Si’itia i le 30 ua a’afia i le Koviti-19

APIA, Samoa--I se pepa o fa’amatalaga mai le Ofisa o le So’oupu a le malo o Samoa, ua fa’asalalauina ai e fa’apea o lo’o tumau pea Samoa i le La’asaga #2 (Alert Level #2) o le lanumoli o Poloa’iga o Fa’alavelave Fa’afuase’i. 

Ua le gata i lea, ua fa’ailoa fo’i, e o’o mai i le taeao o le Aso Sa, aso 30 o Ianuari, ua fa’amauina e le Matagaluega o le Soifua Maloloina a Samoa le fa’aopoopo ai o le to’atolu (3) i latou fou ua a’afia i siama o le Koviti-19 e aofia ai ma se alualutoto e 4 tausaga le matua.

E pei ona fa’ailoa i pepa o fa’amatalaga, oi ia su’ega (tests) sa faia i le taeao o le Aso Sa, mo i latou uma o lo’o fa’anofoesea, e aofia ai le pasese na malaga mai Brisbane Ausetalia fa’atasi ai ma i latou sa galulue i le kiliaina o lea va’alele. 

O lea ua si’itia nei i le 30 le aofa’i atoa o i latou ua a’afia i le Koviti-19 i totonu o le atunu’u, o lo’o fa’amauina fo’i le malolosi uma oi latou nei ma e leai ni auga o le fa’ama’i o maua mai i latou nei. 

Mo le aufaigaluega atoa sa faigaluega i lenei galuega o lo’o fa’anofoesea, e leai se isi ua a’afia se’ia vagana ai tausi soifua e to’alima ua a’afia o lo’o fa’anofo va’ava’aia pea i le nofoaga fa’apitoa i le falema’i i Moto’otua.

E leai fo’i se fa’amaumauga po’o se fa’amaoniga ua pepesi i tua i le atunu’u le fa’ama’i.

I se lipoti mai Amerika Samoa, o lo’o fa’ailoa ai o lo’o tumau pea le taofia o malaga i le va o Pago Pago ma Apia. O le aso ananafi sa faia ai le fono masani fa’alevaiaso a le komiti Koviti-19 a Amerika Samoa. 

E o’o mai i le taimi o lenei lomiga e le’i maua se lipoti fou i se fa’aiuga o lea fonotaga i le tulaga o alava’a i le va o Samoa e lua.