa’amamafaina e le afioga i le Kovana le taua o le galulue faatasi o le Ofisa o le Soifua Maloloina faapea le falema’i autu a le atunu’u (LBJ), ina ia mafai ona si’itia le tulaga o auaunaga mo le soifua maloloina o le atunu’u.