Sauni malo ma le atunu’u fa’atali taunu’u mai va’a o le Manu’atele

O le itula e 9:00 i le taeao o le aso Lulu, o a taeao lea, Ianuari 4, 2017 ua fa’atulaga e taunu’u aloaia mai ai le va’a a le malo o le M.V Manu’atele i le uafu tele i Fagatogo, ma sauni ai loa le malo mo le sauniga lotu e fa’apaiaina ai le toai taunu’u mai o le va’a.

I se pepa o fa’amatalaga na tu’uina mai e le afioga i le ali’i kovana ia Lolo Matalasi Moliga i le vaiaso na te’a nei, sa ia taua ai e fa’apea, o le taunu’u aloaia mai ai o le va’a o le Manu’atele i le atunu’u, o le amataga lea o se suiga fou i le soifuaga i tagata o le itumalo o Manu’a, ae o se fa’ailoga fo’i lea o le aga’i i luma atoa ai ma fa’amanuiaga i le itu tau i le tamaoaiga, lea ua tele tausaga e le o maua e le itumalo, e mafua mai i tulaga fa’aletonu sa fetaia’i ma auala o femalagaaiga.

Na taua atili fo’i e fa’apea, o le i ai o le M.V Manu’atele, o foliga vaaia lea o le galulue pea o le kovana ma le malo e tatala faitoto’a fou mo auala e si’itia ai le tamaoaiga, ina ia mafai ai ona aumai auala eseese e si’itia ai le soifua lelei o tagata o le atunu’u, ao fetaia’i ai Amerika Samoa ma se tasi o lu’itau, o le avea lea ma teritori o le malo tele o Amerika e tutasi i le vasa pasefika.

“O le mafai ai e le malo ona fa’atau mai o le M.V Manu’atele, o le ata vaaia lea ma tulaga lelei o le galulue soosoo tauau o le faigamalo ma le nofoaiga lona 34 a le Fono Faitulafono ua mavae atu, aemaise ai o le lagolagosua mai o le Sui Failautusi o le Ofisa o le Initeria ia Lupesinaosamoa Esther Kia’aina, fa’apea ai ma le tautua a le Komiti Fa’afoe o le Tamaoaiga o Amerika Samoa (ASEDA)”,  o se vaega lea o le saunoaga a le ali’i kovana.

E le gata la i le fa’afetai fa’apitoa a le ali’i kovana i tagatanu’u uma o Amerika Samoa, e tusa ai o talosaga aemaise ai o le onosa’i e fa’atalitali gaioiga a le malo mo le fa’aleleia o le atina’e o le atunu’u, ae ua valaaulia fa’apitoa ai fo’i Ta’ita’i o le atunu’u fa’apea ai tagatanu’u uma o Amerika Samoa, ina ia auai fa’atasi i le molimauina o le sauniga mo le fa’apaiaina o le va’a o le M.V Manu’atele, i luga o le uafu tele a le malo i Fagatogo i le taeao o le aso Lulu o le vaiaso nei.

Na taua e le Fa’atonusili le tuma o le Pulega o Taulaga ma Malaevaalele ia Taimalelagi Dr. Claire Poumele i luma o le fonotaga mulimuli a le Kapeneta i le 2 vaiaso talu ai e fa’apea, o le MV Manu’atele o lo o fa’afoeina mai e Saila e to’a 6 sa galulue i le MV Sili, lea ua mae’a ona pasia aloaia i latou e le US Coast Guard i le mae’a ai lea ona auai i ni aoaoga sa faia i Seattle.

O loo malaga mai fo’i le va’a ma momoli mai uta mai ni isi o aiga o le atunu’u o loo alalaga i Hawaii, o fa’amomoli mo aso fiafia o le kerisimasi ma le tausaga fou i aiga ma uo o loo aumau i Amerika Samoa nei.