Sauni Samoa tali malo i Taaloga lona XVI Pasefika i le 2019

Ua fa’aalia e le malo o Samoa lona sauni atu mo le fa’atinoina o lana fatuaiga masani o le talimalo, i le taimi o Ta’aloga lona XVI a le Pasefika lea ua fa’amoemoe e faia atu i ona laufanua i le tausaga e 2019.

I le fonotaga i le va o Samoa ma Amerika Samoa i ni nai vaiaso e lei mamao atu, na aofia ai i le tele o mataupu sa talanoaina ma malilie i ai ta’it’ai o atunu’u e lua, le mataupu e fa’atatau i sauniuniga a Samoa e talo i ta’aloga a le Pacific Games i le 2019.

Na fa’aalia e Samoa i lea talanoaga le tele o tapenaga ua amataina i le taimi nei, e ala i le toe fa’aleleia lea o nofoaga e talimalo ai atunu’u ma au taaalo o le Pasefika e autova’a atu i le taimi o lenei fa’amoemoe.

O le fa’atolu a lea ona talimalo Samoa i ta’aloga tetele nei a le Pasefika. Na ulua’i talimalo Samoa i le 1987, sosoo ai ma le 2007, a o lea ua toe sauni e talimalo i le 2019.

I ripoti mai le au fa’asalalau mai Samoa e tusa ai o le talanoaina o lenei mataupu i le fonotaga a Samoa e lua sa faia, na manino ai le lagona fiafia o le ali’i Palemia o Samoa, susuga Tuilaepga Lupesoliai Sa’ilele Malielegaoi, ina ua mafai ona talia le talosaga a Samoa sa tuuina atu e talimalo ai i ta’aloga a le Pasefika, ina ua fa’ama’amulu le malo o Tonga na manumalo i le palota sa faia i le taimi o taaloga talu ai nei a le Pasefika sa faia i Papua Niu Kini i le 2015.

Na taua e Tuilaepa i le fonotaga a atunu’u e lua, o le talimalo ai o Samoa i ta’aloga a le Pasefika, o se tulaga lelei lea mo le atina’eina o le tamaoaiga, o ta’aloga, aemaise ai o le turisi. O le atina’e o le turisi, o le isi lea itu o lo o faalagolago malosi i ai le tamaoaiga o Samoa i le taimi nei.

I tulaga o ta’aloga, o le vaiaso nei lea ua fa’amoemoe e fa’amae’a ai ta’aloga Laiti a le Pasefika o lo o fa’agasolo i Vanuatu mo le umi e lata i le 3 vaiaso, lea fo’i o lo o tausinio ai au ta’aalo a Samoa ma Amerika Samoa nei.

I se ripoti mai Vanuatu i au ta’aalo a Amerika Samoa o lo o tausinio ai, ua fa’aalia ai le manumalo o le ali’i o Tanumafili Malietoa Jungblut i le pine apamemea i le ta’aloga o le si’isi’i u’amea mamafa mo Amerika Samoa, i le mamafa o lana si’i e 355kg.

O le vaiaso na te’a nei na fa’atoa malaga atu ai isi au ta’aalo a Amerika Samoa e aofia ai le au Basketball, mo le auai i le tausinioga o lo o fa’agasolo i taaloga i Vanuatu.

Talu mai le aso ananafi, ua fa’aalia i ripoti mai Vanuatu ia le oo atu o pine ua maua e Samoa i le 27 mai ta’aloga eseese uma na tausinio ai. E 13 pine auro, 9 pine siliva ae 5 pine apa memea. O pine auro a Samoa na maua uma mai lea i ta’aloga si’isi’i u’amea mamafa.