Sauni le malo e fa’afetaia’i lu’itau mai fesuiaiga a le malo tele

Na taua e le afioga i le ali’i kovana i luma o lana Kapeneta i le vaiaso na te’a nei, le sauni o le faigamalo a Amerika Samoa e fa’afetaia’i le tele o lu’itau ma suiga o le a a’afia ai lo tatou faigamalo, e mafua mai i fesuiaiga tetele o le a faia e le malo tele o Amerika, i le taimi e tula’i mai ai le faigamalo fou mo le ta’ita’iina o le atunu’u mo le isi 4 tausaga.

“O le 6 masina o lo o lumana’i nei, e le o se taimi faigofie lea mo Amerika Samoa lana faigamalo, ona o a’afiaga o le a alia’e mai i suiga o le faigamalo a le Iunaite Setete, ma e i ai le talitonuga o ia suiga ma ona a’afiaga e o o mai lona malosi i Amerika Samoa nei i le itu tau tupe atoa ai ma fa’aiuga, o le mafua’aga lea ma te talosaga atu ai ma le afioga i le Lutena Kovana ia Lemanu [Peleti Mauga], ina ia tatou sauniuni e fa’afetaia’i soo se suiga ma a’afiaga e oo mai i lo tatou malo”, o le saunoaga lea a le afioga i le ali’i kovana ia Lolo Matalasi Moliga i luma o le Kapeneta.

O ni isi o lu’itau na fa’ailoa e le ali’i kovana i le Kapeneta e ao ona nofouta i ai, o tulaga i tupe a le feterale lea e maua mai e toe fa’atutumu ai tupe lotoifale sa fa’aalu i polokalame o lo o fa’atupe mai e le feterale ae o lo o tuai ona taunu’u mai.

Na taua e Lolo e fa’apea, o ni isi o polokalame feterale o lo o i ai nei, o lo o ta’i 2 masina ma maua mai tupe e toe fa’atutumu ai tupe lotoifale a le malo, peita’i e suiga fou e tatau ona tapena i ai le malo, e ono oo atu lava i le ta’i 6 masina e fa’atali ai tupe ia pe afai ae amata fesuiaiga i le faigamalo fou o le a tula’i mai.

“O tagata ia ua tofia e galulue i ni isi o Komiti Fa’afoe mo le faigamalo fou o lo o aga’i mai a le malo tele, e le o ni tagata faigofie, pau la tatou vaega e fai, o le onosa’i i suiga a ia tapenapena i soo se auala e foia ai ni fa’afitauli e ono tutupu mai”, o le saunoaga lea a le ali’i kovana.

Sa toe fa’amamafa atili e le ali’i kovana i le Kapeneta tulaga o le fa’atonutonu lea o le fa’aaogaina o tupe, aemaise lava le tatau lea ona uia muamua ala o tulafono ona fa’atoa fa’aaoga ai lea o tupe, ina ia taofia ai faiga masani sa sau ai le malo i tausaga ua mavae, “o le ta muamua o le aufa’i fa’atoa fa’anoi ai”, po o le faia o se gaioiga ae fa’atoa uia mulimuli ala o le tulafono.

“O lo o tumau pea a tatou tulafono i le fa’atonutonu lea o le fa’aaogaina o tupe, aua le soona fa’aaluina tupe a lau matagaluega, aua le naunau e fai ni suiga e le mautinoa, a ia mulimulita’i i le tulafono e manuia ai le malo”, o le isi lea fautuaga a le ali’i kovana.

Na fa’afetaia e le afioga i le ali’i kovana le Kapeneta e tusa ai ma galuega o lo o fa’aauau pea ona fa’atino mo le malo.