Saunoaga fa’apitoa Kovana sauniga fa’apaia Maota fou i le Peteli Academy

Pago Pago - AMERIKA SAMOA

I se pepa o fa’amatalaga mai le Ofisa o le Kovana, sa fa’ailoa ai e fa’apea o le afioga i le Kovana Sili ia Lemanu P. S. Mauga na auai i le sauniga o le fa’apa’iaina o le Peteli Academy Hall lea ua mae’a ona fausia i le aso 28 Iuni 2023, ma fofogaina ai le saunoaga autu. 

O le mamalu o le auvalaaulia e aofia ai le Failautusi o Mataupu Tau Samoa le afioga Mauga Tasi Asuega, le Peresetene o le Senate ia Tuaolo Fruean, le Fofoga Fetalai o le Maota o Sui ia Savali Talavou Ale, ma le mamalu o le Aulotu na alo atu i le sauniga sa faia i le Ulua’i Ulu o le Ekalesia Penetekoso a Samoa Full Gospel (FSFGPC) i Ottoville, Tafuna.

“O le asō, ua potopoto ai iinei e faamanatu ai se tulaga mata’ina ua ausia—o se molimau i le faamaoni o ta’ita’i o le ekalesia i le lumana’i o o tatou tupulaga ma aiga. O le faigamalaga i le fausiaina o lenei maota matagofie e le’i aunoa ma ni luitau, ae ou te faamalo atu i la outou taumafaiga faifai pea ina ia faamaeaina,” o le saunoaga lea a Kovana Lemanu.

Sa saunoa le kovana sili i le tulaga tutusa o taumafaiga a le faigamalo a Lemanu-Talauega ma ta’ita’i o le FSGPPC, e lagolago ai tupulaga a Amerika Samoa ma tauiviga o lo o feagai ma i latou. 

“O loo feagai o tatou talavou ma le tele o faafitauli e le o tulagaese i o tatou matafaga; o tupulaga talavou i le lalolagi atoa o loo feagai ma faafitauli e pei o le faaaogāina o vailaau, faatautala i totonu o aiga, ma faafitauli eseese,” ose vaega lea o le saunoaga a le kovana.

“O le Faigamalo e tutu faatasi ma tupulaga talavou i nei taua, peitai, o nei mataupu e le na o le malo; ose taumafaiga felagolagomai ma o tatou nuu ma ekalesia, nuu, ma aiga,” o le saunoaga lea a Lemanu.

“O lea fale ma taumafaiga a le aulotu ua o gatasi ma fuafuaga a le Pulega, ma ua tulai mai o se molimau i le faamaoni o taitai o le ekalesia e faafailele, a‘oa‘oina, ma ta‘ita‘ia a tatou tupulaga i se lumanai manuia.”

Sa fa’afetaia fo’i e Kovana Lemanu le Peresetene o le Ekalesia, fa’atasi ai ma sui o le Komiti Fa’afoe ma aulotu, atoa ai ma le ‘au volenitia, ona o a latou galuega fita, tatalo, ma le lototetele i le fo’ia o lu’itau i tausaga ua mavae ma fa’amae’aina le fale.

I le iloaina o le mana'omia tele o avanoa tau a'oa'oga lelei, ua faia ai ma le agalelei e le Peteli Academy ni aiaiga mo potuaoga i totonu o le hall, ma mafai ai ona maua se si'osi'omaga lelei mo tamaiti a'oga e a'oa'o ma tuputupu a'e faaleagaga ma a'oa'oga. O le Peteli Academy e aofia ai se A'oga Tulagalua, se a'oa'oga fou a le A'oga Maualuga, ma se A'oga Tusi Paia.