Silia ma le $255,000 maua sailiga tupe Amerika Samoa mo Samoa

E silia ma le $255,000 le aofa’i o le tupe ua ma’ea aoina mai foa’i a le atunu’u i le sailiga seleni sa fa’atautaia e le faigamalo a Amerika Samoa e fesoasoani ai mo Samoa i le mafatiaga i le pepesi o le misela o lo’o i ai nei.

Fa’ailoa i fa’asalalauga mai Samoa e fa’apea, e tusa i le 76 i latou ua maliliu i Samoa, ona o le misela ma o le toetele lava o fanau iti.

I le malae o le Su’igaula o le Atuvasa i Utulei i le aso Toana’i ua te’a, Tesema 14, sa fa’ama’ea ai le sailiga tupe a Amerika Samoa, lea sa amata mai i le aso 4 o Tesema. O lea foi aso sa fa’alauiloa ai le aofai o le selenei sa maua mai i foai a le atunu’u, e aofia ai matagaluega a le malo malo, pisinisi, afioaga, ma ekalesia.

Teutupe a le malo, Ueligitone Tonumaipe’a sa ia fa’alauiloa le aofai o le tupe ua ma’ea ona aoina, e $255,144.41. Sa ia saunoa e fa’apea, mai lea aofaiga, o le vaevaeina lenei: $41,413 mai matagaluega ese’ese a le malo; $43,070 mai ekalesia;$123,340 mai pisinisi; $5,000 mai pulega a ali’i ma faipule o afioaga; $3,827 mai fa’alapotopotoga; ae $38,549.41 mai tagata ta’itoatasi.

Saunoa fo’i Tonumaipe’a e fa’apea, e le’i ma’ea ona aoina tupe foai mai vaega ese’ese o le malo ma o lo’o i ai le fa’amoemoe e fa’ama’ea i lenei vaiaso.

Sa i ai foi i le fa’atasiga i le aso To’anai le afioga i le senetoa ia Fa’amausili Mau Mau Jr., fa’atasi ai ma afioga i faipule ia Vailiuama Steve Leasiolagi ma Loia Gutu e tuuina atu i le komiti le seleni e pei ona aoina mai le Fono - e aofia ai afioga i senetoa ma faipule.

O le aofa’i e $4,460, ae pe’itai e le’i ma’ea ona aoina le fesoasoani a le Fono, lea o lo’o fa’amoemoe e fa’amaea i lenei vaiaso.

Saunoa fa’afetai le afioga i le Kovana Sili, Lolo Matalasi Moliga, i le aao foa’i o le atunu’u, ae maise o ta’ita’i o nu’u ma ekalesia i le lagolagoina o lenei fa’amoemoe mo Samoa.

Sa fa’ailoa e Lolo, atonu o se aso o lenei vaiaso e fa’amautu ai le aofa’i atoa o le seleni mo Samoa, pe a o’o atu i le komiti seleni o lo’o fa’atalitali. Ae i le fonotaga a le kapineta sa faia i le aso Gafua o le vaiaso lenei, sa fa’atonu ai e le kovana fa’atonusili ia o’o atu i le aso Tofi, ua ma’ea aoina atu tupe o lo’o fa’atalitali i si le komiti.

Ua fa’amoemoe le kovana sili, e tuuina atu le foai i aao o le Palemia o Samoa, ma le faigamalo a Samoa.

Ua ma’ea ona fa’alauiloa e le kovana, sui o le malo o Amerika Samoa e malaga atu i Samoa e tuuina atu le foa’i tupe. O le au malaga e aofia ai le tofa ia Fofo I.F. Sunia, senetoa Tuaolo Manaia Fruean, Tonumaipe’a, ma le afioga Lutena Kovana, Lemanu Palepoi Sialega Mauga.